Press "Enter" to skip to content

John Fready: Jehovah Nih Hram A Rak Thok Lio Le Hlan Liopi I Rian A Tuan Hlan Ah Khan A Ka Ngeih Diam Cang!

Jehovah Nih Hram A Rak Thok Lio Le Hlan Liopi I Rian A Tuan Hlan Ah Khan A Ka Ngeih Diam Cang!
==============================

Pro 8:22-31, 22. JEHOVAH nih hram a rak thok lio le hlan liopi i rian a tuan hlan ah khan A KA NGEIH diam cang, 23. Zungzal in FEHTER ka rak si,Vulei a um hlan le hram a rak thok ah khan. 24. A thukmi Rili a um hlan le ti hna vialte an chuah hlan ah khan ka rak CHUAK diam cang. 25. Tlang hna a um hlan le mual hna a um hlan hmanh ah ka CHUAK diam cang. 26. Vulei le ram hna a ser hlan le Vawlei le leidip hna an um hlan ah khan, 27. Van hna a timhtuah lioah khan KA UM cang i a thukmi Rili cung i heelnak lam a SER lioah khan. 28. Van raang i khuadawm a zaamter lio le a thukmi rili, a luangmi cerhti thazaang a pek LIO ah khan. 29. Ti nih a nawl pek an buarnakhngalo, rilipi ca i ri a khiahpiak LIO ah khan, vulei hram a rak bunh LIO ah khan. 30. Zung a thiammi bangin a PAWNG ah ka rak um i ni chiarte amah lomhtertu ka si, a PAWNG ah kaa lawm. 31. Umnak ding i a sermi Vawlei nih a ka lomhter, mi fapa hna nih an ka lomhter chin chin. Mah Solomon fimnak phungthlukbia tialmi nih hin, Trinity doctrine maw a bomh deuh? Oneness doctrine dah?

Doctrine mit in kan zoh chun tuah lai: Tu lio Online chungin Trinity doctrine fiannak hrilhfiah a tuahtu hna Kan hawi le cheu khat nih hin, Solomon phungthlukbia tialmi 8:22-31 Chung hi Fapa dirhmun fianternak cherhchan ah an lak i an hmanmi a si caah Trinity doctrine caah Bawmtu a si taktak maw si taktak lo, dr tihi felfai deuh le ningcang deuhte in Kan dothlat ti tuah hna lai! Cun, Oneness doctrine Bawmtu le fiantertu teh a si kho maw? ti zong kan zoh chih ve lai.

A tak tak le a ngai ngai tiah cun, an cawnpiaknak dik lo, mei lam phalhtu ding hi a dikmi Trinity doctrine cawnpiak a thiammi Trinity an saya te an si awk a si nain, an phalh duh fom lo cu teh! Zapi theih awk tlak tein an chim lengmang mi Trinity an doctrine ah Pathian cu pakhat a si. tihi an chim cio ning a si. Cu Pathian pakhat ahcun Mi pathum an um, an ti cio fawn. Cu hna cu; Pa, Fapa, Thiang Thlarau ,hna hi an si, an ti cio fawn ko. Pathian pakhat ah Mi pathum, Or, Mi pathum cu Pathian pakhat, an si. tihi, Pathian kongah an chim ning cio zapi theih cu a si.

Sernak kongah; Gen 1:1 A hramthok ah Pathian nih Van le vulei kha a ser. Mah ka i Pathian timi hi, (Elohim-Plural form) thumkomh Pathian kha a si caah, sernak ah hin, an pathum tein, sernak rian an tuanti, tihi, an chim ning cio a si. Gen 1:26 Cuticun Pathian nih Kanmah mui kengin Kanmah he I loin, minung ser u sih law, timi zongah hin, Kan a ti caah thumkomh Pathian, Pa le Fapa le Thiang Thlarau bak kha an si, ti cio a si fawn rih.

Bible cacang dang cu, va um cang ko seh, Pro 8:22–31 chung le Gen 1:1,2 1:26, sernak kong an chim ning le an fianter ning kong hi aa khat kho maw khat kho lo? BAWIPA (JEHOVAH) nih hram a thok lio le, ti in Phungthlukbia tialtu Solomon nihcun a chim i, Kan hawi le chimning in tial ding rak siseh law, Pathian nih hram a thok lio le, ti ve ding a si hnga, (BAWIPA ticu JEHOVAH timi chimnak ti si i, Pathian ticu Elohim timi chimnak an ti caah mu.)

Cucaah sertu cu Pa, Fapa le Thiang Thlarau thumkomh an si caah Elohim timi, Pathian ti a hmannak a si, ticu, Biblical ning a si deuh loh, Zawn domh ruahnak bia deuh sawhsawh si. Deu 6:4 nak ah JEHOVAH, timi BAWIPA hi Pathian a si a ti caah, sertu hi Pathian ti in a tialnak si ko.

JEHOVAH nih fimnak in vulei hi a dirh i theihthiamnak in van khi a fehter. (Pro 3:19) a ti caah, Sertu cu BAWIPA Pathian a si ti a fiang bak ko. Kan zoh fian dingmi Phungthlukbia chungah a biapi deuh mi biafang paoh cafang ngan
mi in kan i chinchiah tuah lai. 22. JEHOVAH nih, hram a thok lio le rian a tuan hlan ah A KA NGEIH diam cang. 23. FEHTER Ka si. 24-26 . Ka rak CHUAK diam cang. 27-29 . Van hna timhtuah a si lio ah KA UM cang. 30. A PAWNG ah ka rak UM. 31. A sermi Umnak Vawlei le Minung hna nih an KA lomhter chin, Fimnak cawnnak mit i zoh loin, Doctrine mit in kan zoh lai caah, Jesuh hi Zungzal Fapa, (Son The God- Fapa Pathian) cu maw a rak si? (Son of Man/Son of God) Mi fapa, Pathian fapa deuh dah a rak si. ti in, Mah Solomon phungthlukbia nih hin, Trinity doctrine a dik tinak zeihmanh a langhter lo.

Cang 22 nak ah Jehovah nih Fapa cu a rak ngeih diam cang nak a chim i, Cang 24,25 nak ah ka rak chuak diam cang, a ti caah Fapa dirhmun ah Jehovah nih a rak ngeih diam cangmi a si, tinak a si. Cucu, Cang 23 nak ah Zungzal in fehter a si nak aa chim, A si ah cun, zeihmanh ser a si hlan ah Jesuh cu Pathian nih fapa ah a rak i ngeih cang maw? a rak chuak cang maw? Fehter chom a haumi dirhmun cu Pathian ca ah zei dah hau? Pathian cu Pathian dirhmun ah fehter chom a hau chap ti maw? Pa Pathian nih Fapa Pathian i um ding in fehter cu Zeidah a herhnak um?

Cang 26,27 nak ah zeihmanh an um hlan, timhtuah an rak si lio ah khan KA UM CANG a ti. Zeihmanh an um hlan ah minung zong Kan um hlan ah Fapa Pathian (Son The God) dirhmun i rak um cu Pathian caah a herh maw? Cang 28,29 le Cang 30 ah cun, Jehovah nih Van le Vulei rili le khuadawm hna a rak ser lio ah khan zung a thiammi ka si caah KAA TEL ve, KA RAK BAWMH ve ti lo in, zung a thiammi bangin, A PAWNG ah ka rak um. a ti.

Laimi nih lai holh i tialmi lai Baibal te Kan rel le, lai fa Kan lung a piang kho lomi hi, Laimi bia el huam a chuahtertu Kan si ko rua. A riantuannak ah kaa tel, a riantuan ka bawmh ti le, Kan tuanti ti te hna hi, a riantuannak pawng ah ka um. timi he cun , aa khat ko Kan ti kho hnga maw? An ser ti, an tuanti, Kan ti kho hnga maw? Cang 31 nak ah, Umnak ding i A sermi Vawlei nih A ka lawmhter, tiah, fiang tein a chim ko cu teh. Hodah Jesuh cu na lih titu um? Hodah Phungthlukbia tialtu Solomon cu na lih ti ngamtu um? Bible leh an i palh ti phun in maw Kan I lak than ne hna lai?

BAWIPA (JEHOVAH) nih Vawlei a ser i, hodah aa lawm? Kan ser i, kan ser ti i, Aa lawm, kaa lawm ti a si loh khih! A ser i, cu nih cun A ka lawmhter, titu si. Cucaah mah Solomon phungthlukbia tialmi 8:22-31 nih hin Trinity doctrine fianternak tuah lo in, Pathian pakhat, Oneness doctrine tu kha fiannak a langhter deuh. Doctrine mit in, Kan ti cang kha mu!

Oneness doctrine he cun, Cang 22, 23 nak ah, Jehovah nih rian a tuan hlanah A KA NGEIH DIAM cang. A sullam cu; BAWIPA (JEHOVAH) nih sernak rian a tuan hlan ah a ka ngeih diam cang, ticu Pa nih rian a tuan hlan ah Fa in a ka ngeih diam cang. tinak si.

Aho nih dah chim, Jesuh nih, Zeitindah Fa in a rak ka ngeih diam cang ticu a chim khawh? Cang 23 nak ah FEHTER, ka rak si. a ti. Zeiti fehter dah a chim? Ngaknu thiang Mary nih a hrin te lai nak ding kha zeihmanh ser a si hlan in BAWIPA nih fehternak a rak tuah diam cang. Cucu, Cang 24,25 nak ahcun a chuah hmanh ka rak chuak diam cang, a ti.
Zeihmanh ser si hlan i rak chuak diam cang ti cu, zei dah a sullam si hnga? Profet bia hna ah mah bantuk bia cu a um ve hnga maw?

Isa 9:6; Kan caah Ngakchia a chuak, timi hi, Isaiah nih BC 740-680 hrawng karlak ah a rak tial ve i, Jesuh tucu a chuak rih loh, (BC le AD thentu ding ah a chuak te dingmi lawng a si.) sicun, zei bia dah si kun? Profet bia, a tling te lai dingmi chim chung bia timi kha lung a piang.

Tahchunhnak ah; Bia 13:8; Vawlei serka i thahmi Tufa Nunnak cauk i, timi zong hi, Jesuh cu Vawlei serka ahcun maw an rak thah? Naisaihlah, AD 33 – 36 hrawng ah pei thah a si ko cu, sicun, Bible tial an I palh maw? Si lo ah, a chimtu Johan tu hlah maw ai palh le si hnga? Maw, Bible leh dara an i palh hoi? Efe 1:4; Vawlei hramthok hlan in amah ah dawtnak in a Kan thim bangin, timi zong hi, Minung hmasa bik Adam cu van le Vawlei ser a si hnu ah sermi a si tiah Bible nih a tial. (Gen 2:7)

Sicun, zeitindah Pathian nih minung cu Vawlei hramthok hlan ah cun a rak kan thim khawh zia? Hodah chuak ? Hodah um? Zeihmanh um lomi cu hodah thim thiam? Cucaah Bible nihcun mah tihin a tial chap rih, Jhn 7:24, A langh ning lawng in ceih hlah u, dik le fel tein ceih ngat u. a ti. Cang 26,27 nak nih Van le Vawlei ser hlan timhtuah an rak si lio ah KA UM cang, a ti. Jesuh hi, zeihmanh ser an si hlan ah Pathian nih Van le Vawlei ser kong timhtuahnak a rak ngeih lio tein Fapa ah a rak umter cang i, a rak chuahter cang i, a rak fehter diam cang.

A sullam cu, Van le Vawlei ka ser lai, a chung ummi thil zeizong vialte ka ser hna lai i, Cun, minung zong kha ka ser lai i, ka sermi minung cu Satan ruang ah sual i an tluk tikah, a thiangmi Fa, Minu chung chuak, Mi Fapa, ti le Pathian Fapa tiah ti a si mi Nazareth Jesuh khrih in, ka kawl than hna lai i, ka tlanh than hna lai i, ka khamh than hna lai, tihi , minung Kan um hlanpi ah Pathian nih Fapa a rak umter cangnak cu a si i, Thi le Sa Minung pum in a rak um rih lomi, Cu a Fapa ahcun Ser le hrin a si rih lomi kan nih hi a rak Kan thim ve cang, Amen.(Efe 1:4)

Cucaah, zeihmanh ser a si hlan timhtuahnak lawng a rak um lio ah khan timhtuahmi chungah minung Kan rak i tel ve i, Jesuh khrih , mi Fapa zong hi a rak fehter diam ve cang . tinak tu a si. Cucu, Cang 28,29, le 30 nak ah, Van le Vawlei hram a bunh lio le Rili le khuadawm hna a ser lio ah khan A PAWNG te ah ka rak um. a ti.

Mahka zawn i, a pawngte ah ka rak um, ka rak chuak diam cang, fehter ka si cang, titu hi Trinity Kan hawi le nih (Person) Mi dang dang in, Pa le Fa an um cangnak a si rua , an ti rua, ka ti hoi le, an ti taktak sual ahcun,
A si loh, tihi, Bible biatak in leh ka duh hna.

Bible tu nihcun; Jhn 1:1; Vawlei hi ser a rak si hlanah Bia cu a rak um cang; Cu Bia cu Pathian sinah a rak um i,
Cu Bia cu Pathian a si. A hramthok tein Bia cu Pathian he cun an um ti. Wycliffe, In the beginning was the word, and the word was at God, and God was the word. A hramthok ah Bia a um, Bia cu Pathian ah a um, Pathian cu Bia a si. a ti.

Mah Bible cacang i Bia timi hi, Minung i aa can hlan chung paohpaoh cu Fapa ti phung si bal lo. Fapa Pathian (Son The God) ti zong a Ngah loh. Bia cu Bia, a si ko. the word was God. Cu Bia cu Pathian a si a ti ko, the word was Son The God, Cu bia cu Fapa Pathian a si, an ti bal loh. Mary nih a pawimi le a hrinmi Naute kha, Pathian nih a hramthok tein a rak i ngeih ciami Fapa Pathian (Son The God) kha a si naisai loh,

Ngaknu thiang, voikhat te hmanh Pa he a it ti bal lomi Ngaknu a si ko nain, Pathian khuakhan le lairel ning tein, Thi le Sa in Nau a pawi i, cu Naute cu Immanuel, Pathian Kan sin i a umnak ding, minung Pumsa, a thi khomi Minung , Pathian deu thlam, Pathian umnak inn ti zong a si fawn mi Jesuh khrih kha a si.(Bia 21:3) Pathian umnak (deu thlam) inn ticu thi le sa minung pum kha Pathian aa phuannak, aa langhnak, Pathian, Minung Pumsa i a ratnak ti khi si ko. Cucu Pathian Fapa Jesuh tiah Bible nih a ti lengmang mi cu a si. Cucaah Profet Isaiah nih Khuaruahhar, a rak timi kha a si taktak. (Isa 9:6)

Pathian cu fapa ti phung zong a si loh, Thlarau a simi Pathian cu hohmanh nih an pawi in an hring kho lai lo. Jhn 1:1-14 tiang nih hin, Pathian pakhat ah Mi pathum an um zia le, Cu Mi pathum lakah pakhat cu a ratnak kong kha si loin, Nazareth Jesuh khrih cu, minung ci in hrinmi sawhsawh a si lo zia le, Pathian bak a si ko bu ah, minung i i can te nak ding timhtuahnak felte in Pathian nih a ngeih zia le Pathian hrim hrim Minung ah aa phuannak, aa langhnak, aa cangnak, a si zia kha Johan nih bia hram domhnak ah a hman ning a si.

Cucaah Pro 8:22-31 chung bia hna hi , Van ah Mi pathum hna cu Pathian pakhat an sizia le an rak um ti bal cangnak kong fianternak si lo in, Pathian nih Vawlei a dawt tuk caah fapa ngeihchun a kan pek dingmi Jesuh khrih minung Pumsa cu bia ah fehter in a rak um diam cang titu kha hi Phungthlukbia tialtu Solomon hmang In Pathian nih a bia thli fimnak a phuan chungmi tu a si. A reltu nan dihlak cungah Kan Pathian Jesuh Min in daihnak um ko seh. Pathian cu Thlarau a si. timi le Pathian Thlarau or Jesuh Thlarau le Thiang Thlarau timi hna hi aa khat mi an si maw? Credit: John Fready

Be First to Comment

Leave a Reply

Your email address will not be published. Required fields are marked *