Sagaing Ramthen, Kyweinpon Khua Kahdohnak SAC ralkap 20 Hrawng an thi, PDF 3 An Nunnak A Liam Ve

Sagaing ramṭhen, Kyweinpon khua ah SAC ralkap le PDF kar kahdohnak a chuak i, SAC ralkap 20 hrawng an thi, PDF 3 an nunnak a liam, tiah theih a si.

Sagaing ramṭhen, Kyweinpon khua ah umhmun a khuarmi SAC ralkap le Phyosawhti 100 hrawng cu a luancia August 29 ahkhan PDF tangrual phu hna nih Kyweinpon khua pawng Tawngmyain(တောင်မြိုင်) le Taungkyia(တောင်ကျား) khua ah an kahdoh hna, tiah (ကျောက်ဆည်) People Revolution Force(PRFK) in ralkap pakhat nih a chim.

PDF chung in nunnak a liammi hna cu, CDM a tuahmi Siangcachim U Lwin U, PDF hruaitu pakhat le PDF ralkap 1 hna an si, tiah theih a si. CDM a tuahtu siangcachimtu U lwin U cu a luancia May thla thawk khan a chungkhar cu SAC ralkap nih an tlaih hna i, atu tiang an thawngpang theih a si rih lo.

Sagaing ramthen, Sagaing peng, Kyweinpon khua pawng, Taungkyia le Taungmyain khua ah SAC ralkap nih a luancia August 29 ahkhan inn 160 hrawng an khangh. Kyweinpon khua cu SAC kuttang um Phyosawhti pawl tamnak hmun a si, tiah kan theih.

Myeik Khuami 2 Cu SAC Ralkap Nih PDF Nan Si Tiin An Tlaih Hna: Tanintharyi ramṭhen, Myeik(မြိတ်) pengkomh Kyunsu(ကျွန်းစု) peng in tualchungmi 2 cu nizan August 30 ah SAC ralkap nih an tlaih hna, tiah theih a si. Tlaih a tong mi hna cu Kyunsu peng in Ko Htun Win le Myeik Taung khua mi Ko Min Nge Soe hna an si, tiah theih a si.

Ko Htun Win cu Myeik khua, Kan Khaung (ကန်ခေါင်း) sang khual riahbuk pakhat ah zaan a ih lio ah an tlaih i, Ko Min Nge Soe cu Ko Htun Win nih a phuan ruangah amah he pehtlaihnak a ngei ti in an tlaih chih, tiah theih a si. Tlaih tongmi pahnih sin cun Pistol pakhat veve le kuan zeimawzat zong an tlaih chih, tiah tualchungmi pakhat nih a chim.

Tlaihkhih an tonnak kong he pehtlai in SAC ralkap nih cun “PDF an si, hriamnam chanh ah an kal” tiah an langhter nain PDF an si le si lo cu theih fian an si rih lo. Credit : The Chin Post