Chungkhar nucem nih cun an ceiling cung ah minung pakhat a rak um ziar cu a hmuh i a khuaruah a har hringhran .Thil umtu ning hi muithla film i director pawl nih hmuhnuam dingin an phuahchom i a zohtu zong nih tihpah zohduh pah buin an zoh tawnmi bantuk ko khi a lo .Zeitin dah thil umtu ning hi a si rengreng timi cu kan van zoh tuah lai .
An nu bik Tracy hi a pasal umlo in a fale 5 cu a zohkhenh hna i an nufarual cun South Carolina ah khua a sa mi an si i a fale a cawm hna nak ah hin a liamcia mi caan ah thaba ngai le rethei ngai in a um mi a si .A fale upa lei hi cu an upa ngai cang nain an mah ke tein an dir khawh ve rih lo caah hmunkhat ah an zapi tein khua an sa tti hna i phaisa tampi an ngei lo nain chungkhar nuam ngai cu an si ve thiamthiam ko .
Tracy nih cun nikhat cu an inncung ceiling ah cun minung thawngpang a theih i , misual maw mifir pakhat khat an lut i a si hnga maw tiah le a nih hi mi felfai te a si i an kutka le an thlalangawng zong tha tein a hrenh pengmi a si tik ah misual le mifir nih cun luhmanh nak caan zong a ngei ding an si fawn lo tik ah an si lai lo a ti fawn .A fale cu kan inncung ceiling cung ah khin nan i tuai tawn maw ka theihlo in a kaimi nan um bal maw tiah a hal hna i a fale nih cun kan kai bal lo an ti fawn .
Tracy nih cun a fale biachim cu a zumh ve , zeicatiah a fale nih hin a nu hi an hleng bal lo i cupin ah an inncung ceiling hi an hman lo mi a si tik ah a hnawm ngai i a cung ah va kai i lente vai i celh huam nak zong ah an ruahmi a si fawn lo .Cuti cun a thawngpang theihmi zong cu ngeihsaktuk lemlo in a rian ah a buai tak than .Asinain inncung ceiling lei cun thawngpang cu nichiar deuh in a theih than lengmang tik ah a ruahrem kho ti lo .
Nikhat cu an inn a thianhhlimh cuahmah lio ah cun voidang i a theihtawn bantuk cun inncung lei cun thawngpang a theih than i , a ruahmi cu kan inncung ceiling ah hin ramsa Zu, Chizawh maw pakhat khat a rak lut lai i chuahnak thei ti lo in a taang i a si lai tiah a ruah ve . Saram lei control tu department cu chawnh a timh hna i , asinain saturday a si caah an office an khar lai a ti caah Monday lei tu ah ka chawnh hna lai i ka lak ter te hna lai tiah hnangam ngai cun ai thulh than .
Asinain cuzaan ah cun a it i zanlai zinglei suimilam 2 hrawng ah khin a thawngpang theihtawn nak zawn cun thawngpang cu a theih than i an innchung tuanglai ah thil zeidek a tlak thawng zong cu a theih . Aran nak in a tho zau i an kaw-zaw cung ah cun kut tin sau pipi cu ceiling cung cun an rak tla i a va hmuh hna . Chun ah ceiling cung ah hin zu,chizawh hna a um i a si ko lai tiah a ruahmi cu silo in thildang tu a um ti a ruah cang i thinphang ngai cun puan ai khuh i zing khuavar lai cu a hngak cang . Amah tein ceiling cung i va kai i zeidah a um hnga timi va zoh ding ah le a ngamh ve tung lo i tih bu te cun khuavar lai cu a hngak .
A thaizing khua a var tik zong ah khin keimah tein ceiling cung ah cun ka kai ngam hnga amw ? ahodah midang kai sawm hnga ? asilo ah palik maw ka chimh lawlaw hna hnga timi cu ai ruat i a buai ngaingai .Culio ah cun khua cu a hung var i cu ni ah cun vanthat ah ruahlo pi in a mah chungkhat neihniam a simi tlangval pahnih nih a inn ah an rak len i , cucu cantha ah la in an inn cunglei in thawngpang a theih lengmang nak kong cu a chimh hna i cu tlangval pahnih he cun ceiling cung ah zeidah a um timi cu va zoh dingin timhlamh nak an ngei .
Tracy nih cun a tihtuk i a zul ngam hna lo , tlangval pahnih cu ceiling cunglei ah cun an kai i a rak hnawk ngai ngai i a rim zong a chia ngai .Ceiling cung cu tha tein an van zoh tik ah cun puanbu chia lak ah cun minung bantuk pakhat a it ko mi cu an hmuh . Asinain minung maw a si , naute lem lianpi dah a si timi an i fiang lo i neihdeuh in va fuh an timh ah cun a cawl i a ran nak in a tho i a tli colh i kutka hram i a rak dirmi Tracy zong cu a va pah i leng ah a zaam diam .
Tlangval pahnih nih cun a hodah a si timi zong an thei manh lo i a muihmai zong an hmu manh lemlo nain Tracy tu nih cun a muizong tha tein a hmuh manh i a hodah a si timi cu fiang tein a theih manh .Hipa hi kum 12 liamcia ah khan Tracy te chungkhar nih hin an inn ah a herhmi poah bawm dingin an rak chor tawnmi a si .tracy hi fa 5 ngei a si i a buaituk ve tawn caah hi pa nih hin a rian herhmi poah cu a rak bomh ve lengmang .Ahnu ah cu an pahnih in an i duh i a sinain Tracy nih hin hi pa hi Criminal Record ngeimi a si ti a theih than caah a rak then .
Asinain pa nih hin Tracy hi a then kho lo i an karlak cu sian that than dingin a nawl lengmang nain Tracy nih a duh ti lo caah ti awk theihlo ah Tracy a motor a fir piak i a rak zuar . Cu ruang ah cun police nih an rak tlaih i thongchung ah an rak khumh fawn . Thongchung i a um bu zong cun Tracy cu ca a kuat i ngaihthiam a hal i a nawl i ka zia ka thinh cang ko lai ee tiah ngaihthiam a hal zungzal nain tracy nih cun ngaihthiam hrim a tim ti lo .
Amak ngai mi cu thongchung in a chuah hnu ah cun tracy cu a rak buai ti bak lo i midang chim ning ah cun state dang ah a um diam cang tiah tracy nih cun a theih ning a rak si ve . Asinain Tracy te inncung ceiling cung tu ah a rak um peng tinak a rak si .Tracy nih cun police cu a call hna i an ra i an inncung ceiling cu an va check i a itnak pawl an zoh tik zong ah zeihmanh a sining hlathlai khawh nak le dawi i tlaih khawhnak pawl an hmu lo .
Ceiling lak ah cun Tracy te puanbu chia le caot thing a rak um i cucu itnak ah a rak hman i a rim chiat tuk nak a ruang cu ceiling cung ah cun zunpi le zunte a rak hman peng caah a rak si .Tracy a itnak cunglei boruak chuahnak awng in hi pa nih hin ceiling cung in a rak bih tawn ti a si i , tracy nih cun ka room chung i keimah lawng ka um i ka cawlcangh ning le ka can hman ning vialte a rak ka hmuh dih timi ka ruah hmanh ah hin a mak ka ti tiah a chim ve .
Hi pa hi zeitin dah ceiling cung ah hin a rak phak khawh timi an thei kho lo i , a ruang cu hi ceiling cung tiang a phak khawh nak ding ah cun kutka lei in a luh hrimhrim a hau mi a si caah mi pakhat khat tanpi tu zong a rak ngei ziar kho mi a si tiah an zumh fawn . Cu hnu zarhkhat hrawng a rauh ah tracy nih hin an innpawngkam ah cu pa cu voikhat a hmuh than i a ran nak in police a call hna nain an rak rat tik ah cun a tlau manh i an tlai kho hlei lo .
Leave a Reply