Tuchun August 30 ah PDF-Zoland pasaltha Salai Philip nih Chinram le miphun caah nunnak a pek tiah CDF/CDM-Siyin nih thawngthanh nak an tuah hi asi. “2022, August 30 ni ah PDF-Zoland pasaltha Salai Philip cu kawl ralhrang doh ding le uknak tha lo hrawh dingin biakamnak a rak tuah bantuk tein Chinram le miphun caah nunnak a pek hi asi.
Thisen le nunnak thap in Chinram le miphun kilvengtu si dingah biakamnak a tuah bantuk tein a nunnak pe siangtu Salai Philip cu CDF/CDM-Siyin chungtel vialte nih upatnak sangbik kan pek” tiah an langhter hi asi.
Thawngpang dang relchap : Ka Hawi Nu Hri In Ai Awk Naak A Ruang Cu-A Bongbi Zaal Chungah Catlaap Hme Te Ka Hmuh A Hohmanh Ka Rel Ter hna Lo
Kan khua i ka hawikom ttha bik, kan inn pa zong a si mi ka hawinu Rohlui a mah tein hri in ai awk naak a ruang a thih lai zaan ah a ka chimh ta mi le, ca tlaap hme tein ca a ttial ta i a hnulei zin bongbi zaal chungah a chiah taak mi cu! Rohlui he hin kan hngakchiat lio tein ai kom mi kan si i, kan kum ai rual caah sianginn kan kai naak ah kan cataang zong ai rual peng i hmunkhat ah sianginn kan kai peng i a thih tiang hin hmun khat te ah sianginn a kai tti zungzal mi kan si.
kan tleirawl lio ahhin a thli tein tlangval ngiat khun mi le star mi kan rak ngei tawn i kan star mi hi a rak i khat deuh zungzal, cu ti tlangval kan uar deuh mi nih nungak an vun ngeih tik ah kan pahnih hin mi theihlo in kan rak nii lengmang ttheu tawn. Ka hawinu i a nu le a pa hi mi fel tak tak an si i an chungkhar hi an rak i nuam i kan khua ahcun zohchunh awk chungkhaar tiah khua mi nih an rak chim tawn mi chungkhar zong an rak si. kan sianginn kai zong cu a hung tluang ve i ka hawinu Rohlui he cun kum 15 kan si ah hin tang hleihnih kan dih ve ve.
Tang 12 kan dih kum hin Rohlui a nu hi chungril lei ah damlo naak a ngei i rian zong a ttuan kho ti lo i lenghmanh ah a chuak kho tuk ti lo. Thlakhat ah voikhat bak hi biakinn hmanh ah ai pum kho lo i Rohlui cu a nu damlo naak ruangah sianginn kai zong hi a lungah a um tuk ti lo i a si nain ka si khawh chungin sianginn cu ttha tein kai peng dingin ka foarh fial i Kan pahnih in college kan hung kai tti i BA a kumkhat naak kan kai lio ahhin Rohlui a nu nih cun chungril lei damlo naak cun mual a kan liam taak.
BA a kumkhat naak cu Rohlui nih cun a nu zuun tuar bu cun harsa tak tak in a kai i a dih ve. Rohlui a nu a thih hnu cun a pa hi a tuar tuk ve i a hlaan i a rak fel tuk michungkhar zoh thiam tiah an rak phai tawn mi le laksawng tiang hmanh a rak ngah bal mi kha an nu a thih hnu cun a lungfah tuk ah Zu lawngte a ding cang i an innchungkhar ah buai naak siam mi le hna hnawk in cun a um lo nain pa cem nih ni chiar in zu lawng a din tik ahcun a fale zong an thinlung te cun nuamhlo naak an ngei.
Cu ti Rohlui pa a nupi zuun tuar kho loin zuu he lawng ai ciah peng cu khua mi zong an lung a nuam cio lo i nupi dang tal tthit piak ah a tuar nem deuh hnga maw tiin a chungkhat le nih nu pakhat a pasal nih a thih taak ve mi cu nupi caah an tthit piak i cu nu cu a fel i chungkhar zohkhenh daan chawnh biak daan le pasal le zohkhenh daan a thiam ngai mi a si i Rohlui a naule hna le a pa zong an hung i nuam deuh ngai i chungkhat sahlawh le khua mi hna zong an hung i nuam deuh ve tthaan cang.
thla thum hrawng a rauh hnu ah Rohlui a nu ei i a fapa le a fanu cu Rohlui te inn ahcun a nu ei nih cun a umter ve cang hna, a fale pahnih an hung um ka ahcun nu le pa ule nau an kan ttih zah an kan dawt i an nu farual cun an ttha tuk tiin khua mi le chungkhat hna zong nih an lomh ngai ngai hna. Rohlui a nu ei i a fapa upa deuh hi cu Rohlui naak hin a kum a upa deuh mi a si.Thlakhat hrawng a hung liam hnu cun an nu farual cun an nunzia ai dang cang i an mah mizia diktak a chuak i kan unau hin an kan rem lo i ka pa sinah hin a phun phun in kan tthatlo naak le kan felo naak hi an kan report i kapa zong cu a khuaruah a har ngai ngai.
Ka nu ei nih cun na fale hi ttha tein na chimh hna a hau, rian na tuan kar ahhin ka fale pahnih hi an rak rem hna lo.kan unau tak tak zong an si loh ning zah hngal loin kan sinah an rak i fonh tiin Rohlui a naule cu an nu ei nih cun zaan chiarin an pa sinah cun a report peng hna i rohlui te unau cu a pa nih cun ziah mah ti cun nan u le cu nnan ti hna tiin a sik tawn hna i Rohlui cu a ngaihchia tuk tawn i ka pa kan nih unau nih cun zeiti hmanh in kan ti bal hna lo, an mah tu nih hin inn i kan um ve hi an kan rem lo i leng ah hin um peng hna seh ti an kan duh i inn chung ah kan um ve hi an kan senh loh.
An mah nufa pathum lawng um hi an duh, rian ttuan naak ah na um peng i zeihmanh thil sining na thei loh i si ka nu bia lawng hi zumh ding si lo kan chim mi hi kan zumh piak ve tiin a ti i Rohlui pa zong cu a nu thar le a fa ei le pahnih an nunzia thar ruangah cun an lungre a thei i khua ruah daan zong thiam har a ti. Rohlui cu Commerce la dingin ka sawm nain a nih cu sianginn kai zong a huam ti lo i rian a ttuan i keimah lawng cu ka sianginn kai cu ka peh.
Rohlui cu a nu ei fapa upa deuh nih hin a zoh daan ai dang deuh i a um a kal naak kip ah a zulh i rohlui cu har a ti ngai, a ruang cu rohluii nih hin a nu ei fapa cu a fih tuk ruangah a si. Tlangval nih phone an rak chawnh le ca an rak kuat caan ah hin a nu ei fapa cu ai thlaak tuk i hodah an chawn hodah ca an kua tiin hna a hnawh i, a nu le a pa sinah rohluii hi tlangval ttha lo a ngei ti bantuk in a chim tawn. Rohlui a nu ei le a fale pahnih cu mi inn len hi an huam tuk i i innpa chak thlang ah an kal i an chungkhar sining cu heh tiah an chimh hna i Ka hawinu rohlui te unau fel lo naak le an chungkhar buai naak cu an chim an aupi zungzal.
Cu bantuk cun kan mah inn zongah voi tampi cu an rak raa tawn i ka nih chung nih cun tthi ttha in kan chawnh huam hna lo caah an rak kan pal ngam tuk loh. Rohluii cu a nu ei fapa upa deuh nih a ka duh ti a hngalh caah a mah a duh ngai tu sang dang mi tlangval he cun ani uar i cu zong cu a nu ei fapa nih ka chawn ngam ti hlah seh ti a duh caah tlangval a ngeih naak cu a si. Tlangval a ngei ti a theih caah a nu ei fapa nih cun innpa sin kip ah le a nu le pa sinah cun a thang chiat i, a tlangval hi misual mi lolak zuding sa ei a si tiin heh tiah a thangchiat tawn.
Voikhat zaan cu rawl kan ei khim ah Rohlui cu ruahlo pin kan inn ah a rak ka leng i suimilam 2 chung hrawng bia kan i ruah, a lawi lai deuh ah khin nau ka pawi ti cu a ka chimh i ka lau tuk, sang dang i a tlangval pa he cun thil an ti sual i a tlangval pa nih hin nau na pawi cun kan tthit cawlh lai a ti caah hi thil an tuah hi a si i a tak tak ah nau cu a pawi tak tak i Rohluii cu nau ka pawi i pasal ka ngei cang lai i ka pa le ka nu ei le a fale hna sin hin ka luat cang lai tiin ai nuamh tuk lio ah a tlangval pa nihcun khua dangah a zaam taak diam i a chawnh zong voikhat hmanh a rak chawn duh ti lo.
Cu caah Rohlui cu a lungre a thei tuk i zeitluk in ka nu ei le a fale nih an ka nihsawh chin chin lai ti a ruah ah vawlei cung nun zong hi a rak zuam ti lo i i cu caah ka sin ah hin a rak rat naak le a lungre theih naak chimh awk ah a rak rat hi a si. Kei nih cun ka si khawh chung in ka hnemh i tuar hraam hraam dingin ka hnemh i cu zaan cu kan pahnih cun mitthli he kan i hnem i kan i kup. Cu zaan cu ka hawikom ttha Rohlui he hin kan i hmuh le bia kan i ruah a dongh naak a si lai ti belte ka rak thei lo.
sau nawn bia kan i ruah hnu cun a nih zong cu a lawi ve i kei zong ka ca ka zoh ve i cu zaan cu ka ttah naak ah ka mit a fah deuh caah ca ka zoh mi cu ka ngol i kai hngilh. Cu ti kai hngilh lio ahcun ka ihnaak khaan ahcun ka pa hi a rak tli zawk zawk i a rak ka thawh i na hawinu ai awk tiah a rak ka chimh, a ho ka hawinu dah ai awk mi cu a si hnga tiin khua ka ruak i ka hawinu Rohlui a si ding hi a ruah hrim ka ruat lo. Ka pa nih cun a ho na hawinu hme si hng ai na hawinu Rohlui hme teh tiah a vun ka chimh ka ahcun ka taksa hi mei nih laih mi bantuk in ka um dih.
Innka ka on i Rohlui te inn lei ahcun mipi an tlik thluahmah thawng cu ka theih. ka pa le ka nu he cun kan va kal ve i ka hawinu cu an ihnaak khaan chungah cun hri cun a rak i awk i palek nih cun a hrin ai awh naak cun an phoih i tangah an rak chiah, zeoi ca tal a ttial mi a um hnga maw a taksa kha vun dap uh an ti i a taksa kan vun dah i a zingbongbi hnulei zaal chungah catlaap hme te hi kan hmuh i hohmanh nih an rel hlaan ah ka laak zawk zawk i ca a ttial taak mi cu a cung bik ah ka min a ttial i ka hawikom ttha bik hithil hi ho sin hmanh ah ka chim ngam lo nangmah lawng kan chimh, nangmah nih rak chim te ko hna mu ti lawng ai ttial.
Ca tlaap cu a hohmanh nih an rel khawh lo dingin ka thleh dih hnu ah ka khai i ka hlonh. Ca tlaap ka khai mi cu palek an thin hung tuk i nangmah zong hi, hi thil kong ah hin tlaih khawh na si tiin an k ahro nain nan ngamh ahcun rak ka tlai uh ho dah a palh deuh ti cu nan theih te lai cu ka ti i ka lung a faak tuk i ka hawinu a lungfah tuk ding cu ka ruah piak ah ka celh lo i ka ttap zungzal. ca tlaap ka laak mi i caa ai ttial mi cu ka nu le ka pa le Rohlui pa nih cun zei dah ai ttial ti cu an ka hal peng nain zeihmanh ka chim duh hna loh.
Rohlui a nu ei le a fale pahnih cu a thli in an inn ah ka kal hnawh hna i hi thil hi nan mah nu farual ruangah a si ti hi nan thei maw tiin ka lungfah tuk bu cun ka va luh hnawh hna. Rohlui ruak kan vui hnu a thaizing ahcun rohlui pa cu kan inn ah a rak kan leng i keimah te lawng ci hmun dang ah a ka hruai i rohlui a fanu a thih naak kong cu zaangfah tein rak ka chim tiin a ka hal i ka celh lo buin a pa cu thil sining cu ka chimh i a pa cu a lungfah celh loin ka hmaika ahcun attap i ka fanu rak ka ngaithiam ko mu na pa saantlailo tuk mi hi tiin a ttap.
Leave a Reply