Pago Ramṭhen Ah Ralkap Pakhat Cu Tang Sarih Siangngakchia Pa Nih Nam In A Sawh

Pago Ramṭhen Ah Ralkap Pakhat Cu Tang Sarih Siangngakchia Pa Nih Nam In A Sawh: Pago ramṭhen, Pyi pengkomh, Hmawza khuakomh ah sianginn humhimnak a latu SAC ralkap pakhat cu tang sarih siangngakchia pa nih nam in a sawh i, siangngakchia pa cu a zaam. A zaam lio ah ralkap nih meithal in an kah caah hliamhma fak ngai a pu, tiah theih a si.

Hmawza khuakomh sianginn ah humhimnak a latu ralkap pa cu runvennak thilri chuahnak sehzung in Aung Myint Myat a si. Nam sawhtu ngakchia pa cu ralkap nih an kah i an tlaih, tiah tualchung mi pakhat nih a chim. “Ralkap pa cu a ban ah a sawh. Ngakchia pa cu meithal hma a put caah sii-inn a phan,” tiah a chimchap.

SAC ralkap pawl nih ngakchia pa cu an dawi i an kah caah a dang siangngakchia hna zong a himnak ah an zaam. Nam sawhtu ngakchia pa cu a thih le thih lo hngalh a si rih lo. SAC ralkap kut civil mi a thimi cu 2145 an si cang i, tlaih a tongmi hi minung 11865 tiang an phan cang, tiah thongtla zongkhenhtu phu AAPP nih nizan August 2 ah an langhter. Credit : The Chin Post

thawngpang dang relchap : R.I.P : Chinmi Sianginn Hngakchia 2 Cu Kawl Ralhrang Nih An Kah Thah Hna Apoi Taktak Si

Paletwa Ah Sianggakchia Thlahtu Tilawng Cu SAC Ralkap Nih An Kah I Siangngakchia 2 Nunnak A Liam! Chin ramkulh Paletwa ah siangngakchia a thlah/dongtu tilawng pakhat cu SAC ralkap nih an kah caah siangngakchia 2 nunnak liam i, midang 3 hrawng hliamhma an pu, tiah khuami nih an chim.

Cu tilawng cu Paletwa peng Yimawah (ရီးမဝ) khua in Tungmawah (တုံးမဝ) khua sianginn ah nitin siangngakchia a thlah/dongtu tilawng a si i, nihin chun cu a kir lei ah Hnamada(နှမဒါ) khua tilawng dinhnak hmun ah umhmun khuarmi SAC ralkap nih an kah, tiah mit hmutu khuami nih an chim.

Cu tilawng chung ah cun siangngakchia 10 hrawng an cuang i, SAC ralkap kahnak in ngakchia 2 cu an nunnak a liam, tiah theih a si. SAC ralkap nih tilawng an kah hnu ah, cu tilawng cu tiva kam ah dirter in tilawng khaltu le sianginn rianṭuantu hna cu an tlaih hna i tilawng chung ah a ummi ngakchia zong bia an hal hna, tiah min langhter duh lo mi pakhat nih media ah a chim. Credit : The Chin Post