R.I.P : Aibur Khuami Pu Mawng Kil (Ngun Hlei pa) Nih Ruahlo Tukin A Kan Liam Taak E

Beth Israel International & CMC Myanmar. Aibur Beth Israel chungkhar Deacon Minister a si mi Pu Mawng Kil (75) Ngun Hlei pa nih 10/8/2022, 2:00 PM ah Vawlei harnak kaltaak in YAHUAH ELOHIM thladem toiah a kan dinh tak cang. YAHUAH ELOHIM nih a Kaltaak mi chungkhar hna le a hruaimi a Turun dihlak cungah hnangam daihnak thluachuah cu pe ko hna seh.

Ngaihchia mi chungkhar nan Ngaihchiatnak kan i hrawmh pi hna. Ruak Vui caan cu Thaizing 11/8/2022, 10:00 AM ah a si te lai. Ruak Vui tu Tlangbawi Pu Za Sang Lian Uk (Dim Dim pa) a si. Pu Mawng Kil Aibur khua a dawtu hna le Beth Israel chungkhar khuakip um mi hna nih Ngaihchia mi chungkhar caah le thaizing caan an hmannak ding ca’h Thlacamnak in bawm cio hna u sih.

Pu Mawng Kil cu Beth Israel Chungkhar nih kan i bochan ngai ngai mi a si. Yah Elohim bia a duh tuk mi a si. Hlasak a thiam i a aw zong a țha ngai ngai a si. Ram le miphun caah tilo le rawllo in thla a cam tawn mi kan pa si. A kan liam taak cu minung lei cun kan ngaih a chia ngaingai ko. Thiang Thlarau nunnak lei cun mi vanțha a si kha kan hngalh caah kan hna a ngam i YAHUAH ELOHIM min kan thang țhat ko.

Isaiah 26:19 Kan mi hna a thimi kha an nung ṭhan lai! An pum kha a nung ṭhan lai. An thlan i a itmi vialte kha an i hlau lai i lunglawm in hla an sa lai. Dapti nih vawlei cu a hrinter ṭhan bantukin a thi ciami cu YAHUAH nih a nunter ṭhan hna lai.

Shalom! HaleluiYah! Note: Thihnak a ruang Pawpi zawtnak a si. Ruak umnak le Vuinak cu Aibur khua Thantlang Township a si. Credit: Rabbi Ephriam Lian, Rum Chairman Beth Israel & CMC Myanmar

Be the first to comment

Leave a Reply

Your email address will not be published.


*