Rakhine-Bangladesh Ramri Mengtung 40 Nak I SAC Ralkap Sakhan Cu AA Nih an Lak, SAC Ralkap 19 an Thi! + Kahdohnak Thawng

Nizaan August 31 ah, Rakhine-Bangaladesh ramri mengtung 40 i SAC ralkap sakhaan cu Arakan Army(AA) nih an kahdoh hna i, SAC ralkap 19 an thi, an sakhaan zong an lak pinah hriamnam zeimawzat zong kan lak khawh tiah theih a si.

Rakhine-Bangladesh ramri mengtung 40 sakhaan pawng hrawng ah cun nihnih chung kahdohnak a chuak i, Paletwa le hmun dangdang hna zong ah thlakhat chung hrawng AA le SAC ralkap kar kahdohnak a chuak, tiah theih a si. SAC ralkap nih hriamngan cu mengtung 34, 38, le 39 karlak hmun hrawng ah nichiar in an thlah.

Helicopters le Jet Fighter zong in vanlei kahdohnak an tuah lengmang caah tualchung mi 3 an nunnak a liam i, lehrulh chamnak ah tiin mengtung 40 i SAC ralkap sakhan cu nizaan August 31 zinglei sml 9 hrawng ah kan kah, tiah AA nih an thanh

Cu kahdohnak ah cun hliam faak ngaiin a tuar i a thi rih lomi ralkap (Duh-Tat-Kyat) pakhat dah ti lo a dang SAC ralkap 19 cu an thi dih. Kanmah AA lei zong a thimi le hliamtuar mi kan um, tiah an langhter .

Cu bantuk ṭhiam in nizaan August 31 zaanlei sml 2:40 hrawng ah Paletwa peng, Meikwah(မြိတ်၀) khua pawng ah SAC ralkap le AA kar kahdohnak a chuak i, SAC ralkap 10 cu kan mithmuh ah an thi, tiah AA lei nih cun an thanh.

Magwe Ramṭhen, Pauk Peng Ah Phyosawhti Motor Kahdoh An Tong I 5 An Thi!: Magwe ramthen, Pauk(ပေါက်) peng ah SAC ralkap tirawl chan ding in a kalmi Phyosawhti hna cu Pauk-Pathein-Monywa lamtonnak ah, August 31 zaanlei sml 2:20 hrawng ah tualchung hriamtlai phu nih an kahdoh hna i, Phyosawhti 5 an thi, 2 hliam an tuar tiah Pauk Revolution Front nih an thanh. Cu kahdohnak ah cun Pauk Revolution Front(PRF), Knight Commander King Fighter, Pauk Bataillon 4 le Local PDF hna an i bawm, tiah theih a si.

Myaung Peng Ah SAC Hriamngan Kahnak In Tualchungmi 3 An Nunnak A Liam, 11 Hliam an Pu!: Sagaing ramthen, Myaung peng, Tayatkung(သရက်ကုန်း) khua ah SAC ralkap an um ti rua lo tiah ruat in nizan Aug 31, zaan sml 11:30 hrawng ah khua a hlam mi ralzaam cheukhat hna cu SAC ralkap nih an kah hna i, tualchung mi 1 a nunnak a liam lengah 5 hliam an tuar, tiah CDSOM nih a thanh.

SAC ralkap hna cu nizaan August 31 zinglei ahkhan Tayatkung khua ah lut in, Zeekung(ဇီးကုန်း) khua cu hriamngan in an kah, tiah theih a si. Cu hriamngan kahnak ruang ah cun Zeekung khuami 2 an nunnak a liam i, 6 nih hliam an tuar tiah khuami nih an chim.

SAC ralkap hna cu Myaung peng, Kyaukyit(ကျောက်ရစ်) sakhan ah umhmun an khuar i rallam sial an i tim, tiah theih a si. Credit : The Chin Post

Be the first to comment

Leave a Reply

Your email address will not be published.


*