Zualko : CDF-Hakha Pasaltha Nih A Dawtmi Chinram Le Miphun Caah Nunnak Pek

Timit lei kahdohnak ah hriamngan nih tlak hnawh ruangah CDF Halkha in kan ralkap Salai Chan Hei Lian nih ram le miphun caah a nunnak a pek e. Chin miphun le ram dawt ruangah nunnak petu pasaltha “Salai Chan Hlei Lian” na miphun dihlak nih upatnak sangbik kan in pek e.

thawngpang dang relchap : Hpawngpin, Myawaddy, Palaw Kahdohnak Ah SAC Ralkap 12 An Thi, PDF 3 An Nunnak A Liam Ve!

Hpawngpin, Myawaddy le Palaw ah SAC ralkap le PDF kahdohnak a chuak i, SAC ralkap 12 an thi. PDF ralkap 3 an nunnak a liam ve, tiah PDF nih cathanh an chuah.

August 23 Myawaddy Kahdohnak Ah SAC Ralkap 3 An Thi, PDF Ralkap 2 A Nunnak A Liam: Karen ramkulh, Myawaddy peng Tung Htet Kweh(သုံးထပ်ကွေ့) kahdohnak ah SAC ralkap 3 an thi i, PDF ralkap 1 a nunnak a liam ve, tiah Cobra Column nih cathanh an chuah.

August 23 ah rallam a sialmi SAC ralkap le Cobra Column phu kahdohnak ah ralkap 3 an thi i, 5 hliamhma an pu. Cobra Column ralkap pakhat hliamhma faak a pu i, cu ni zanlei ah a nunnak a liam. An dihlak ah Cobra ralkap 2 an nunnak a liam, tiah theih a si.

Hpawngpin Kahdohnah Ah Pyusawhti 7 An Thi, PDF Ralkap 1 A Nunnak A Liam : Sagaing ramṭhen, Hpawngpin peng ah nizan August 24 zing sml 4:30 ah Hpawngpin PDF le SAC ralkap kuttang Hapa khua chung ah a ummi, Pyusawhti 40 hrawng kahdohnak ah Pyusawhti 2 an thi i, meithal zun khat an laak. PDF ralkap 1 a nunnak a liam ve, tiah theih a si.

Cu pinah Hpawngpin peng thlanglei Manli khua um Pyusawhti 40 hrawng cu nizan August 24 zinglei sml 3:00 hrawng ah PDF le Pah Kah Pha i bawm in M 79 bomb in an kah hna caah Pyusawhti 5 an thi, PDF ralkap 1 hliamhma a pu, tiah PDF nih cathanh an chuah.

Palaw Kahdohnak Ah SAC Ralkap 2 An Thi : Tanintharyi ramṭhen, Palaw peng Palawkone(ပုလောကုန်း) khua ah umhmun khuarmi SAC ralkap pawl cu, August 24 zinglei ah kan kah hna i, SAC ralkap 2 an thi, tiah Palaw PDF nih cathanh an chuah. Cu kahdohnak ah cun Myeik pengkomh PDF Battalion 1, Palaw PDF le ṭangṭi phu hna i bawm in an kah hna, tiah theih a si.

Be the first to comment

Leave a Reply

Your email address will not be published.


*