R.I.P : Thailand Ah Motor Khawndennak In A Thimi Chin mi 3 Cu Nihin ah Mae Sot ah An Vui Hna

Thailand Ah Motor Khawndennak In A Thimi Chin mi 3 Cu Nihin ah Mae Sot ah An Vui Hna
==============================
Malaysia ah kal aa timmi Myanmar mi hna cuannak mawṭaw cu Thailand ram ah August 17 ahkhan aa let i, Chin mi pa 3 le Rakhine mi pa pakhat cu an nunnak a rak liam.
Nunnak a liammi hna ruak cu Myanmar ram ah kuat a ngah lo caah, Myanmar he aa naihnak Mae Sok(မဲဆောက်) Khrihfa thlanhmun ah Mingalar khrihfa bu nih ṭuanvo lak in nihin August 28 ah ruak vuinak an tuah, tiah theih a si.

Nunnak a liammi hna cu, Kalaymyo Indaikung sang ummi fa pakhat ngei; Pu Hu Lian (kum 26), Kalaymyo peng General Administration Department ah ṭuan i CDM a tuahtu Tanpho(သံဖို) khuami fa pahnih ngei Pu Za Nei Khup(kum 30) le Yangon ummi Ko Kyaw Lin Naing(kum 27) hna an si. Rakhine pa pakhat ruak tu cu kawl biaknak phungning in mei khanghnak in ruak thlahnak an tuah lai, tiah theih a si.

Nunnak a liammi hna he hmunkhat ah motor a cuangṭi mi hna hi minung 33 an si i, thingkung an i pah sual, tiah theih a si. Khawndennak an tonka ah cun minung 3 cu an thi colh i, pakhat cu sizung a phanh hnu ah a nunnak a liam ve. Hliam faak a pu lo mi poh cu an zaam dih, tiah theih a si. Credit : The Chin Post