Myanmar Ralzaam Ca Ah Ramri Lonh In Bawmhnak Pek Khawh An Si Nakhnga Thailand An Nawl!

Myanmar Ralzaam Ca Ah Ramri Lonh In Bawmhnak Pek Khawh An Si Nakhnga Thailand An Nawl!: Myanmar rambuai ruang i a zaam mi hna bawmhnak pek khawh an si nakhnga ramri lonhnak nawl pe ding in Thailand cu International Refugees phu nih nawlnak a ngeih. Myanmar ralzaam hna ca ah mibawmchantu phu bawmh a herh tuk nak hmunhma pawl ah bawmhnak pek ding cu nawlngeitu hna nih phihkhamnak an tuah ti in Refugees International nih July 12 ah an thanh.

Ralzaam hna cu Myanmar ram innpa hna nih an bawmh khawhnak lam a tlawm ngai, cu lakah a bik in Thailand-Myanmar ramri ah a cawlcaang mi hna bawmh khawhnak lam cu a tlawm hringhran.

Ramchung ah lut in bawmh an herhnak hmunhma pawl ah fawi tein bawmhnak pek an si khawh nakhnga Thailand lei in Myanmar ramchung nawlngeitu lutlai hna le tlang cung um mibawmchantu hna lengah ngandamnak lei rianṭuantu phu hna he i bawm in rianṭuanṭi a hau, tiah International Refugees group nih report an pek mi ah an langhter.

Myanmar ram innpa a si mi ram hna nih Myanmar ralzaam hna cu an umnak hmun kirter loin an himnak tu sersiam piak an hau i, NGO zong nih a phan thar mi ralzaam zong luhnak nawl pek a herh ti in report an pek mi ah cun an langhter.

Atu tiang ah Myanmar ram mi minung sang khat (1,000,000) leng cu an umnak hmunram chuahtak in ralzaam dirhmun an phan i, cuchungah minung 750,000 leng cu uknak laak hnu in a zaam mi an si hna.

Taze – KanthBaloe Ah SAC ralkap Buk(Gate) Kah An Tong I, Ralkal 4 An Thi I, Zeimawzat Hliam An Tuar: Sagaing ramṭhen, Taze – KanthBaloe (ကန့်ဘလူ) ramri KanthBaloe peng NgaYantDai(ငါးရံ့ဒိုင်း) khua pawng i SAC ralkap buk(gate) cu July 12, chunhnu suimilam 2:00 hrawng ah Taze PDF nih a hmunhlat kahnak bomb in an kah hna caah SAC ralkap 4 an thi i, 12 hrawng cu hliamhma an tuar, tiah theih a si.

Cu kahdohnak cu Ṭaze PDF, Shwebo pengkomh battalion 6 le 16 phufonh nih an tuah, tiah theih a si. Kahdohnak a dih hnu ah SAC ralkap lei a thimi le hliamhma tuarmi hna cu KanṭhBaloe (ကန့်ဘလူ) peng Hmawṭaw(မှော်တော်) khua ah mizaw phorhnak motor pakhat le motor dang pakhat in an kalpi hna, tiah theih a si.

July 11, zinglei suimilam 10:00 hrawng zong ah Taze peng InKokka(အင်္ကုက္ကား) khua ah umhmun a khuarmi pyusawhṭi hruaitu Sein Cho umnak inn cu PDF phufonh nih an kah caah minung 2 an thi, tiah theih a si.

Cu kahdohnak cu Ṭaze PDF, Shwebo pengkomh battalion 6, 10, TRF battalion 16, K.P.K, TSR, Taze Tiger, Nine Star le tualchung hriamtlai phufonh nih an tuah i, tualchung hriamtlai phufonh lei hliamhma tuar um lo in hnu an tolh, tiah theih a si.

June thlachung ahkhan InKokka khua ahhin SAC ralkap le tualchung hriamtlai phu karlak kahdohnak voi 3 a chuak i, cu kahdohnak ah cun SAC ralkap le pyusawhṭi 26 an thi i, hliam tuarmi zong an rak tam ngai, tiah theih a si. The Chin Post