Sagaing ramṭhen, Kani peng ah rallam a sialmi SAC ralkap pawl cu, Kani PDF nih nizan August 29 chun ah bomb an puahhnawh hna, tiah theih a si. Kani peng, Aitaung(အိုင်တောင်) khua in Tapetaw(သပြေတော) khua lei rallam an sial lio ah bomb lung 7 in kan puahhnawh hna, tiah B.21 KANI-PDF in Battalion Commander Bo Tin Myo(တင်မျိုး) nih a chim.
“Aitaung khua in Tapetaw khua lei ah rallam a sialmi SAC ralkap 70 leng cu, chun hnu sml 2:10 ah bomb lung 7 in kan puahhnawh hna. Cu bomb puahnak ah cun SAC ralkap 30 hrawng an thi, tiah ralkap chung ummi hna nih an chim,” tiah a chim chap.
SAC ralkap pawl nih cun Yianmarbin peng, Yinpawngtaing(ရင်ပေါင်တိုင်) khua le a pawng kam khua hna cu an khangh pinah Kani PDF nih bomb an puahhnawh hna hlan ah Wawtan(ဝါးတန်း) khua zong an khangh cang.
SAC ralkap pawl cu khoika Battalion dah an si ti hngalh a si lo nain, Monywa Nah Mah Kha in ralkap zong an i tel kho, tiah B.21 KANI-PDF ralkap chungtel nih an chim.
SAC Ralkap Le Pyusawhti Nih Taungmyo Khua An Khangh Caah Inn 50 Hrawng A Kaang!: Sagaing ramṭhen, Taungmyo(တောင်မြို့) khuate cu SAC ralkap le Pyusawhti nih nizan August 29 zinglei ah an khangh i, inn 50 hrawng a ciam, tiah theih a si.
Inn 300 hrawng a ummi Taungmyo khua cu, Cuaipone(ကြွယ်ပုံ) khua ummi SAC ralkap le Pyusawhti 40 hrawng nih kahdohnak um loin an khangh, tiah ZERO Guerrilla-Myinchan in ṭuanvo ngeitu nih a chim.
“Zing sml 9:30 hrawng ah Taungmyo khua kan va phan i, inn cu a rak kaang thluahmah ko. Khuami hna cu um thiam loin an um. PDF phu 4 i bawm in inn kaangmi cu kan phalh piak hna. Khuami zong thazaang peknak le forhfialnak bia kan chimh hna,” tiah a chim chap.
Taungmyo khua hi Chungkhar 300 leng an um i, a milu in minung 1000 leng an um, tiah theih a si. Credit : The Chin Post
Leave a Reply