Press "Enter" to skip to content

Esther Dawt Chin Sung Nih Zungzal Tiang Hmun Ko Seh Timi Hla A Saknak Hi Rak Ngai Ve Hmanh (Video)

Hlasak thiam muidawh Nungak Esther Dawt Chin Sung nih “Zungzal Tiang Hmun Ko Seh” timi hlathar a sak mi hi rak ngai ve hmanh thiam kho taktak. A phuahtu hi Herh Lian a si i, lemcang tu hna hi, a mah Esther Dawt Chin Sung le Thomas an si. A hla zong a phuah thiam pin ah a satu zong a thiam hlei ah zukcawl zong an thiam kho taktak.

A tanglei ah an hla hi rak ngai ve hmanh.

Lai Tlangval le Mikei
**************************
A hlan lio ah khua pakhat ah nungak tlangval aa duh ngaimi an rak um. Tlangval pa cu sal phun a si i nungak nu cu bawi phun a si. An rak i duh tuk nain ngaknu a nu le a pa nih tlangval pa kha an duh lo tuk caah an khen hna. Ngaknu cu a nu le a pa nih i tong kho hna hlah seh tiah innchung ah an hrenhkhumh. Ngaknu nih cun a thlite in an vampang kha a vih. Tlangvalpa nih a thlite in khoika tal ah ka tong kho hnga maw a ti i an inn cu a hel lengmang. Voi khat cu ngaknu nih a vihmi kha a hei hmuh i cuticun a chung le a leng in an i leng lengmang.

Cuti an i len kha a nu le a pa nih an hngalh hna i nungaknu kha lo ah an riahter i rawl tu a chanh in an va chanh tawn. Caan saupi i tong lo in an um. Lo an riahter kha tlangval pa nih a theih tikah lo lam an tlung dih cang lai a ti Hrawngah khin lo lei ah cun a va kal. Lo phanh lai bo khin a kui i ngaknu nih cun a rak kuih ve. Lo cu a va phan i nuam ngai in caan an hmang. Zinglei arkhuang hrawng khin tlangval pa cu inn lei ah a tlung tawn, Cuticun caan saupi a thlite in an i tong lengmang.

Voi khat cu khati an i len kha mikei pa nih a theih. Zanlei sang tuan nawn ah khin an lo lu cun Lai tlangval pa nih a kuih tawn ningte in a hei kuih ve. Ngaknu nih cun a tlangval pa aw a si lo kha a hngalh i a hodah a si hnga a ti lio ah khin mikei pa cu a ra phan. Ngaknu nih cun a ṭih tuk ko nain zei aa hlei ti lo. Mikei pa nih parthlaam cungah kaipi a tuai len. Cu tlawmpal ah cun a tlangval pa cu lo lu in a rung kui. Zeihmanh nih a chawn ti lo. Tlangval pa cu a khuaruah a har tuk, a kui molh len nain zei nih a chawn hlei ti lo. A lung a hring i a thlite in thlam cu a fuh. Thlamchung ah cun i tuai thawng le ai thawng, nih thawng tibantuk a theih lengmang tikah a thlite in a hei bih hna. Mikeipa nih a nungak a rak tuai len kha a hmuh. Zan thlapa van liote khi a si. Sau nawn a rauh ah khin thi dor bantuk khi tlangval pa hmai ah cun a rung tla.

Tlangval pa nih cun, thlapa vannak ah a hei zoh i thi a si kha a hmuh. A seh ko hi ta a ti i, hlei kha a thlite in a ngel i a tangah fei a do. Mikeipa nih cun ngaknu cu a liang cungah aa chuanh. “huhuih, huhuih..” tiin hlei ah cun a run ṭumpi. Hlei nih cun a kiahpi i an pahnih cun an tla. Mikei pa cu a fei nih a rak sawh i cawl a vun i timh lio ah khin tlangval pa nih a hngawng a pheh colh.

Thlangval pa nih mikei pa lu le ngaknu lu cu a tan hna i inn lei ah a tlunpi. Ngaknu inn a va phak ah cun ngaknu a nu le a pa cu an rak it diam cang. Innka kingh, ngaknu a nu le a pa nih cun, “Adodah na si, zantlai hnu ah?” an ti. Tlangval pa nih cun, “Keimah ka si, innka rak ka hunh uh,” a ti hna. “Zantlai hnu ah cun kan in hung lai lo, va ṭin ko,” an ti. Tlangval nih cun, “Rak ka hunh ko uh, a herh tukmi a si,” a ti len ko hna nain an hunh duh lo. Tlangval pa nih cun, “Nan fanu kha mikei nih a seh i ka run tlunpi,” a ti len hna zongah an zum hlei lo. Lo kan riahtermi cu a thei bal lai lo, an ti i an hung duh hlei lo.

Tlangval pa nih cun, “Nan ka hunh duh lo le thaizing zingkate ah nan innka chak le thlang rak zoh te uh,” a ti ta hna i tlangval pa cu an inn ah a ṭin. A thaizing cu an tho i an innka chak le thlang cu an zoh tikah an fanu lu le mikei pa lu cu an hmuh. An i ngaichih tuk i tlangval pa cu ngaihthiam an hal len. Tlangval pa nih cun a caan a um lio ah nan ka duh ti lo, atu cu a caan a si ti lo, a ti i a chawn duh ti hna lo.
…………………………………………………………………………………………..
Hawidawt hna, kan pi le pu hna tuanbia hi sullawm a ngei ngaimi an si caah an phuahnak a sullam thate ruat buin rel tawn hna usih.

Be First to Comment

Leave a Reply

Your email address will not be published. Required fields are marked *