Press "Enter" to skip to content

Lailenpi Airport On Puai ah Benjamin Sum, Yaw Kee le Esther Dawt Chin Sung : Dr. Sa Sa

A sunglawi chin lengmang ko. Chin ram chungah zeitik thla kan zaan mang a tlin te ne lai tiah saduh kan rak thah lengmang mi cu Pathian dawtnak thawngin Airport cu buaipi cuahmah lio a si i mah Lailenpi Airport On Puai ah cun, Hlasak thiam Benjamin Sum, Yaw Kee le Esther Dawt Chin Sung hi sawm an si.

A sawm nak hna Video cu a tanglei ah hin kan van chiah.

Thawngpang thar a tanglei ah kan vanchiah.

Hakha Le Thantlang Nih Khua Kan Ruah Deuh Aza Cang

Nihin Chin miphun kan dirhmun cuanh tikah abing tein i thlirnak, peng tlang, khua le miphun tete in I lak hrannak a karhcho chin lengmang. Mah le holh tanh cio in mah holh pin cu raal hmuh in hmuh I timhnak, mah peng le tlang a si lomi thil cu cohlan I timh ti lo. Mahca, Kawlca le Mirangca lo cu cawn ti lo ding, timi cawnpiaknak tiang in hmun cheukhat ahcun a karhcho chih lengmang.

A bikin Hakha/TT huatnak hi Kum 2010 hnu in biatak deuh in cuhlan nakin a karhcho deuh hlah maw, timi hmuh len awk in buaibainak tete hmun pah len awk in a hung um. Hi kong hi zohsawh awk a tha ti rua lo i tuaktan len kan herh cang ko lo maw cu,.. timi a ka ruahter. Cucaah hi kong hi pumpak keimah nih ka dothlat tawk le hmuh khawh tawk in a tawi khawh chung tawi in ka vun tial ve tuah lai.

Hakha/Thantlang Hi Alamkip In Bik An Si

Nihin Chin miphun chungah kan dirhmun epchunnak (comparison) tuah tikah a lamkip in Hakha/TT cu an cungnung dih ti usihlaw Pathian hna kan tla lo tuk sual lai phan aum. Asinain catial tupa nih kai timhmi cu phorhlawtnak lei siloin fim chimtu caah asi deuh.

Biaknak in evengalists, theologians le CBC kan dirhmun cuanh tikah buu ai thek lo pawl, a thawngbik le a tambik kan si. Myanmar Christian koko ahcun minlang bik le dirhmun sang pipi a phan kho kan pa le khi Hakha/TT minung lawngte an si.

Hla bia le lecture lei zong ah kan cungnung bik thiamthiam. Vawleicung ah lar na duh asi ahcun Mirang hla sa, Kawlram ah lar na duh asi ahcun Kawl hla sa, ti bantuk in Chin miphun chungah lar na duh asi ahcun Lai hla sak lo ahcun min lang taktak khawh asi lo caah kan unau Mizo tiang nih Lai hla saknak in phaisa tawrtawr in an ruh phahnak asi. YouTube I Lai hla viewers tambik kan zoh tik zongah 3.5 million viewers a phan mi hla aum i Mizo he hla bia ah kan I thlau ti lo timi hmuh khawh asi. 1 million viewers cu a tam ngaingai cang.

Ramkhel kong ah siseh, cozah riansang tuan ah siseh Hakha /TT cu kan cungnung thiamthiam. Chin miphun chung ah ramkhel rian ah a muru taktak Myanmar cozah pi hmanh nih a tih bikmi cu Laimi thiamthiam kan si ko.

Ramchung (Chinland) i kan milu zoh tikah Matupi, Thantlang le Hakha fonh ahhin Chinram milu zatceo tluk deng kan si i khualipi a umnak zong cu kan si cu.

Ramleng kan dirhmun zoh tik zongah vawleicung ram biapi bik USA ah Chin miphun 60,000 hrawng um in chim asi I, hi chung ahhin CBCUSA members 33,000(Hakha/TT) Khrihfabu 111 um in chim a si i AG, UPC le a dangdang he fonh in cun 40,000 hi Hakha/TT kan si lai tiah ruah asi.

Mizoram ahhin minung a ting in an um I Lawngtlai District cu Lai District asi i Laica hman an cawng.
Australia Chin miphun 15,000 hrawng an um i, hi chungah Hakha/TT hi minung 11,000 reng lo an si. Australia ramchung ah Laica cawnnak nawl tiangin an hmu kho cang.

Malaysia, New Zealand, Europe le Canada hrawng ummi Chin miphun zoh tik zongah atam u (majority) hi Hakha/TT kan si thiamthiam.

Chim ding hi a tam, kan chim cawk lai lo. Hi hmanh hi a tawinak tuk in ka tial I a fiang lo tuk lehlam lai. Zeikhawm asi hmanh ah Laimi cu Chin miphun caah cun a biapi bikmi kan si nak kha chim duhmi asi.

Chin Miphun Chungah Hakha/TT Cu Upa Bik Kan Si

Hakha miphun hi (Hakha le Thantlang hi phun khat ah an kan ruah caah Hakha tilawng in ka hman lai) Chin miphun chungah kan dirhmun hi fa upa bik, nucan le pacan dirhmun ah a dirmi kan si. Hihi thil sining zoh tikah al awk a tha bak lomi asi. Cucaah Hakha miphun nih Chin miphun chungah fa upa bik dirhmun ah kan dir timi lungput hi kan I fian hi a herh tuk hringhran, i cucu mikip nih cu thinlung kan put khawh ahcun kan ram hi a dam a rang tuk colh lai.

Hakha miphun cu kan umnak kip, kan phak nak kip le a lamkip in kan miphun hawi hna sinah dirhmun sang deuh le a tam deuh kan si zungzal timi kan I fian a herh. Kan pawng kam i khua a sa vemi kan unau hna nih an kan uhtanh tuk maw, kan pawng um hi an I nuam maw, thazaang le a lamkip in kan tei hlei hna ah biaka tiangin kan nek tuk rih in an ka huamtuk sual ma? Timi zong hi ruah chih pah in fa upa bik kan sinak hi kan I theih hi a herh tuk hringhran.

Chin miphun kan I rualremnak le lungkhat in miphun kan I hlawm khawhnak ding ah Laimi (Hakha/TT) kut cung ah 60% cu asi hngat mi asi, ti usihlaw kan palh tuk theng lai lo dah.

Asinain Upa Lungfim Cio Kan Si Cang

Chin miphun mawh phurhtu le fa upa bik kan si caah kan unau dang pawl hi usape khun ding ti nak cu asi lo. Dirhmun khat te tu in khat le khat i zoh, nang Falam, nang Tedim le nang Hakha ti loin covo ai rual mi tinco cio dingtu hi kan rian asi. An holh in va holh piak theng, an miphun va upat piak khun le annih paoh cu hmunhma tha pek hlei ding ti nak asi lo.

Miphun caah ahodah rian a tuan, covo hmuh awk ah ai tlak in Chin miphun caah pasal/nusal tha asi maw? Upat tlak le a co awk a co ma, titu hi thleidannak umlo tein rian tu kan tuan i an co hnga asimi tu an co cio awk asi hng. Cucu siloin a miphun a miphun in kan kal ahcun kan nih cu a tam u le a thawng deuh kan si I zeitik hmanh ah kan ram a dam hnga lo.

Bia Donghnak

Nikhat cu pafa rual ram riahnak in an hungtlung i lamkam ah nengpi an I suknak i thingtuaino le phong an pah viar mi an hmuh. A fale nih cun an I thawh i”Kapa, ziah thla mak tluk fak taitai hin an I suk ning asi hnga?” tiah a fale nih cun an pa cu an hal” Cu tham cu a derdeuh nih a cakdeuh kha a tei i a cakdeuh nih na ka tei hrimhrim tiah a thin hungtuk i a thapi dihlak hmang in a suk ciammam i hi tihin thing vialte an khiahnak cu asi ko hme Cu” ati.

Chim duhmi cu Hakha cu Chin miphun chungah upa bik, a thawngbik le thazaang ngeitambik kan si tikah kan miphun kan nau le nih a phunphun in an bianek le hmurka chia in ti caan kan tong lengmang lai, cutik ah lehrul kan cham ve cikcete sual hna ahcun kan thing le ram vialte zong an kiak dih lai caah fa upa kan si nak kha I hngak in kan Chin miphun a damter khotu kan si khat I fiang cang dingin forhfial kan duh hna.

Hngakchia deuh nih cun ule thil paoh chuh i timh le hnahchuah phung asi tawn ko. Kanmah nihhin Chinram daihnak a muru taktak a tuah kho biktu kan si, timi I hngal in, Kan nau le nih kan pawng an um ahhin an I nuam maw? Zeitindah lungkhat in rian kan tuanti lai i zeitindah hmu khat ah hmai ah kan fonti hna lai, timi hi ruat in peng tlang lungput vialte hlawh in Chin miphun caah kan tuanvo lianpi hi hram domh cang dingin Global Rawn Chin Media nih kan in forhfial duh hna. Chelsea Bawi

Be First to Comment

Leave a Reply

Your email address will not be published. Required fields are marked *