Press "Enter" to skip to content

BAIBAL CAWNG LO I PATHIAN RIANTTUAN HI SUAL A SI MAW?

Yangon ah Bible Sianginn a ngei mi Rev. Dr. Aung Min Thang Hakha ah Crusade an tuahnak cu tlamtling tein an dih cang tiah thawng kan theih. Thlarau thinlung taksa ah hlawknak tampi an ngei lai tiah zumh nak kan ngei.

BAIBAL CAWNG LO I PATHIAN RIANTTUAN HI SUAL A SI MAW?

1. Pathian dawtnak le a kan khamh nak kong cu ahopoh nih chim phuan ding asi. Zumtu vialte cu kan si khawh tawk cio in Pathian rianttuannak, Pathian ram kauhnak caah kan i tel cio ding a si. Pathian ram ca i thazaang a chuah duh lomi cu zumtu ttha an si loh. Hrintthan mi an si lo. Jesuh dawtnak a theimi le a fialmi a tuahmi an si lo kan ti khawh.

2. Asinain Khrihfabu pakhat van hruai ding ahcun, Ka chan chung zumtu thlarau rawl ka pe cang lai ai timi nihcun, pastor or evangelist ka ttuan cang lai ai timi nihcun Baibal siangin cu an kai hrimhrim awk a si.

3. Baibal siangin kai loin Pathian rian an ttuan tikah Jesuh nih an dawt, Pathian nih an khamh ti lawng chim cu a zaat lo caah an theih fian lomi cu an ruahnak le an lih in an chim tawn tikah mipi kha zumhnak dik lo ah an pial ter dih hna.

4. Baibal cawng loin Pathian rian an ttuan tikah thawngttha chim ding hna an thei tthittha tawn lo i, pumpaak study tuah zong an thiam lo caah an member kha thlarau rawl thaw an pe kho hna lo. An rawl peek bon lawng an peek peng tawn hna caah an member nih an phungchimmi an ngai zuam ti lo. An sermon nih mipi kha cawm loin, an sermon nih a simh hna.

5. Baibal cawng hmasa loin Pathian rian an ttuan tikah mirang holh an thiam ti lo, Greek, Hebrew biafang pakhat hmanh an theih lo tikah ca an rel kho ti lo. Laica le kawlca lawng kha an rel khawh tikah Laica le Kawlca cun Pathian kong rel ding cu a um tuk lo caah mipi sinah chim dingmi ruahnak thar an i chap kho ti lo. An zumhnak kha a dik le dik lo zong an hngal kho ti lo.

6. Korea ahcun MDiv tal a dih lomi cu Pathian rianttuannak nawl an pe hna lo. Lai Tlang ahcun ka hrinthan a timi poh nih Pathian rianttuan ah an i thawh. A au khuang deuhmi poh nan rak cohlan lengmang fawn hna. Minal deuh poh phungchim ah nan rawih hna. Kan Laimi lam an pial pitu hna hi zuri an si lo, cawnnak reprap a nei lomi evangelist pawl an si.

7. Kan ram a rawktu, holhtheihlo hla an sak piak tu hna khi va zoh hna ulaw cawnnak reprap nei lomi, carel a huam lomi, study a tuah bal lomi, how are you? ti hmanh a hngal lomi, Pathian duhnak a thei lomi, theih zong ai tim lomi, Baibal an cawn ko zongah thiam lak in a cawng lo i mah ruah ning poh i Pathian a biami an si ngawt lai.

Saya fel le saya ttha si ding ahcun siahngakchia fel si kha a herh hmasa. Baibal cawnpiaktu ttha na si ve nak ding ca ahcun fakpiin Baibal a cawngmi na si hmasa a herh ve. Baibal cawn duh bak lo i cawnpiaktu si cawlh ai timmi nakin mi sual deuh an um lo. Siahngakchia si hmasa loin saya si khawh asi lo bantuk kha a si. Aung Myint Thang

Be First to Comment

Leave a Reply

Your email address will not be published. Required fields are marked *