January 4 hi Rampi Luat Ni a si setset maw?

By Salai KB Thawng
2019 January 4 hin cun Rampi Luat Ni kum 71 tlinnak a si cang. “Luat” ti mi biafang hi a sunglawi tuk mi a si. Thongtlapa nih suingun chawva tampi nakin thonginn in luat kha a duh deuh mi a si. Hrem mi, uk mi, pen mi, namneh mi, zomhtaih mi le pheu mi sinak in luatnak kan hmuh ni a si tik ah a sunglawi tuk mi a si. Amah belte, cucu zeidah a si, ti kha kan hngalh cio a herh. 

Myanmar ram cu a tlangpi in Mirang le Japan kuttang ah kan rak tla. 1886 kum in Mirang (British) kuttang ah kan rak tla. Hi lio ah ram hruaitu hna nakin Siangakchia le Phungki pawl hi luatnak kan hmuh nakhnga an rak cawlcang deuh ti khawh a si. 1942 kum, Vawlei Ralpi II nak a dih lai ah Myanmar ram cu Japan kuttang ah kan tla ve.

General Aung San nih Mirang sin ah, “Luatnak kan pe u,” tiah a rak hal. “Tlangcungmi he vaa ruah hmasa u,” an rak ti ca ah, Shan, Kachin le Chin kha a rak sawm hna i 1947 January 12 ah Panglong Tonpumhnak le lungtlin minthutnak zong an rak tuah.

A tlangpi in kan ram cu Thi Baw Min an tlaih hnu ah Mirang kuttang ah a tla. 1948 January 4, zinglei suimilam 4:20 ah, “Myanmar ram a luat,” tiah vawleipi theih in thanh a si. Cuticun, kan ram cu Pyidaungsu Thamada Myanmar Naingngantaw (Republic of the Union of Myanmar) tiah auh le thlen a si.

Mi ramdang kut Luatnak Ni in mah ram Ralkap kut ah

Pyidaungsu Thamada Myanmar Naingngantaw cu Parliament Democracy hruai ning phung in kan i hruai lai tiah thanh a rak si. 1947 kum phunghram kha zulh awk ah an ser. 1947 kum phungphai ning in Myanmar ram a pakhatnak President cu Shan miphun Nyaung Shwe Sawbwagyi Sao Shwe Thaik a si. Prime Minister (Vungyigyoke) cu U Nu a si. Parliament Democracy chan 1948-1962 kum tiang hi PM U Nu nih a hruai i President hna hi an min zong a lang huaha lo. A ruang cu 1947 kum phunghram ruang ah a si. Phundang cun, Prime Minister kha nawlngeihnak sang bik pek a si ca ah a si.

             President cu a cung bik ah a um nain, pohma 45/46 ruang ah Cozah uknaklei kong ah nawl a ngei lo. Phundang cun, Prime Minister nawlngeihnak tang ah President cu a um ti khawh a si hnga. 2008 phunghram tu ah cun President kha cung bik ah a um. Cuticun, kan ram cu 1962 kum ah U Ne Win nih  nawlngeihnak a laak i a duhduh in a hruai. Kum 69 renglo mi ramdang kuttang ah si loin mah ram Ralkap kuttang ah kan tla.  Cucaah, vawlei cung ram sifak bik  hna lak ah aa tel ve. 

Tlangcungmi kan ca ah January 4 hi…

Zeiti a va si hmanh ah January 4 cu kanmah le kan umnak cio in kan upat. Kan hngalh camcin i kan tuah zungzal fawn. U Nu le U Ne Win nih caantha an rak i laak riangmang i mi ramdang kut ah chanh si loin anmah kut in rammi cu an kan nawnnok hnu ah an zumhraih mi (tapeh) kut ah chan khat hnu chan khat nawlngeihnak cu an chanh i nihin tiang vawlei cung Ramchung Ralthawh (Civil War) sau bik ram ah kan i tel —kum 70 chung mu.

Cuti asiah, Luatnak Ni (Independence Day) kan ulh-amh mi le kan tuah zungzal mi hi zeibantuk sullam dah a ngeih kun? Mi ramdang kuttang in kan luatnak philhlonak ca lawng ah maw kan hman rih lai? Cozah thar a kai kan ti nain nawlngeihnak taktak cu Ralkap kut thiamthiam ah a um. Cucu pei Tlangcungmi nih kan duh lo i nihin tiang kan kheel cu.

Nihin ah cun Myanmar hi cheuthum ah aa cheu. Ralkap, NLD Cozah le Tlangcungmi tiin kan i cheu. Ralkap le Tlangcungmi karlak ah biachimtu le remdaihnak sertu ah NLD Cozah cu kan i ruahchan hna. Asinain, “Hrang Thio kan nawl, zei hlei lo,” ti mi theo. A bawnbok le mantaat theo ah kan i zi.

Hiti ning in kan ram a kal peng ko ahcun, Zuu sehtu ding ah kan zuat mi Chizawh nih kan Sapherh a fir dih bantuk a si te lai.

Ref: Wikipedia le Nay Twey (Ngahlaing) kha kaa zohchih hna.


Note;Hi Capar hi Salai KB Thawng a facebook timeline ah kan laak mi a si. 

Be the first to comment

Leave a Reply

Your email address will not be published.


*