Press "Enter" to skip to content

CNF/A Kongah “Tuah Kanherh Ko II” Peng Hlawnceu Capar Rel Phu Taktak A Si

Chin dothlennak (CNA) cu 1988 kum in aa thok tiah a foinak in kan chimkhawh. Hi 1989 aa thawk in 1998 tiangah CNA riantuannak le an cawlcangh ning cu mipi nih rak tihzah le upat ansi lawng silo in a bo zong rak bochan ngai ansi. Curuang ahcun CNA ah pasaltha lawng chimlo Chin ram in nusaltha tampi nih ram le miphun ca tiah an i pe hna i ram rian an tuan. Thihnak le nunnak karah, harnak le temhinnak karah, tihnak le phannak karah pa zaran nih tluklo in ramrian antuan. Cu rian cu kum 31 a kal cang i nihin ah Kawl ralkap he kahdaihnak anser tikah ruahchannak le i lunghmuihnak khatlei in mipi ruahnak a pial i Kawl te le Arakan hna thui chukcho dingah kan i chuah.
Image may contain: 1 person

Hriamtlaih in dothlennak a tuah ve ko mi sinak lakah nehsawhbik le zei rello bikmi ah kan i chuah. Kawl ralkap nih an duh paoh in kan hmunkhuar cia ah biakam lawnh in an rak lut. Kan ram le miphun nih harnak an temtuar cuahmah lioah thli lawng kan thlah i tuahsernak ah hnu kanchit. Kan i chimphetnak caah hriamnam thazang kan ngeilo, Phaisa tyazang kan ngeilo, hriamnam laknak kan ngeilo, mipi harnak tawn ding kan duhlo, kanram buainak cu Cabuaicung biadohnak in kanduh kanti. Ruah ah a hmanmi alo nain a hmanloh.

Dothlennak tuahding in hriamnam kan tlaih cang mi cu hriamnam in chimphoih lo a ngah tilo caah kan tlaihmi kha asi ko caah hriamnam in chimphoih khawh kha i zuamding kan siko lomaw. Wah pawl sining kan zoh tikah hriamnam an thawn ruangah nihin cu a zalen mi ram bantuk in an umkho, Kachin ram zongah an duhmi raltha tein an detngam hna i tulio Arakan buainak zong hi a rauh hlanah Kawl nih hmaizah nak he chawhbiaknak le ceihmainak he kar an hlang kho te lai.

Kannih Chin mi teh kum 31 hriam kan tlaih cang mi dothlennak ah kan ral Kawl nih zeitluk dah a kan tihzah i hmai kan nor khawh? A kan chuah ciami kan ram cu chim rihlo chapchih in kan ramrii, nunphun, Biaknak le nifatin kan cawlcanghnak ah khuhchilh chin lengmang kansi. Ziah cabuaicung biaral dohnak in kan chimphoih ding asi ko ahcun kan putmi Hriamnam khi kan chiah lawlaw kolo? Kan chiahduh tunglo ahcun kan tlaih hnawhmi hriamnam cu ttihzah awk tlak le hmaizah awk tlak in kan hman lawlaw kunlo. Cutin kan hmanngamlo i kan tlah ngamlo pinah a tuah ngamlo mi le a ti ngamlo mi nih nawlngeihnak le dirhmun sang ah um cu kan duh rih?

Cucahcun kan dothlennak hi a lamthluan kan i fian a hau i kan sining zong kan i thlek a hau. Cabuaicung biaruahnak bak kanti ahcun kan hriamnam khi chiah ding asi ko, kan chiahduh tunglo ahcun UWSA, KIA le AA lamthluan khi a zulding le aa hmuitinh ding kan siko, midang bawinak ciangto kan i timhding asi lo. Mipi nih an kan dirpi lo, an kan telpilo timi cu kan tuah hmasat le kan langhter hmasat lo ahcun zei cudah mipi nih cun a kan dirpi lai i a kan ttan lai. Kan zulhmi le kan tuahmi ruangah tuanbia nih a kan sawh ding kan silo a biapi.

Credit: peng hlawnceu

Be First to Comment

Leave a Reply

Your email address will not be published. Required fields are marked *