Sagaing Ramṭhen Le Magwe Ramṭhen Micheukhat Hna Cu Sehzung Rian In An Chuah Hna!

Sagaing Ramṭhen Le Magwe Ramṭhen Micheukhat Hna Cu Sehzung Rian In An Chuah Hna!: Yangon khuapi i sehzung rianṭuannak hmun ah rianṭuantu, Sagaing ramṭhen 5/ID card aa tlaihmi hna le Magwe ramṭhen 8/ID card aa tlaihmi cheukhat hna cu a ruang langhter loin kan rian in chuah kan si, tiah rianchuah a tongmi cheukhat nih Media ah an chim.

“Nizaan August 1 in Mingalardon (မင်္ဂလာဒုံ) peng no.3 lampi Ti sehzung le EMC sehzung ah 8/ID le 5/ ID card aa tlaihmi rianṭuantu hna cu an rian in an chuah hna, rian in nan chuah hna lo ah cun sehzung hi kharpiak nan si lai, tiah sehzung ngeitu cu an tlerhkhonh hna. Atu tiang rian in an chuah mi hna cu minung zakhat renglo an si cang. Rianchuah a tongmi hna hi 8/Magwe ramthen ID card aa tlaihmi hna le 5/Sagaing ramṭhen ID card aa tlaihmi an si. Atu tiang rianchuah a tongmi hna chung in Ti sehzung ah minung 25 an si i, EMC sehzung in zeizat an si fiang in theih a si rih lo,” tiah rianṭuantu chekhat nih an chim.

Sagaing ramṭhen le Magwe ramṭhen in rianṭuantu hna nih PDF nan bawmh hna, tiah SAC ralkap nih an puh hna caah ralkap nih rian in chuahter ding in an ti hna. cu ruangah Sagaing le Magwe ramṭhen ID card aa tlaihmi cheukhat cu rianchuah an si, tiah theih a si.

Sehzung ngeitu pakhat nihcun, “Naite ah khan nawlngeitu hna nih sehzung ah rianṭuantu hna chung in Magwe le Sagaing ramṭhen ID card aa tlaihmi hna cazin pek ding in an kan hal,” tiah a chim. Yangon khuachung khual cazin pek tikah le, hotel um le inn hlan tikah 5/ le 8/ ID card aa tlaihmi hna cu SAC ralkap le nawlngeitu hna nih ṭha tein an chek hmasa hna, tiah theih a si. Credit : The Chin Post

Be the first to comment

Leave a Reply

Your email address will not be published.


*