Myaung Peng Ah Rallam A Sialtu SAC Ralkap Cu Mipi Ralkap Nih An Kahdoh Hna Caah 19 An Thi

Myaung Peng Ah Rallam A Sialtu SAC Ralkap Cu Mipi Ralkap Nih An Kahdoh Hna Caah 19 An Thi Sagaing ramṭhen, Myaung peng ah rallam sial in a lutmi SAC ralkap hna cu mipi ralkap nih an kahdoh hna caah minung 19 an thi tiah Civil Defense and Security Organization Myaung (CDSOM) in Ko Nway Oo nih a chim.

March ni 21, zanlei suimilam 4:00PM hrawng ah Myaung peng Myitsone le Paukchaung hmunhma ah minung thazaang 200 hrawng he rallam a sialtu SAC ralkap ṭatmah 99 kuttang um ralkap hna cu tualchung hriamtlai phu nih an kah doh hna. Kaphnih i kahdohnak suimilam 2 hrawng a rauh hnu ah SAC ralkap lei in minung 19 an thi tiah theih a si.

Rallam sialtu SAC ralkap hna hi Myinmu peng tualchung mipi hna cung ah tlaihhrem in thahnawnnak a tuahtu an si. A luancia March ni 13 in Myaung pengchung ah an lut i tualchung hriamtlai phu hna he kahdohnak a chuak. March ni 15 kahdohnak ah SAC ralkap 8 an thi, March ni 16 kahdohnak ah 9 le March ni 21 kahdohnak ah 19 tiin ni thum chung kaphnih kar i kahdohnak ah SAC ralkap 36 an thi tiah theih a si.

SAC ralkap hna cu CDSOM , Justice Revolution Force – Myaung, Myingyan Ranger, Burmese Guerrilla Force-BGF (Myingyin), Leopard Mobile Defense Force – Myaung telh in tualchung hriamtlai phufonh hna nih kuan 2000 le Enaga bomb lung 20 hmang in an kahdoh hna. Credit : The Chin Post