Kum 29 mi tlangval pakhat “Jose Miler” timi pa cu a chungkhar he hmunkhat um ti lo in a mah dangte in khualeng lei deuh ah inn ai hlan i rian tuan pah in khu a sa ve .A mah lawng khuasa a si caah komhding dang a ngei lo i umhar phen ah ti in uico pakhat ai cawk i cu a ui he cun an i kom deuh tawn .A mah hi satil a tlaihchan mi a si i a ui he an um ah cun hawikom dang zongn a hlam lem hna lo . A ui zong nih cun a tlaihchan i an pahnih cun nuam ngai in umhar hmanh theilo in an i kom tawn . Nikhat ahb Jose Miler cu a riantuan nak in a rak ttin i voidang i inn a ttin can ah a rak lawm tawntu a ui nih cun a lawm ti lo . A theih hmanh a theilo mi ko khi a lo i a umdang ai phundang ngai ngai .
A pu Miler nih cun ziah ka ui hi voidang a lo ruam lo ee a ti i a auh zong ah a ui nih cun a zoh zong a zoh lo i vampang lei cu a zoh peng i a pu nih zeitluk a auh len zong ah a pu cu a zoh zongn a zoh bak lo . Miler nih cun ka ui hi riantuan ka kal kar ah a hna a rak chet diam i si hnga maw tiah a khuaruah a har ngai ve .Miler cu a ui umtu ning a zoh ah cun a lungdong tuk i a va fuh i a ui nih vampang lei a zoh mi cu a mit in zoh pah in zeitin hme na si ka kawi tiah a ui cu a chawnh .A ui nih cun a pu cu a van zoh ve i a sinan a pu nih cun ramnung pakhat khat a zoh mi a si ko lai tiah a ngeihven lem ti lo .Cuhnu ah cun a ui zong cu a hlan bantuk te in a um than ko i a pu he cun an i kawm than . Asinain cuzan ah cun an it i zanlai ah Miler cu a ti hal tuk i a tho i coka lei ah ti din dingin a va kal .
Cu ah cun a ui cu a hmuh than i zanlei i a zohmi vampang lei ah cun mit thep lo tein a rak zoh peng than . Zanlei i a umdan nak in ai phundang deuh cang i a uico mithmai ah cun ngeihchiat nak muihmai zong a lang .Mi ralchia deuh caah cun a uico umtu dan cu muithla a hmuh i a si lai tiah ruah i zam zong a fawi te nain , pasal tha a si i a mah lawng hmanh a um ngam vemi a si caah tihnak pakhat te hmanh ngeilo in a uico nih hin zeiruang ah dah hi vampang lei lawngte hi a zoh pengnak a ruang a si hnga timi cu theihkhawh aa zuam ve cang .Cuzan cu a it phawt i a thaizing zingka te ahb a tho i dawr ah a ran nak in a va kal i camera tha taktak a va cawk i a uico nih a zoh peng nak vampang lei lang kho ding cun a camera cawkmi cu a chiah i a record .
Cuhnu ah cun a riantuan nak lei ah cun ai thawh than i zanlei a rak lawi hnu zong ah a camera cu a zoh duh bak lo i cansau deuh chung um rih sehlaw thil sining vialte lang dih seh ti a duh caah a thaizing lawng ah a camera chiahmi cu a lak i a zoh .A camera a van zoh bak cun a thil hmuhmi nih cun a lau ter taktak . Miler riantuan a kal kar ah hin a uico nih hin vampang lei hi a zoh bal lo i Miler rian in a rak lawi hnu lawng ah a ran nak in a zoh tawnmi vampang cu a rak zoh tawn timi cu a hmuh . Asullam cu a uico nih hin a pu hi thil pakhat khat theihter le chimh a duh timi cu fiang tein theih khawh a si .
Miler nih cun a ran nak in a uico nih a zoh lengmang nak vampang cu a mah kut i tlum dingin a pemh i a kut cu a hrolh i zeidah a um hnga tiah a kut cun a dat chih . A kut nih cun a nem nawm mi thil pakhat a tongh i a van lak tik ah cun chizawh fate a rak si . Hi chizawh hi cansaupi chung hi ka vampang chung ah hin a rak tang cang ti theih khawh a si i , biahalnak cu zeiruang ah dah hi chizawh hi mah ka vampang chung ah hin a tan ning a si hnga ? A pi teh khawika dah a um hnga ?timi a si .
Chizawh fate a lakmi cu a hnawm tuk i a hmasa bik ah ti in a kholh , a uico nih cun a pu hmai ah cun kai lawmtuk ti bantuk mithmai he cun a rak citmuai len ve . Chizawh fate cu a kholh hnu ah cun a umnak innpa ah a va kal i nan chizawh a si maw tiah a hal thluahmah hna i a hohmanh nih kan mah chizawh a si an rak ti lo .
Chizawh fate cu Miler nih cun a ngandam nak hna a tha lo sual hnga maw tiah satil pawl sizung ah a va kalpi i an check tik ah damlo nak pakhat hmanh a ngei lo . A ngeitu nih chinchiah nak ah a hngawng ah pakhat khat an tuahmi a um hnga maw tiah a zoh zong ah a um fawn lo .Chizawh hmanthlak cu online ah a tar i a ngeitu nih rak hlam dingin ca a tial chih nain mizei hmanh nih an rak hlam fawn lo .
A donghnak ah cun cu chizawh te cu ai ken i chizawh zuatnak hmun ah a va pek hna . Asinain chizawh zuatu zong nih cun a tu ah cun chizawh 300 bak kan zua i chizawhb dang cu kan cohlang rih lo , khuachung ah thlah law a mah umduh ning in um seh law ai nuam deuh lai an rak ti . Asinain Miler nih cun khuachung i thlah sawhsawh cu a siang ve fawn lo i innlei ah cun a lawipi than .Inn a phak cun a ui cu a rak i lawmtuk i chizawh he cun an i kawm i umhar zong a thei ti lo . Cuti cun Miler he a ui he chizawh he cun nuam tein midang vanhai lo tein an um hna .
Hi uico nih hin a pu Miler sin ah vampang lei zoh peng lo in rak um sehlaw chizawh te nunnak hi a chanh kho hnga lo . Holh a thamlo mi uico hmanh nih an sikhawh chungin midang nunnak chanh nak ding ah an mithmai le an tikhawhnak lam in an langhter i midang nunnak an chanh khawh timi a langhter tu le minung cazong ah fimchimtu ngaingai a si . Source : Dailymail
Leave a Reply