A Mak Ko : Kum 9 hngakchia nu te a zawtnak nih mipi khuaruahhar in a tuah dih hna

NU Le Pa Sinin Dawtnak Congah A Duh Tuk Caah Hngakchia Nu Te Nih Sam A Ei!!
========================
Kum 9 lawng a si rih mi hngakchia nu pakhat te cu nausea and vomiting timi telin Abdomen (paw) lei he aa pehtlai mi zawtnak a ngeih raungah China ram,J iangsu ramkulh, Suqing sizung ah a luan cia mi August ni 21 ah an va piak tiah Lizhee thawngzamh nih a tial. Nu hngakchia nu te i a zawtnak sining cu paw lei zohthiam Dr pa nih a pawpi chungah zohfelnak a tuah tikah 1 kilogram hrawng a rit mi sam a hmuh tiah kan theih.

“Sam cu a pawpi chungah a pawpi le sam he aa cawh dih caah a pum te in a rak um. Hngakchia nu te nih cu sam a ei hi, nu le pa sinin dawtnak co a duh tuk caah sam a ei mi si ti cu kan theih. Sam a ei nak a ruang cu nu le pa sinin dawtnak congah, hmuh a duh tuk caah a ei mi a si.

Cu ruangah hibantuk thil a chuah ti lo nak hnga ding caah tiin thinlung ruahnak leiin thlopbul a herh tiah nu le pa sinah ruahnak ka pek hna..” tiah cu Dr pa nih cun a chim. Cu hngakchia nu a paw an hlai lio ah (Surgeon tuah tu hna nih) an chim nak ah a kum khua le a pawpi aa keih rih lo caah sam kan chuah piak caan hi suimilam 10 chung leng kan rau tiah an chim.

Cu hngakchiat nu a zawtnak kong cu mipi nih an theih dih tikah khuaruahhar nagingai in a tuah hna tiah kan theih. Nu le pa satlaih lo bia a si ti zongin sual an phawt hna tiah kan theih.” Nu la pa nih fa le te a zohfel lo tuk mi hna caah hi thil a caan mi hi theih ding bak a si. Zangfak tuk a si fon.

Nu le pa nih fa le te thathi in a zoh lo mi le a zohfeltuk lomi fa le cu lung zawtnak (Thinlung ruahnak lei in Zawtnak) tampi an ngeih khawh pinah a phunphun in harnak a chuak ter kho.” tiah Doreen Social Platform zong nih a tial. Cu ruangah nu le pa a si mi hna nih cun hi bantuk tete zong kan theih a herh. Kan fa le sinah a tlun kho lai lo ti zongin chim khawh a si lo. Ho paoh fa le a si mi nih nu le pa sinin dawtnak cu kan duh cio. Cu ruangah hi bantuk thil a hme tete a si ko nain fa le te conghlomh ziathiam hram ko hna usih.

Relchap,Tamu Le A Pawngkam Ah Tualchung Mi 7 Cu August Thlachung Ah Thah An Tong! Sagaing ramṭhen, Tamu le a pawngkam ah August thlachung ah phun gning lo in thah a tongmi tualchung mi 7 an um. Thahnawn a cannak hmunhma cu pyusawhti an tamnak ah a si, tiah Tamu khuami hna nih Delta News Agency ah an chim. “Tamu ah cun mithah lainawn hi rawl ei, tidin tluk in an ruah cang, i tukvelhnak le thilchuhnak ti bantuk cu zei hmanh ah khin an ruat lo, thil kal ning a zualhma ngai cang,” tiah tualchung mi pakhat nih a chim.

August 22 chung lawng ah, Tamu khuachung ah mi 3 thah an tong. Zinglei ah pa pakhat ruak hmuh a si i, zaanlei ah Minta(မင်းသာ) khuami Ko Myo That le Hlaesait(လှည်းဆိပ်) khuami Ko Nay San cu Tamu in meng 15 aa hlatnak Minta(မင်းသာ) khua pawng ah misual nih an thah hna i, a thattu nih an motor zong khanghpiak hna, tiah tualchung mi nih an chim. Minta khua pawng i a thi mi hna hi aho kut in an nunnak a liam theih a si lo nain, an thih ni zaanlei ahkhan Minta khua pawng ah pyusawhti 6 cu hriamnam he kan hmuh hna, tiah tualchung mi nih an chim.

Tualchung mi nunnak a liam mi tam deuh cu pyusawhti kut in a si lai, tiah tualchung mi nih cun an chim. Khuami pakhat nih cun, “Tamu cu pyusawhti khua bantuk a si i, pyusawhti an si ti theih zong ah chim ngam a si lo. Thilri fir le thil i chuhpiak ti bantuk cu nitin ngawt in a cang,” tiah a chim.

Sagaing Ramṭhen, Kanbalu Peng Kahdohnak Ah SAC Ralkap 40 Hrawng An Thi, SAC Nih Van Lei Kahdohnak An Tuah! Sagaing ramṭhen, Kanbalu(ကန့်ဘလူ) peng Nyaung Kone(ညောင်ကုန်း) khua a khangtu SAC ralkap hna cu PDF nih an kah hna caah SAC ralkap 40 hrawng an thi i, an hriamthil zeimawzat zong an lak khawh, tiah Kanbalu pengkomh tualchung ralkap battalion 2 in chimphuannak nawlngeitu nih a chim.

August 23, zinglei suimilam 8:00 in kahdohnak a chuak i zinglei suimilam 10:00 hrawng ah SAC ralkap nih van lei in bomb an thlakhnawh hna. Kanbalu peng Latkhohpin(လက်ခုပ်ပင်) le Aungchainta(အောင်ချမ်းသာ) khuachung ah rallam sialmi SAC ralkap hna cu Kanbalu (ကန့်ဘလူ) pengkomh tualchung ralkap battalion 2 nih an kahdoh hna.

Kahdohnak ah cun SAC ralkap 40 hrawng an thih leng ah RPG, MA 1, MA 2 le hriamthil dang zong an chuh khawh hna, tiah Kanbalu pengkomh hriamtlai phu battalion 2 in chimphuannak nawlngeitu nih cun a chim.

Ṭuanvo ngeitu nih cun, “Nihin zinglei suimilam 8:00 in kahdohnak a chuak i, suimilam 10:00 hrawng ah van lei in an bawmh hna nain, SAC ralkap lei tu cu fak ngai in kan hliamh hna,” tiah a chim. SAC ralkap vanlawng Mi-17 pakhat nih thilri a vun chanh hna i, Mi 35 pakhat le ral tuknak vanlawng dang pakhat nih van lei kahdohnak an tuah, tiah an chim.

Tanintharyi Ramṭhen, Tanintharyi Peng, Kahdohnak Ah SAC Ralkap 5 An Thi, PDF 2 Nunnak A Liam: Tanintharyi ramṭhen, Tanintharyi peng, Kawmapin(ကော့မပြင်း) khua ah SAC ralkap le tualchung hriamtlai phu kar kahdohnak a chuak i, kahdohnak ah SAC ralkap 5 an thi, PDF lei in ralkap 2 an nunnak a liam lengah minung 3 hliamhma an tuar, tiah Tanintharyi peng tualchung hriamtlai phu hna nih cathanh an chuah.

August 19 le 20 ah khan tualchung hriamtlai phu le SAC ralkap hna cu voi 7 an i kap. SAC ralkap lei nih tualchung ralkap hna cu an nam hmasa hna caah kaphnih kar kahdohnak a chuak, tiah tualchung ralkap lei nih an langhter. Hliamhma tuarmi PDF 3 cu rianrang in an thlop manh hna caah an thinphan ding a um lo, atu ah cun a himnak hmun ah an phan cang, tiah tualchung hriamtlai phu hna he naihniam in ummi hna nih an chim. Cu kahdohnak ah cun SWDF le Bat-ma-lait (ဘက်မလိုက်) pah-kah-phah phufonh an i bawm, tiah theih a si.

Yesagyo Peng Khuate Kaangmi Hna Cu PDF Nih Bawmhnak An Pek Hna! Magway ramṭhen, Yesbagyo peng ah SAC ralkap nih khuate an khanghmi hna cu DPF nih facang le thlilri bawmhnak kan pek hna, tiah CDSOM nih cathanh an chuah. August thla chung ah SAC ralkap nih Yesagyo peng khuate an khangh caah inn 800 nak tlawm lo a ciam, tiah theih a si.

Inn khangh piak a tongmi hna cu Myaing PDF le humhimnak phu CDSOM, CRF- Myinmu, M2W hna nih facang tun 30, chiti pung khat, cite tun khat, meh-hang, chantling le puan kan pek hna, tiah CDSOM nih nizan August 22 ah an langhter.

Yesagyo peng Yelaykyun(ရေလယ်ကျွန်း) hmunram um, PDF pawl cu CDSOM telh in Sagaing ramṭhen ah umhmun khuarmi hna he i bawm in SAC ralkap an doh, tiah theih a si. SAC ralkap nih inn le lo an khanghmi hi Sagaing le Magway ramṭhen ah tam bik an khangh i, inn khangh a tongmi cu PDF nih bawmhnak an pek tawn hna, tiah theih a si.

Yinmarbin Peng Kahdohnak Ah SAC Ralkap 4 An Thi, Sagaing ramṭhen, Yinmarbin peng Winkone khua pawng ah August 21 zanlei sml 2:00 hrawng in SAC ralkap le PDF kahdohnak a chuak, tiah theih a si. Cu kahdohnak ah cun SAC ralkap 4 an thi i, PDF ralkap 1 a nunnak a liam ve, tiah Yinmarbin pengkomh Battalion 1 in ṭuanvo ngeitu pakhat nih a chim.

“SAC ralkap pawl cu Winkone khua in an chuah ah kan kah hna i, Sml pakhat leng kahdohnak a chuak. Kaphnih in hriamngan he hriamhme in kan i kap i, kan mithmuh ah SAC ralkap a thimi hi 4 an si. Kanmah lei in ralkap 1 a nunnak a liam ve,” tiah a chim chap. Cu kahdohnak ah cun Yinmarbin Battalion 1, Alpha Special Force le Kani-Yinmarbin ṭangṭi phu hna i bawm in an kah hna, tiah theih a si.

SAC ralkap nih Winkone khuami ralzam Chit Win cu meithal in an kah thah. Cu pin ah SAC ralkap nih hmunhma thianhhlimnak an tuah ruangah Winkone, Kyat, Talauk, Paukinnmyaing(ပေါက်အင်းမြိုင်) le Thityapin khuami a thong leng an zaam, tiah theih a si.

Ayeyarwaddy Ramṭhen, Wakema Peng Ah Rammi Sinak A Ngei Lomi 56 Tlaih An Tong! Ayeyarwaddy Ramṭhen, Wakema khua Dayutmeik hlei pawng ah Yangon kal aa thawhmi tilawng pakhat chung ah rammi, sinak a ngei lomi minung 56 cu August 21 an tlaih hna, tiah palik he naihniam mi hna sinin theih a si. Yangon a kal ding tilawng pakhat chung ah rammi sinak a ngei lomi 56 an um, ti thawng an theih caah Dayutmeik hlei pawng in SAC ralkap le palik nih an bawh hna i, tilawng khaltu telh in minung 56 an tlaih hna, tiah theih a si.

“Zinglei ah tilawng cu checkhlatnak an tuah i, an tlaih. A chung ah rammi sinak a ngei lomi pa 30 le nu ngakchia 26 an si,” tiah palik he naihniam mi pakhat nih a chim. Tlaih a tongmi hna cu Wakema palik le SAC ralkap nih bia an hal hna i, Yangon in Malaysia ah kal aa timmi an si, tiah theih a si. A luancia July 23 ah Pathein peng Shwethaung Yan rili kam ah tilawng nih, rammi sinak a ngei lomi minung 46 a phorhmi hna zong SAC ti ralkap nih an rak tlaih hna.

Mizoram Ah Tedim Mi Pahnih Sinin Rupees Sing 1,340 Man Bing An Tlaih! India ram, Mizoram ramkulh, Kolasib khua chung ah 2.7kg a ritmi, rupees sing 1,340 man bing(kyats sing 40,000) cu Myanmar rammi pahnih sin in motor pakhat chung ah Mizoram palik le rithaisii a dohtu phu nih nizan August 22 ah an tlaih, tiah theih a si. Tlaih a tongmi pahnih hi Tedim peng Bukphir khuami Lalthangliana, kum 44 le Khual Sawm Sang an si. An pahnih in Aizawl khuapi um, rithaisii a dohtu zung nih taza an cuai hna, tiah theih a si.

Mandalay Ah CID Palik Bawi Le A Nupi Cu Hriamtlai Phu Nih An Thah Hna! Mandalay khuapi lam No. 30, 57 le 58 kar, Grand Mandalay sii-inn pawng ah nihin August 23 zing sml 8:50 hrawng ah CID palik bawi le a nupi cu aho hngalh lo mi hriamtlai nih meithal in kah hna i an thi, tiah theih a si.

“Thah a tongmi pahnih cu ngakchia sianginn a thlahmi an si i, an ṭin lei ah meithal zun li in an kah hna,” tiah mithmutu pakhat nih a chim. Kah an tonnak hmun pawng kam cu SAC ralkap le palik nih lam an kham i, checkhlatnak an tuah, tiah theih a si. Mandalay ah nizan August 22 ah SAC kuttang Sipin zungrianṭuan pakhat le dalan pakhat zong thah an tong cang.

SAC Le EAOs Phu 10 A Voihnihnak Tonbiaruahnak Nih Zei Pipa A Chuakpi Lai Lo, Tiah Ramkhel Tuaktan Tu Hna Nih An Soisel, SAC le tlangcung hriamtlai phu 10 cu a voihnihnak tonnak an ngei ṭhan i, an i ton tik ah Myanmar ramchung daihnak ca ah zei ngaingai a chuahpi lai lo. Ram chung kahdohnak daihternak sawhsawh lawng a si lai, tiah ramkhel tuaktantu Than Soe Naing nih a chim.

Min Aung Hlaing nih remdaih tonbiaruahnak a tuahmi ah tlangcung hriamtlai phu 10 hna he tuthla chung ah kan i ton dih khawh ahcun a ra laimi September thla chung ah hnatlaknak minsen thut khawh ding in kan i zuam lai, tiah August 16 lio ah a rak chim. Ramchung kahdaihnak min a rak thutu NCA chungtel phu 3, PNLO, ALP le LDU cu nizan August 22 ah SAC he a voihnihnak tonnak an ngei. Cu hna phu 3 cu a luancia July thla zong tonnak an rak ngei cang, tiah theih a si.

“SAC he tonnak a ngeimi tlangcung hriamtlai phu 10 cu anmah le an hmunram cio ah uk pen khawhnak an hal lai. Min Aung Hlaing zong nih Ethnic Armed Organisations(EAOs) lei ṭang kho lo ding in a renh ve hna lai. Cucaah tonnak an ngeihmi hi remdaihnak ca ah san tlai lo a si,” tiah Than Soe Naing nih a chim. SAC he tonnak a ngeimi tlangcung hriamtlai hna hi anmah le an hmunram ah kahdohnak a um lomi an si, tiah theih a si.

Ramkhel lei tuaktantu Dr. Sai Kyi Zin nih, “Remhdaih tonbiaruahnak ah SAC nih tlangcung hriamtlai pawl bia a kamhmi hna hi zei tluk tiang dah kan zumh lai ti hi ruah thiam ngaingai a hau,” tiah a chim. “Mui cawl in thawng an thanhmi hi a taktak ah thil an tuahmi le an cawlcangh ning he aa ralkah tuk. An thil tuahmi hi dik tein an chim ngam maw ti hi ruah setmat a hau. Zei tluk tiang in dah biadik an chim ti hi zoh ngaingai a hau,” tiah a chim chap.

Aung San Suu Kyi Le A Ṭapa Nih An I Cuhmi Inn Cu SAC Biaceih Bawi Nih A Ṭapa An Pek, Yangon khuapi, Sianghleirun Yeikthar lam ah a ummi inn hmun No. 54 inn le hmun cu Suu Kyi le a ṭapa Aung San Oo nih an rak i cuh. Suh Kyi a ṭapa nih cunglei biaceih zung ah ceihpiak ṭhan ding in a chuahpi hnu ah nizan August 22 ah biaceih zung nih Aung San Oo an pek, tiah theih a si.

No.54 inn hmun le inn cu a luancia kum 2000 lio ah Suh Kyi le a ṭapa nih a cheu veve in co ding ah taza an rak i cuai. 2016 ah a cheu veve co ding in biaceih zung nih bia an rak khiah. No. 54 inn pawng a ummi inn pakhat cu Suu Kyi a nu nih a tupa Khin Maung Aye a rak pekmi dah ti lo cu a cheu veve in co ding ah biaceih zung nih an rak khiah piak hna.

Cu bia khiahmi cu Aung San Oo nih a cohlan lo caah kum 2018 lio ah Naypyidaw biaceih zung ngan bik ah a rak chuahpi ṭhan nain biaceih zung nih an rak hnon piak. Aung San Oo nih tukum 2022 ah a chuahpi ṭhan i, July 22 ah biaceih zung nih ceihpiak ṭhan ding in an hna a tlak caah nizan August 22 ah Suh Kyi a nu nih a tupa a rak pekmi inn le hmun cu Aung San Oo nih co ding in Naypyidaw biaceih zung sang bik nih bia an khiah, tiah theih a si.

Aung San Oo cu ramdang mi(citizen)a si caah Myanmar ram ah a umi roco khawhnak a ngei lo, tiah an rak chimceih tawn. Cu kong he pehtlai in kawlmi nih an hrinmi cu ramdang mi sinak a ngeih zong ah roco khawh a si ko, tiah biaceih zung he naihniam mi pakhat nih a chim. Aung San Oo nih ro a comi kong cu Suh Kyi nih zei hmanh a thei rih lo. Biaceih zung nih biakhiahnak an tuah lio ah kaphnih sihni lawng an um, tiah theih a si.

Min Aung Hlaing Nih A Tule 4 Cu Private Sianginn Ah Security Ṭha Tuk In A Chiah Hna! Min Aung Hlaing nih a tule 4 cu, SAC cozah sianginn ah chia loin private sianginn pakhat, Excellent Myanmar Private School(EMPS) ah humhimnak ṭha tuk he a chiah hna, tiah theih a si. Min Aung Hlaing nih fapa pakhat le fanu pakhat a ngeih hna. A tule hi an dihlak 5 an si i, 4 cu atu lio minthang ngaimi Yangon Ingyar Myaing lam ah a ummi EMPS private sianginn ah a chiah hna, tiah theih a si.

Min Aung Hlaing nih a tule 4 a chiahnak hna private sianginn hi Myanmar ram chung ah minthang ngaimi a si. Kum 2013 lio ah an rak hunmi a si i, nawlngeihnak laak hnu in kawl mirum hna nih an tu le fale an chiah cemnak sianginn pakhat a si. Minthang ngai sianginn a si caah hmunhma zong an kauh chap, tiah Khit Thit Mdeia nih a langhter.

Min Aung Hlaing nih cozah sianginn cu biatak kan sersiam lai, tiah a aupi zungzal ko nain, amah tule cu cozah sianginn ah a chia duh hna lo. Amah lila nih a kuttang SAC cozah sianginn cu a zumh lo caah private sianginn ah a chiah hna, tiah tualchung mi cheu khat nih an soisel.

“Cozah sianginn hi biatak tein a ṭhancho khawh nak ding ah kan serchuah ṭhan a hau, tiah a chim lengmang ko nain amah a tule cu a chia fawn hna lo. Min Aung Hlaing a pu, Ne Win nih a rak sermi cozah sianginn ah a tule chia loin private sianginn ah a chiah hna. Hi tluk ram sifak kuttang cozah sianginn ah ca a cawngmi siangngakchia hna hi zeitindah an ṭhancho khawh rua hnga,” tiah tualchung mi nu pakhat nih a chim.

Min Aung Hlaing nih a tule zohkhenhtu ah ralkap 50 hrawng a chiah hna. Sianginn chung ah ralkap uniform hruk loin ralkap 10 hrawng an um. 9mm pistol pakhat cio an i tlaih, an tawhrolh zal ah kuan bawm an i sanh rih. Sianginn leng in ralkap tam tuk nih an cawngh rih. A tule sianginn an kai caan ah a zohkhentu hna hi ralbawi le mithiam sang lawngte an si, tiah theih a si.

Sagaing Ramṭhen Kahdohnak Ah SAC Ralkap 16 An Thi, PDF Ralkap 4 An Nunak A Liam, Sagaing ramṭhen, Kanbalu peng Hmawtaw khua in SAC ralkap le Pyusawhti cu an chuak i, Shwebo Battalion 16 nih drone in bomb an thlak hna caah Pyusawhti 3 hliamhma an pu, tiah theih a si. Cu pin ah Hticheik peng, Yephyolwin khua pawng ah SAC ralkap, Pyusawhti, Kathar pengkomh PDF le ṭangṭi Hticheik PDF kahdohnak ah SAC ralkap lei in 10 an thi, theih a si.

Cu kahdohnak ah cun PDF ralkap 2 hliamhma an pu. SAC ralkap pawl cu Yephyolwin khua ah an lut i, inn an khangh, tiah runvennak zung nih cathanh an chuah. Sagaing ramṭhen, Intaw peng August 20 ah Intaw-Kyawngkone lampi ah SAC ralkap 50 hrawng cu KIA, PDF le Pah Kah Pha hna i bawm in zing sml 9:00 le zanlei sml 2:00 ah voi hnih an kah hna caah SAC ralkap 6 an thi. KIA ralkap 1, PDF ralkap 1 le Pah Kah Pha in ralkap 2 an nunnak a liam ve, tiah Indaw Revolution -IR nih an thanh.

Karen Ramkulh Kahdohnak Ah SAC Ralkap 3 An Thi, PDF Ralkap 1 A Nunnak A Liam: Karen ramkulh, Myawaddy-Wawlay motor lampi ah nizan August 22 ah kahdohnak a chuak i, SAC ralkap 3 an thi i, PDF ralkap 1 a nunnak a liam ve, tiah Cobra Column nih cathanh an chuah.

Myawaddy-Wawlay lampi cung ah humhimnak kan lak i, SAC ralkap Tatma 44 nih August 22 zing sml 9:30 hrawng in zanlei sml 5:00 tiang an kan kah, kan hmunhma chuh an kan timh. Miakpi, hriamngan le hriamhme he an kan kah. SAC ralkap cu 3 an thi i, hliamhma tam ngai an pu, tiah Cobra Column nih an langhter. Cu kahdohnak ah cun Cobra Column in ralkap 1 hliamhma a pu nain thinphan awk a um lo, tiah Cobra Column nih cathanh an chuah. Crd- The Chin Post