Sagaing Ramṭhen Le Mon Ramkulh Kahdohnak Thawng

Sagaing Ramṭhen Le Mon Ramkulh Kahdohnak Thawng: Sagaing ramṭhen, Shwebo peng, SikKhun khua ah umhmun a khuarmi SAC ralkap cu PDF nih an kah hna i SAC ralkap 3 hliam an tuar, tiah PDF nih an thanh. July 9 ah Shwebo peng, Sikkhun umhmun a khuarmi SAC ralkap hna nih mizapi a choklet mi hna cu phaisa an hal hna caah Shwebo pengkomh mizapi vengtu ralkap battalion 5 tatkhuai 3, C&T Shwebo ( LDF ), Snake Eyes (LDF), Shwebo Federal Army (SBFA), DaungMan (ဒေါင်းမာန်)-SHWEBO, Alpha-7(LDF), MDF SHWEBO, Bu KyuaYan(ဗိုလ်ကျားရိုင်း)-Shwebo, F .D .F le Shwebo 2 Pah-kah-phah hna i bawm in an kah hna tiah theih a si.

Cubantuk in Mon ramkulh, Tatone peng in Bilin khuapi lei ah a kalmi SAC ralkap mawṭaw run cu KNLA, PDF hna nih nihin zing suimilam 3:41 ah KaMaSine lamthluan ah bomb an puah hna i mawṭaw 4 an rawk, tiah Tatone TPDF nih an thanh. KNLA Brigade 1, Battalion 2, PDF battalion 2 le Tatone peng mizapi vengtu ralkap hna nih bomb an puah hna hnu ah hriamhme in an kah chap hna i, SAC ralkap mawṭaw 4 an rawh lengah a thimi zong an um nain a thimi zat tu cu fiangin kan thei kho rih lo, tiah Tatone TPDF nih an thanh.

Sagaing ramṭhen, Kanhbalu zong ah KanhBaLu pengkomh mizapi vengtu ralkap Battalion 3 (PDF) camp cu SAC ralkap nih nizan July 9 zingka te ah khan hmunthum in an kah hna. PDF pawl cu PaungPin um Khah- Mah- Yiah 367, Homalin um Khah- Mah- Yiah 369 le KyaukMyaing ralkap Khah- Mah- Yiah 12 hna nih an kah hna. PDF nih an camp cu caan karlak an chuahtak chung i PDF lei cu hliamtuar um lo in hnu an zaam kho, tiah theih a si. KanhBaLu hmunhram chung ah SAC ralkap nih hmun 5 in rallam an sial, tiah KanhBaLu mino Infinity Group nih an thanh.

Yangon, Hlaingtaya Ah Ralvengtu SAC Ralkap Bomb Puahhnawh An Tong I, 2 An Thi!: Yangon ramṭhen HlaingTaya peng Sat-hmuh-zung no.2, Ngawng(ညောင်) khuachung ah zaan ralvengtu SAC ralkap motor pakhat cu July 8, zinglei ah bomb puahhnawh an ton caah SAC ralkap 2 an thi, tiah theih a si. Zaan ralvengtu SAC ralkap 6 nih zulhmi motor pakhat chung ah bomb chehhnawh an si i SAC ralkap 2 an thih lengah pakhat hliamhma tuar, tiah Burmese Rangers Army – LDFUG nih cathanh an chuah.

“Ngawng(ညောင်) khuachung ah a luancia zarh khan SAC ralkap hna nih ralvennak an tuah i lampi i an tonmi hna mizapi sin in phaisa an hal hna. SAC ralkap hna cu i din ding in an dir lio ah bomb cu chehhnawh an si,” tiah Burmese Rangers Army – LDF UG phu in ṭuanvongeitu Bu Htat Wai nih a chim. Mizapi cu SAC ralkap hna he a hlatnak hmun ah um cio ding in le tualchung hriamtlai phu hna cu hmai an kal khawh nakhnga thazaang pe cio ding in Mizapi ralkap mipi sin nawlnak cathanh ah chuah. Credit : The Chin Post

Be the first to comment

Leave a Reply

Your email address will not be published.


*