Paletwa Peng Ah Arakan Army(AA) Nih Ngunkhuai An Kholh Hna Caah Harnak An Tong!

Paletwa Peng Ah Arakan Army(AA) Nih Ngunkhuai An Kholh Hna Caah Harnak An Tong!: Chin ramkulh Paletwa peng nitlak lei kap Pichaung(ပီချောင်း) khuakomh cu Arakan Army(AA) nih khuakhat ah Kyats singkhat (100,000) cio in ngunkhuai an kholh tawn hna i, thlafatin ngunkhuai pek cu a har tuk hringhran, tiah Pichaung khuami pakhat nih a chim.

Pichaung khuami pakhat nih cun, “Kan khua cu thlakhat ah singkhat tling tein kan pe kho ti lo, an kan zaangfah i Ks 90,000 kan pek. Pek cu kan duh lo, a harsa deuh mi chungkhar cu mah ei awk hmanh tamtling in an ngei kho hna lo, pek lo awk le a ṭha tlung lo i, docawi chawm zong in a pe mi an um,” tiah a chim.

Pichaung khuakomh cu Paletwa peng nitlak lei Bangladesh ramri ah a ummi a si. khuakomh 9 a um i, AA nih nih an uk nak hmun a si. Pichaung khaumi pakhat nih cun, “Kan khua hi inn 20 tluk kan si i ngunkhuai an kholh ning ka theih ning ah Khawai(ခဝဲ) pawl cu 100 leng an si caah Kyats 200,000 an hal hna i, a dang khua pawl cu Kyats 100,000 cio an hal hna,” tiah a chim.

Atu bantuk in AA nih phaisa an hal hna caah SAC ralkap sinah khuami cheukhat nih report an pek pah hna, tiah tualchung mi sin in theih a si. AA nih ngunkhuai an kholhnak cu SAC ralkap nih uknak an laak hlan khan a si cang i, uknak laak a si hnu ah SAC theihpinak in kholh a si, tiah tualchung mi cheukhat nih cun an chim.

Matupi Peng Kahdohnak Ah SAC Ralkap 4 An Thi + KyaukKyi kahdohnak: Chin ramkulh Matupi peng Sawngṭhi(စောင်ထီး) khua ke Lungtuam(လုံတွမ်း) khua karlak ah nihin July 11 zinglei suimilam 9:50 hrawng ah CDF-Matupi le SAC ralkap kahdohnak a chuak i cu kahdohnak ah cun SAC ralkap 4 an thi, 2 hliamhma an tuar, tiah CDF-Matupi nih cathanh an chuah.

Pako ramṭhen, KyaukKyi(ကျောက်ကြီး) peng Innat khua ah nihin July 11 zinglei suimilam 3 in SAC ralkap le KNU ralkap hna cu faak ngai in an i kap i, cu kahdohnak ah cun SAC ralbawi (ṭaṭ-yin-hmu) pakhat telh in ralkap 10 an thi tiah Pako tualchung hriamtlai phu battalion 3702, BPDF- Yoma in ṭuanvo ngeitu pakhat nih a chim.

“A luancia June 25 khan kahdohnak a chuak cang. nihin i a thi mi hna relchih in SAC ralbawi 5 le palik bawi 2 he an dihlak minung 57 an thi cang,” tiah Pako tualchung hriamtlai phu battalion 3702, BPDF- Yoma in ṭuanvo ngeitu nih cun a chim. Credit : The Chin Post