Press "Enter" to skip to content

Biaalnak Le GRCM Admin Hmuhning

Tutan Myanmar Idol cu kumdang nakin a linsa in a turcawl khun ko. A bikin Chin miphun ko nih kan suksak khun I kan lumsatter khun ti usihlaw kan palh tuk theng lai lo dah. Hi tluk in kumdang nakin a lumsat le a vantlang pi tiang nih molh deng in chimceih bikmi ah a vun I chuah hi Chinmi lawngte nih hmunhma kan luah caah ma asi hnga? asi lo ah kan rampi democracy uknak phung chungah hin thancho lei kan panh cang mi hmelchunnak a langhnak pakhat ma asi hnga, timi kong hi biahalnak tuah len tlak leh ruah len tlak in thil hi a hung um.

Tutan Myanmar Idol Season 4 alinsat khun le atur khunnak a ruang bik cu ai zuampi hna pawl cungah ai hngat in ka thei. Tutan Idol an kan zuampiaktu kan fanau le cu season dang I arak I zuam hmasa mi midang nakin a lamkip in mipi a hip kho tu, kong ceih len awk tlak le mipi nih molh lak deng in uar tlak tiangin an performance arak tha, ti usihlaw kan palh tuk theng lai lo dah. Minung 50 renglo umnak Myanmar rampi ahhin 1 Million khat tluk lawng asimi Chin miphun thazaang nihhin tii a noih kho tuk lai lo, Benjamin Sum le Esther Dawt Chin Sung hna i an aw zai le thiamnak nihhin mipi a hip hna I cu nihcun Chin miphun min a vun langhter (thatter) ca tu ah asi deuh ti khawh asi men lai dah. An thiam ve hrimhrim caah le season dang nakin mi an hip khawh deuh cu caah asi ko rua.

Global Rawn Chin Media Group I Falam Le Hakha Biaalhnialnak Kong Ah

Pupa holh nak hmanh ah “lei le dang hmanh ai seh” ti asi i minung kan nunnak ah rualrem tein um khawh zungzal asi thlu lem tawn lo. A ngaingai lo ahcun Falam le Hakha cu ai daw cem, ai naih cem le harnak caan kan phak tikah ai au kanh le ai bawmchan cem mi kan si thiamthiam ko.

Dr. Andrew Ngun Cung Lian nihcun Hakha le Falam cu uite bantuk kan si, ati. A chim than mi cu “uite cu anmah pahnih lawng an um ahcun anmah le anmah an I seh lengmang nain khuadang/hmundang in uite dang a vun rattik ahcun an tangti i cu khuadang uite cu an rak seh ti” a ti.

Nikhat cu Sayamahnu nih ka hawipa kha “Chuma kadua nai cu apiangthar an ti le kan rak i lawmh he cuti na tluk than e?” tiah a vun ti. Chuma nihcun ai thawh i”Sayamah vei aw… thil sual kan vun tuah, thil hna kan vun fir, mi he hna kan vun I vuak I zuu le saa he rumro in kan vun I ciah I sual kan vun I chir ahkhin dawh, sual chir ding a tamtuk le khi ahkhin dawh vun pianthar than ahkhin atak tuk cang cu” a ti le Sayamahnu cu holh awk a thei bak lo.

Bia vun I al pah, i thangthat pah le khuachel ahcun faktuk loin i velh pahhin dawh lung cu a fim khun tak tawn ve cuh. Nai ah Falam kan nau nute kha “Ziah cuti rumro cu bia cu na ka al?” tiah ka hal i,”Ka u vei aw, umharphen ahdawh kan al ko cu khuachel ahhin cun biaal zong hi a nuam ve cuh” a ka ti le asi tak ngai ka ti.

GRCM nih Falam le Hakha biaalnak hi nan zoh sawh hna, tiah an kan ti lengmang. A cung i kan tial cang bang khan lei le dang hmanh cu dawh ai seh khawh cu, vai seh len hmanh usihlaw kan i daw thiam ko harnak chungah kan i zaam tak bak lo i kan i hnakkartenh thiamthiam ko. Faktuk in ruah len tlak ah kan ruah lo, hi bantuk tete nihhin hmailai kan zalam tluan ah hmuh fian nak a kan petu thil hman asi deuh lai timi hi kan zumh.

Asinain nan duhduh in catial u, tinak cu a si ve hlei fawn lo. Miphun huatnak le minhlir bakin soiselnak nan tuahmi cabia cu aho ho ti loin delete colh zungzal asi ko lai. Admin lei nih cuti pi in kan ruat lo hi biaalnak hi, asinain a chung leiin fak piin control cu kan tuah ko.

Esther Dawt Chin Sung Le Benjamin Sum Caah Thlacaam Thazaang Chuahrih Ko Hna Usih

Myanmar ram pumpi ah hlasak thiambik 3 an thim mi chungah Chinmi minung 2 an i tel kho, Pathian nih kan temtuarnak le thlacaamnak a kan leh i Myanmar le vawleicungpi hmai ah Chinmi a lamkip in cawisan a kan timh ve cang, cu cawisan a kan timhnak thluachuah a rel zia cu thiam hna usihlaw, phawrhlawtnak, ruamkainak le biaalnak caah si loin amah lianngannak le sunparnak caah hmang chinchin ko hna usih.

Atang mi Grand Final zongah thazaang chuah rih hna usihlaw kan ti thawhtawk cio thazaang in siseh, phaisa in siseh, thlacaamnak le thazaang peknak zongin a lamkip in thazaang chuah rih ko hna usih.

Lunglamhnak tampi he,
GRCM Admin

Be First to Comment

Leave a Reply

Your email address will not be published. Required fields are marked *