R.I.P : Thantlang Ralzaam Ngakchia Pakhat Cu Khuaingal Seh Nakin A Nunnak A Liam

Thantlang Ralzaam Ngakchia Pakhat Cu Khuaingal Seh Nakin A Nunnak A Liam! Chin ramkulh, Thantlang peng Vambai khua ah ralzaam dirhmun a phan mi kum 4 ngakchia pa Cung Khua Lian cu, nizan August 7 chun sml 12:00 hrawng ah an inn pawng ummi khuaingal nih a seh caah zan sml 7:00 hrawng ah a nunnak a liam, tiah theih a si.

Khuaingal cu an inn pawng ah bu an ser i, a seh hnu ah Tikir sii-inn ah an kalpi ko nain an khamh kho ti lo. Cung Khua Lian a chungkhar cu Thantlang Saih Pyo Zi sang ah a ummi an si i, SAC ralkap nih Thantlang an khangh hnu in Vambai ah a zaam mi an si. Credit : The Chin Post

thawngpang dang relchap : Mindat Khuachung Ah Biaknak Lei Hruaitu Hna Tawlrelnak Lawng In Facang Cawknak Nawl An Pek Hna!

Mindat Khuachung Ah Biaknak Lei Hruaitu Hna Tawlrelnak Lawng In Facang Cawknak Nawl An Pek Hna!The Chin Post | 8 August 2022 : Chin ramkulh chung ah fak ngai in kahdohnak a chuahnak hmun Mindat ah zapi eimi facang cu SAC ralkap nih rikhiah in an zuar, tiah tualchung mi nih an chim. Atu tiang ah tualchung mi hna cu Biaknak lei hruaitu hna nih ṭuanvo an lakpiak hna lawng ah facang cawknak nawl pek an si, tiah Mindat khuami pakhat nih media ah a chim.

“Kan herh zat in cawk khawh cu a si ko nain inn ah i chiah cu sianh a si lo. SAC ralkap nih rikhiahnak an tuah i Biakinn chung ah chiah a si. Rawl chumh a herh tik ah Biaknak lei hruaitu pakhat nih ṭuanvo lakpiak hnu lawng ah an kan thoh piak” tiah a chim. SAC ralkap hna nih cun a luancia August ni 6 in facang tun khat ah Ks. 40,000 in an zuar, tiah a chim chap.

SAC ralkap nih uknak an lak hnu ah CDF-Mindat le SAC ralkap kar kahdohnak a chuah thawk in, Mindat khuachung ah facang telh in zapi nih eimi thilri phorhnak nawl SAC ralkap nih an phih.

Kaphnih kar kahdohnak ruang ah Mindat khuachung um mipi 9000 leng cu mah umnak innlo kaltak in ralzaam dirhmun an phan, tiah ralzaam bawmchantu hna nih an chim.credit:the chin post