R.I.P : Bank Maneger ruangah CDF Zotung ralkap bawizik le a naule pahnih cu Ralhrang nih an thah hna

KBZ Bank Maneger ruangah CDF Zotung ralkap bawizik le a naule pahnih cu SAC nih an thah hna!
====
2022 kum July thla chung i Gangaw in Chin Ramkulh Matupi Peng Zotung ram Ramci khua i tlaih a tong mi minung 27 hna cu August 3 zinglei sang ah an thlah hna nain CDF Zotung ralkap bawizik Salai Tha Ceu le a naule pahnih hna cu ralhrang nih an thah hna tiah theih a si.

Khuami minung 27 an tlaih hna hi 2022 July 22 ah a si. August 3 ah an thlah than hna i khuami hna nih hmun khat te ah a himnak ah an chiah hna tiah kan theih. Hi kong he pehtlai in CDF Zotung min langhter duh lo ralkap pakhat nih, “Khuami minung 27 cu him tein an rak thlah than hna i hmun khat ah chiah an si. Khuami tu hi cu an him. An tha ko,” tiah CCN ah a chim.

Cun CDF Zotung ralkap bawizik le a naule an thahnak kong he pehtlai in, “Kan ralkap bawizik le a naule pahnih hna hi Ramci khua ralzaam hna zoh an kal lio ah an tlaih hna. KBZ bank Maneger pa (CDM tuah lomi) hi an tlaih i amah nih lam a hmuhsak hna lai tiah kan ruah.

Khuami cu an thlah hna nain ruak an khangh mi cu Ramci khua pawng ah kan hmuh. Hi an khangh mi hna hi CDF Zotung ralkap bawizik Salai Tha Ceu, Aung Min Thang le Tha Cin Mang an si lai tiah zumh dih a si. An nih hi an tlaih hna ah meithal zong an i ken,” tiah CCN ah a chim.

Salai Tha Ceu CDF Zotung ralkap bawizik hna hi ralzaam sining zoh ding an kal lio ah meithal a tawimi pakhat le a saumi pakhat in an tlaih mi hna a si i nithaizing ruak khangh mi hna hi anmah an si lai tiah khuami le rian ngeitu nih zumh dih cio a si.

CDF-Zotung Chungtel 3 Cu SAC Ralkap Nih Meikhangh In An Thah Hna! CDF-Zotung Commander in chief Thah Ceu telh in minung 3 cu SAC ralkap nih July 27 ah meikhangh in an rak thah hna, tiah CDF-Zongtung nih cathanh an chuah. SAC ralkap hna cu a luancia July 22 ah Chin ramkulh, Matupi peng Rangcci khuachung ah lut in, khuami 27 cu Biakinn chung ah an rak tlaih hna.

CDF-Zotung in chimphuannak nawlngeitu pakhat nih a chim ning ah cun, “CDF-Zotung commander in chief pakhat le ralkap 2 hna nih khuami tlaih a tongmi hna hrem an ton le ton lo a thli in an veh hna lio ah SAC ralkap nih July 23 ah an rak tlaih hna.

Khuami nih cun tlaihkhih an ton zong an rak thei hna lo. July 27 SAC ralkap nih an ruak an khanghmi rim cu kan theih, an ruak cu aho an si theih fian a har ngai nain minung 3 an si caah, commander in chief le a ralkap an si ko lai tiin kan fehter” tiah a chim.

SAC ralkap kut in thah a tongmi hna cu CDF-Zotung commander in chief Thah Ceu kum 40 hrawng, CDF-Zotung Aung Ming Thang le Thang Cing Mang kum 20 hrawng an si. SAC ralkap nih an tlaihmi khuami 27 hna cu nihin August 3 ah an thlah ṭhan cang hna, tiah theih a si.