Press "Enter" to skip to content

Cambodia Pa Le Tial Cung Thang Cu March 8 Ah An I Thua Cang La

awk Tling Thang| 2019 March 3| World Champion si khawhnak ding aa hmuitinhmi Tial Cung Thang cu Cambodia pa he i thua ding in March 2 ah Yangon a phan cang. Hi zan ah one championship-MMA an i thuat dingmi puai 14 chung ah Myanmar rammi pa pahnih le nu pakhat an i tel.

Tial Cung Thang le Camboadia pa Rin Saroth cu March 8, Yangon, Thuwana Indoor Stadium ah zan suimilam 6:00 ah an i thua cang lai.

US ah a ummi Tial Cung Thang cu MMA ah i thong ding in a rak tlung i March 2 ah a hawipa Chas Kelly he damte in Yangon an phan cang. All Chin Society, Lai Chiat/thatbu, Rual U, Hakha Hrihhruai le Rev. Biak Tin Sang a siangngakchia hna nih Yangon vanlawng tual donnak in sunglawi ngai in an don.

Tial Cung Thang nih “keimah he aa thong dingmi Rin Saroth cu round 2 hlan ah ka tei lai” tiah a chim. Cambodia pa he an i thuatnak ding ah 5 lawng aa duh cang.

March 8 zan ahhin Myanmar rammi Tial Cung Thang, Phoe Thaw le Bozhena Antoniyar an i thua lai. Phoe Thaw hi Indonesia pa Yohan Mulia Legowo he Featherweight level in an i thua lai i Myanmar ramnu Bozhena Antoniyar le Malaysia nu Audreylaura Boniface hi Atomweight level in an i thua ve lai. Tial Cung Thang le Rin Saroth hi Catch weight (68,0KG) level in an i thua lai.

Mah zan ahhin ramkip in puai 14 an i thua lai. Puai 3nak ah Bozhena Antoniyar, puai 8nak ah Tial Cung Thang le puai 13nak ah Phoe Thaw aa thua te lai.

Tial Cung Thang hi One Championship- MMA ah a hmasa bik aa thuat a si lai. Rin Saroth hi One Championship-MMA ah voi 5 aa thua cang i voihnih lawng teinak a hmu i voithum a sung. Rin Saroth hi kum 25 a si i pe 5.6 a sang. A khing hi pound 143 fai a si. Anmah Cambodia ram ah voi 110 aa thua cang i voi 22 teinak a hmu.

“MMA i ka luhnak a ruang bik cu World Champion si duh ruah asi ko. Atu tan kaa timh tuahning hi a tha ngai ko. Ka family kaltak in khua dang ah training ka la. Zing he zan he training tuah zungzal asi, cun ka cinhti mi pawl hi minthang le Pa Thawng lawngte an si. Anmah pawl he ka cinh zungzal tikah tampi zumhngamhnak (confident) a ka ngeihter. Dam tein ka Biak mi ka Pathian nih a ka umpi lai i teinak zong ah ka Pek ko lai tiah ka zumh. Ka vuikhatnak asi lai i Chin miphun ka unau nan thlacampiak le nan thapeknak ka herh tuk” tiah Tial Cung Thang nih The Chinland Post ah a chim.

Tial Cung Thang hi Bantamweight ah aa thua lai i caan khatkhat cun World Champion laksawng a co khotu a si te lai ti a zumhnak kong Aung La Nsang nih a chim. Cu lawng si lo in amah Aung La Nsang pumpak hrimhrim zong nih thuat a cawnpi.

Tial Cung Thang hi USA wrestling i thuatnak New York State championship voihnih a co bal cang. Cu pin ah BJJ Brazilian Jujitsu ah blue taisawm zong a rak co bal cang. Cun, Lai paih zong ah vui 5 bual a co bal cang.

Tial Cung Thang a chuahkehnak cu Hakha Khuathar a si. A nu le a pa hi Pu Tawk Cem le Pi mang Si an si. Unau chuakti khat pali an si i far pathum a ngei, amah lawng hi pa a si. 2005 kum ah Malaysia a phan. Cun, 2007 ah Syracuse, New York, USA ah an chunglingte in an phan. Hika ah high school zong a dih tiah kan theih. Tiah thechinlandpost.info nih a langhter.

Be First to Comment

Leave a Reply

Your email address will not be published. Required fields are marked *