Press "Enter" to skip to content

Pastor David Lah Tonmi Thil In Ralrin Le Fimchimtu Thil Hna!

Pastorh David Lah Tonmi thil in Ralrin le Fimchimtu thil hna (lessons from Ptr David Lah’s Arrest)
==========================

PART-1: Khrih ah kan unau a simi Pastor David Lah (DL) an tlaih, thircincik an khih i biaceihzung (court) i an luhchuahpi hmuh tikah lung a faak in ngaih a chia tuk hringhran. A cung i a tlungmi thil hi a vanchia kan ti lai maw, asiloah Pathian lamsial piakmi kan ti hnga thla! Covid 19 a hung chuahlio theng i Myanmar i a rak tlun, “Baibal ning i a nungmi hna le zumhnak a thawngmi hna cu hi zawtnak nih a tlunh hrimhrim hna lai lo” tiah mi tampi theih i a chim tlawmpal ah amah le pumhkhomhnak i ai telmi minung sinin minung 80 reng lo nih zawtnak an ngeih caah zumlotu tampi nih an van huat i hlan i phungki pawl hna a rak challange nak video tete hna an van phorh piak mi….! A thil tonmi chungin fimchimtu le ralrin ding tete hna cu,

(1). Myanmar ramchung ah tlangcung mi le khrihfa mi hna nih nuhrin covo (rights) kan ngeih loning le kan him loning fiang tein a lang. Zeicahtiah, Myanmar cu Kawl paoh nih cun kanmah Buddhist ram tiah an i ruah. Kanmah Laimi hmanh nih “Kawlram” tiah kan auh hi mu. Tlangcungmi le Khrihfa hi cu foreigner deng in an kan zoh bak ko. A faak bak!

(2). Miphun le biaknak in mi tlawmte (minority) kan sinak kawlram hna ah hin cun raltha tuk le daithlang tukin midang biaknak le an phungki pawl hna cu (zapi hmai ah) kan soisel hna ding a si lo. Capo zongah saih ding an si lo. Zeicahtiah, an biaknak soisel tikah ralkap, phungki le mipi nih thih an ngamh dih hna. Cun, an biaknak soisel ruangah an piangthar hlei fawn lo. Jesuh Khrih thawngtha chimnak le miracles an hmuhnak tu nih zumtu ah a ser deuh ko hna.

(3). No. 2nak he pehtlai in ram dang i khua a sami hna zong nih nan rak tlun caan i phung hna nan chim tikah atu nan umnak ram i freedom le rights nan ngeihnak hmun bantukin kawlram ah biachim le cawlcangh a ngah lo ti zong theih a herh. “Myanmar is a unique country” tihi philh hna hlah u sih. Cu bantukin, ahoho kan si zongah mi zapi hmai i bia kan chim tikah minung pakhatkhat min maw, chungkhar min maw, khrihfabu min maw, khua le ram min langhter in capo saih te hna, soisel te hna, zei rello i an kong chim te hna cu kan hrial awk hrimhrim a si. Credit: CK Tiam

Peh than ding….

Be First to Comment

Leave a Reply

Your email address will not be published. Required fields are marked *