Press "Enter" to skip to content

Pu No Than Kap: Chin Party Tumtah Mi!

Chin Party Tumtah Mi!
====================

​Chin State 2020 hrilawk ah Chin National League Democracy in nehnak a co a sile, Party tumtah mi “Cozah thianghlim le Uknak ṭha Clean government and good governance” siseh, Chin miphun zinledan thlun ih tuah mi dan phunphun siseh, tuah hlawhtlin theih a si ding ruangah, a thupi 2008 Danpi rem lo khalin, State in amai State hrang tuah theimi dan an um.

HMANSEH, hihi cu Chin State hrang lawng ti theih a si. Chin State lenglam hmunkipah, pupa san ihsin luahmi Ram felfai neiih um kan Unau Chin miphun dinhmun khal ruat sak lo a theih lo. Anmah thawn lungrualten, kan miphun hrangah aw khat suah thei dingin kan zuam a ṭul. Hihi a thupi ngai ngai. Himi tuahsuak thei kan duh ruangah, CNLD cu, ram pumpi Sung khui khalah cangvai thei dingin Register kan tuahnak a si.

Chin miphun zaten kut kaiaw in, kan dintlang hnuah, Chin miphun cu Ramfinkhawm miphunpawl lakah mipum tambik palinak, pupa dan le nunphung ṭha nei miphun danglam, lungthin thianghlim le lungrual thiam kan sinak langter a ṭul, a cut khal a cu tuk thlang. Himi langter thei dingah, Nunphung, Calai le Biaknak tivek Pawlpi cu an thupizet nan, Dan vekih dinmi political party pakhat hnuaiih finkhawmawk hi hmual a nei bik. Cui party cu Chin National League Democracy si dingin zuam rero a si.

Curuangah Sagaing, Magwe, Zakhaing Ramthenpawl ah Party din vivonak san a si. Yangon khalah din rero zo a siih Mandalay le Pegu lam khalah din dingin zuam a ṭul. Tu ah Chin State peng 9 le Ramthen dang peng 13, zate 22 ah Party din zo a si.

Chin National League Democracy Thawng hnuaiah, Chin miphun zaten um khawm thluh thei dingin, Danledun khal ngan rero zo a si. Cabu in zem suah a si cing ding. Curuangah 2020 Chin State hrilawk ih nehnak co thei ding lawng tumtah loin, Chinram lenglam khalah nehnak co thei dingin le a thupibik ah, Chin miphun zaten “phunhnam hlutnak le pianpi hlutnak” langter thiam dingin zuam tlang a ṭul.

Phunhnam le Pianpi ‘Hlutnak’ kan langter thei hrih lo ruangah, Mah le mah rinsanawknak um lo thanaunak le khawruahnak bite in, Chin miphun cu saphai bangin in hamih in dawlh cuahco, hnamhlo Lamzin ah in hruai lut duahdo. Miphun dang rinsan le upat tuk cu miphun dang thazang a cakter ih mai miphun a a ṭumsukter. Kan Miphun pumkhatnak ihsin, Chin phunhnam le pianpi HLUTNAK hi leitlun ah awmpoh in kan langter thei ti, mikip lungthin sungah tlawngkhen bangin khenbet a ṭul.

Hivekih pumkhatnak in, Hlo duahdo kan zinledan, nunphung le calai a nungter sal thei. Hloh zo mi kan pianpi canvo phunphun, pupa loram tlunih lairel theinak le thuneihnak tiangin, in ngahter sal thei. Hipawl hi Veikhat hrilawk ih neh le sun men hnakin a thupi sawn.

Be First to Comment

Leave a Reply

Your email address will not be published. Required fields are marked *