Raikhamsii Aa Chun Lomi Tam Biknak Ram Ah Myanmar Aa Tel!

Raikhamsii Aa Chun Lomi Tam Biknak Ram Ah Myanmar Aa Tel!: Vawleicung i raikhamsii aa chun lomi ngakchia an tam biknak ram hna lakah Myanmar ram zong aa tel ve, tiah UNICEF nih nihin(July 15) i report an pek mi ah an langhter. A luancia 2021 chung ah vawilei cung ram pumpi ah ngakchia sang 25 cu raikhamsii voi 2 tiang aa chun kho lomi an si i, cu chung ah sang 18 cu voikhat hmanh an i chun kho lo. Myanmar ram ah cun 2019 in 2021 tiang ah ngakchia 100 ah 60 cu chuahka te i raikhamsii voikhat hmanh chunh khawh lo in an um, tiah an langhter.

Covid zawtnak ruang le ram buai ruangah ngakchia tampi cu raikhamsii i chun kho lo in an um. Raikhamsii i chunh lo ahcun lungrethei a si i, raikhamsii in i runven khawh mi zawtnak pawl an ngei kho, tiah UNICEF lawng siloin WHO zong nih ralrin peknak a ngeih.

UNICEF nih ca a chuah mi ah raikhamsii aa chun lo mi ngakchia an tam biknak ram hna cu India, Nigeria, Indonesia, Ethiopia, Philiphines, Myanmar le Mozambique ram hna an si. Myanmar le Mozambique hi 2019 in raikhamsii aa chun lo mi ngakchia an tam khunnak ram an si.

Vawilei cung ram vialte ah ngakchia caah raikhamsii chunh dih ding in i zuam cuahmah lio a si, nain Myanmar ram ah cun ralkap nih uknak an laak caah harnak tampi a um. Uknak laak hnu in Myanmar ram ah ngakchia sang 5 cu bawmhnak an herh, tiah UNICEF nih an langhter. Unak lak hnu in vanlawng le hriamngan kahnak ruangah ngakchia 382 an thi cang i, pumtlamtling lo ah aa chuah mi zong an tam, tiah nuhrin covo lei rianngeitu Tom Andrews nih UN council committee ah a chim. Credit : The Chin Post

Be the first to comment

Leave a Reply

Your email address will not be published.


*