SAC Ralkap Nih Uknak An Lak Thla 21 Chung Ah CDM Tuahtu Palik Le SAC Ralkap Thonghra Leng An Phan – NUG

SAC Ralkap Nih Uknak An Lak Thla 21 Chung Ah CDM Tuahtu Palik Le SAC Ralkap Thonghra Leng An Phan – NUG
============================
SAC ralkap nih hramhram uknak an lak thla 21 chung ah CDM a tuahtu SAC ralkap le palik cu thonghra leng an phan cang, cu chung ah palik hi 8000 leng an si i, ralkap hi 4000 leng an si, tiah NUG runvennak lei vuanci in U Naing Htoo Aung nih a chim.

Caan a rauh cang caah le hmaikal ralkap hna cu tualchung hriamtlai phu hna nih fak ngai in an hliamh cang hna caah hmailei ah cun atu nakin CDM a tuahmi an tam chin kho, tiah U Naing Htoo Aung nih a chim.

Kaphnih kar i kahdohnak ruang ah a tli-zaam mi SAC ralkap zong an um caah atu langhtermi cazin nakin, a tak le a leng ah an tam deuh kho, tiah a chimchap. A luancia zarh chung ah a hriamnam he CDM a tuahtu ralkap pakhat cu NUG nih sing 40mmk an pek. SAC ralkap hna nih SAC kuttang nawlngeihnak tang ah um duh lo in mipi lei kap ah dir le i fonh a duhmi hna cu cohlan in laksawng pek nan si lai, tiah NUG nih April thla ah khan an thanh.

SAC ralkap phu in mizei nan si poh ah vanlawng/helicopter he kan sin ah nan i fonh a si ahcun Myanmar phaisa sing thonghra; ral tuknak vanlawng, helicopter, thil phortu vanlawng, raltuknak tilawng hna hrawk in kan sin ah nan i fonh ahcun Myanmar phaisa sing thongruk, petrol khonnak, hriam sernak hrawh a siloah tank motor, kuan kham motor hna he nan i fonh a si ahcun Myanmar phaisa sing thonghnih pek nan si lai, tiah NUG nih an thanh.

Office of the Chief of Defense Staff – army cazin ning ah Myanmar ralkap hi minung thazaang singnga hrawng an um i, East Asia chung ah Vietnam ralkap changtu; a ngan bik pahnihnak an si.
SAC ralkap hna nih nawlngeihnak an lak hnu ah CDM a tuahtu, dohthlennak ah cawlcanghnak a tuahtu hna sin ah aa fonhmi ralkap thazaang 4000 cu an tlawm tuk nain, din lo le ngol lo tein kahdohnak a um caah le ramchung mipi hna nunnak lak in hramhram thilsual tuahnak kong ah ralkap tam deuh cu an lungthin a zor tuk cang, tiah CDM a tuahtu ralbawi hna nih an chim. Credit : The Chin Post