SAC Ralkap 50 Cu Faak Ngai In An Cawl Ruangah CDF-KKG Nih Gate Pakhat An Kaltak

SAC Ralkap 50 Cu Faak Ngai In An Cawl Ruangah CDF-KKG Nih Gate Pakhat An Kaltak!: Gangaw khuachung um SAC ralkap 50 cu faak ngai in an cawlcang i, hriam tamtuk an hman caah chekhlatnak gate pakhat kan kaltak tiah CDF-KKG nih nihin July 3 ah cathanh an chuah.

July 1, zinglei suimilam 6:50 hrawng ah SAC ralkap 40 hrawng cu CDF-KKG battalion 6 chekhlatnak gate ShungShi (ရှုံးရှီ) khua le AungMin (အောင်မြင်) khua kar ah an i choklet i zohfelnak zong an tuah caah CDF-KKG battalion 6 le PDF-Gangaw chaklei phufonh he minutes 30 hrawng an i kap.

Cu kahdohnak ah cun tualchung hriamtlai phufonh lei hliamhma tuar le a thimi an um lo nain SAC ralkap nih khuami pakhat cu ralphaw ah an tlaih i an kalpi, ShaukPin(ရှောက်ပင်) khuami hna phone cu an chuhpiak hna i, an i kalpi, tiah CDF-KKG nih an thanh.

SAC ralkap lei minung thazaang an ṭhawn deoh ruangah le hriam thazaang an i thlau deoh ruangah CDF gate cu kaltak a si. AwngMin(အောင်မြင်) khuachung ah umhmun a khuarmi SAC ralkap hna cu tualchung hriamtlai phufonh nih luhhnawh ding in timhtuahnak kan ngei nain, SAC ralkap nih khuami hna cu ralphaw i an tlaih hna caah kan hlawhtling lo tiah an thanh chih.

Zu A Ding Lio Mi SAC Ralkap Hna Cu Drone In Doh An Tong I 12 An Thi: Sagaing ramṭhen Chawng U pengchung ah June 2 zaanlei suimilam 4:00 hrawng ahkhan Zu (ထန်းရည်) a ding lio mi SAC ralkap hna cu drone in kahdoh an ton caah SAC ralkap 12 hrawng an thi tiah theih a si. SAC ralkap 30 hrawng cu Chawng U peng NgaShan(ငါးယှန်) khua pawng Zu dawr i(ထန်းရည်) i zu an din lio ah, tualchung hriamtlai phu nih drone in an kah hna i, Zu dawr chung um mi SAC ralkap 12 an thi, tiah Myaung peng tualchung hriamtlai phu CDSOM in ṭuanvo ngeitu Bu Min Watkha (ဗိုလ်မင်းယက္ခ) nih a chim.

July 1 zong ahkhan SAC ralkap 50 hrawng nih zulhmi motor ngan pakhat cu Myinmu peng GwayPinṬaw(ဂွေးပင်တော) le BuMinGyiKin(ဘိုးမင်းကြီးကင်း) khua kar ah CDSOM le tualchung hriamtlai phufonh hna nih bomb lung 10 le hriamngan in an rak kahdoh hna i, cu kahdohnak ah cun SAC ralkap 15 an thi, tiah theih a si. Credit : The Chin Post