Myanmar Ram In Nikhat Chung Ah Covid Zawtnak Ngei Mi 90 leng An Phan, Minung Pakhat A Nunnak A Liam

Myanmar ram in nikhat chung ah Covid zawtnak a ngei, tiah fehtermi mizaw thar minung 90 leng an phan. Cu chung ah zatuak 93.3(93.3%) cu ramchung i chawnhnak a si, tiah SAC ralkap kuttang um ngandamnak lei department nih September 1 zaanlei ah cathanh an chuah.

A luancia suimilam 24 chung ah minung 8,439 cu checknak an tuah hna i, cu chung ah Covid zawtnak a ngei ko tiah fehter mi 94 an si tiah an langhter. Covid zawtnak ruang ah minung pakhat a nunnak a liam áš­han caah Covid zawtnak in nunnak liammi dihlak hi minung 19,439 an phan cang.

Ramchung dihlak huap in Covid-19 zawtnak aa chawnhmi dihlak hi minung 615,315 an si i, cu zawtnak in a dam cang mi hna cu minung 593,652 an si.

Atu langhtermi hna cu SAC ralkap uk duhlonak langhter in CDM a tuahtu siizung, Laboratory test room hna telh lo in SAC ralkap kuttang um siizung hna le ralkap siizung tam deuh ah checknak tuahmi lawng an si caah ramchung ah covid zawtnak a ngei taktak mi fianh khawh a si lo.

NUG kuttang um ngandamnak lei vuanci department nih cun, Covid-19 zawtnak thar i chawnhnak cu a luancia zarh chung ah vawlei cung hmunkip ah a karh, tiah WHO nih an thanhmi zohchoh in cathanh an chuah. Credit : The Chin Post

Be the first to comment

Leave a Reply

Your email address will not be published.


*