Press "Enter" to skip to content

Khrihfa A Si Mi Nih Kan Buai Ngaingai Mi MITHLA TI MI HI A UM MAW? Ti Mi Cu Fiang taktak In Rel Khawh A Si

Mi “Mithla” hi Laimi acheu nihcun “mutla” tiah nan ti. Asinain minung i a thla (thlarau) kha chim duhmi asi caah “mithla” timi hi ahmanhmi Lai holh asi. Zeicatiah mutla kan ti ah cu “mu” i a “thla” kha a si hnga i mupi thla tinak kha asi hnga.
Image result for ghost

Laimi ahhin 99% nihcun mithla a um hi kan zumh ttheu hna lai. Laimi nih kan ttih bikmi cu mitla hi a si ti uhsihlaw kan palh lai lo. Kan ram ah cakei ttih ding an um ti lo. Damiah ttih ding an um ti lo. Asinain mithla ruangah Laimi hi lungrethei le awlawkchong i kan um caan hi a tam cang. Mi thih zan poh i mah lawng a it ngam lomi kan tam. Zan zunthawh a ngamh lomi kan tam. Khuate lei i siangin cachimh rian a ttuanmi Lainu pawl cu khuatemi nih tthit an duh hna ahcun zan ah an va len hna i mithla kong bak kha an va ruah hna i it ngam lo dingin tuah an i zuam hna an ti. Sayamah cu a ning a tti i zan ah amah lawng a it hngam ti lo tiakah a lengtu tlangval i riah kha a hau tawn i cuticun an i um benh tawn hna e an ti.

Mithla hi ka hmuh bal ko na ti khawh men. A holh thawng ka theih bal ti zongah na ti khawh men. Asinain kei i ka zumhnak cu a palh khomi minung hmuhtonmi le chimrelnak ah hram a bunh mi asi lo i a palh kho lomi Pathian bia (Baibal) ah ai bunh caah mithla a um le um lo cu Baibal in kan zoh hna lai. Zeicatiah Baibal a hman bik.

1. Mithla cu a um. Zeicatiah minung nih thlarau kan ngeih. Minung cu thlarau ngei in ser kan si. Kan taksa a thih hnu ah a nung rih mi cu a thi kho lomi kan thlarau a si. Kan thih tikah kan takpum le kan thlarau cu ai tthen. Cucaah thla (thlarau) kan ngei. Cucaah mithla cu a um.

2. Asinain Laimi nih kan zumh ning bantukin kan thih hlan ah siseh, kan thih hnu ah siseh kan thlarau hi vawlei ah a vaakvai lo. Mi a tthih lo. Mi hnahnawhnak a pe hna lo. Kan thih bakin kan thlarau cu Paradise (Pathian sin) i a kal lo le Hades (hell) ah a kal cawlh. Laimi hna nih kan ruahnak le kan zumhnak bantukin kan thih hnu ah kan thla vawlei ah a vai lo. Luke 16: 19 -31 kan zoh ahcun Lazaruh le mirum pa cu an thi veve. An thla a vai lo. Mirumpa thla (thlarau) cu Hades (hell) ah a kal i Lazaruh thla (thlarau) cu Paradise (Abraham ttang) ah a kal colh ko. Cucaah Laimi nih kan thih hnu ah kan thla a vai ko tiah kan zumhmi hi kan ruahnak sawhsawh a rak si. An rak vai lo.

3. Jesuh kha ti cung i a rak kal lio ah khan “mithla” ah an rak rel ti kha kan Lai Baibal ah kan hmuh. English ahcun “ghost” ah an rel a ti i “mithla” ti siloin “thlarau” ah an rel ti i leh ah a hman deuh hnga. Mithla le thlarau aidannak cu mithla cu minung i an thlarau kha a si. Thlarau tiahcun vanmi zong thlarau an si. Khawchia zong thlarau an si. Minung thlarau zong thlarau an si caah a kawpmi a tam deuh. Zei ava si hmanh ah, Jesuh cu mithla ah an rak rel nain mithla a si lo caah hi Baibal cacang zoh in mithla hi an vaakvai ko tiah kan chimh khawh nak ding a um lo.

4. Jesuh cu thihnak in a thawh tthan hnu ah zultu hna nih mithla ah an rak rel tiah Lai Baibal nih a ti ttthan. Asinain Jesuh nih mithla nih ruh le titsa a ngeih ttung lo, rak ka tong hngat uh tiin kan Lai Baibal ah an leh. Hi zong hi “ghost” ti tthiamtthiam a si i “thlarau” nih ruh le titsa a ngeih ttung lo ti i leh ah a hman deuh fawn hnga. Hi zong hi Jesuh nih minung kan thih hnu ah kan thlarau a vaakvai len ti a chim deuhnak a si lo. Thlarau nih vawlei titsa le ruh an ngeih lonak kha a langh ter duhmi a si.

5. Cucaah careltu hna minung cu thla (thlarau) kan ngei. Asinain kan thih tikah cun kan thlarau cu a vaakvai in mi hnahnawknak a pe hna lo. Mi a va tthih hna lo. Mi ar taw a va sawh lo. Chizawh chungah a lut lo. Hmuh khawhmi pum in ai langh in a vaak lo. Zumtu an si ahcun Jesuh sinah a rannak khawh chungin an kal i zumlotu an si ahcun hremhmun, mirum pa kalnak ah khan an kal cawlh ve ko.

6. Laimi nih mithla kan hmuh kan timi hi lih a si. Ralchiat cang ahcun zeipoh hi mithla ah rel dih a si ko. “Cu nih a hmuh, kha nih a hmuh” timi ah na zumhnak kha hram bunh loin Baibal tuah na zumhnak hram kha bunh cang ding in kan sawm.

7. Laimi Khrihfa ai timi hna i hmun dang le khua dang i a va thimi thla hna na va kawh rihmi khi cu nihchuak zong a si i ngeihchia zong nan si. Thla kawh ahmangmi cu Laiphung biaknak a zulmi nan si i Khrihfa nan si lo.

Cucaah a umlomi hi ttih hna hlah usih. Mithla nih a seh mi minung an um bal lo. Mithla cu a vaakvai in mi a ttih hna lo caah na ttihmi hi mithla a si lo. Na ruahnak le na zumhnak kha na ttihmi a si. Laimi nih phungthlukbia zong kan i ser phah “Ningttih maw a faak deuh hnga, ningzah?” tiah kan ti. Bia dang in chim ahcun “Mithla maw na ttih deuh, ningzah?” ti ding khi a si hnga. Laimi nihcun ningzah kan i thim men lai. A ummi ningzahnak faak nakin vawlei ah a um lomi mithla kan ttih deuh mi hi cu a poi ngaimi a si.

Credit: Aung Myint Thang

 

Be First to Comment

Leave a Reply

Your email address will not be published. Required fields are marked *