Model Thin Zaw Wint Kyaw Luat Khawh Nak Ding Ah SAC He Caihhmainak Kan Ngei – SSPP

Model Thin Zaw Wint Kyaw Luat Khawh Nak Ding Ah SAC He Caihhmainak Kan Ngei – SSPP: Tlaih a tong mi lemcang thiam le model Thin Zar Wint Kyaw cu luatnak a hmuh khawh nakhnga SAC he caihhmainak kan ngei, tiah SSPP/SSA in chimphuannak nawlngeitu General Sai Bung Han nihin July 7 ah RFA ah a chim.

Thin Zar Wint Kyaw cu SSPP/SSA headquarters umnak Shan ram chaklei Wamhai ṭhanchonak ding ca ah zuk thlaknak a ngei i, dih hnu ah July 6 chunhnu ah khan Wamhai in Lashio a kir lei ah Shan ram chaklei KyaeTi(ကျေးသီး) le Shan ram thlanglei MaiRel(မိုင်းရယ်) peng ramri NamhLawng(နမ့်လောင်း) hleidonh ah SAC ralkap nih an tlaih, tiah SSPP nih a thanh.

Thin Zar Wint Kyaw lawng siloin amah ṭamhtu le pa pali, an dihlak minung 6 cu tlaih an si. Luatnak an hmuh khawh ṭhan nakhnga kaphnih in caihhmaiṭinak kan ngei, tiah general Sai Bung Han nih cun a chim. SAC ralkap lei ṭang in SAC ralkap thawng a thanhtu Han Ngein Oo nih amah telegram ah model Thin Zar Wint Kyaw nih SSPP thuam he aa thlakmi hmanthlak cu zamh in, tlaih ding a si tiah a langhter. Thin Zar Wint Kyaw tlaih a tonnak kong he pehtlai in SAC ralkap lei nih thawng thanhnak an tuahmi a um rih lo.

SSPP cu ramkulh le ram pumpi in remdaihnak ah min an thu nain, Nationwide Ceasefire Agreement(NCA) ah cun min thutnak an tuah lo. SSPP cu SAC ralkap nih sawmmi daihnak ding ca tonbiaruahnak ah tel ding in cazin petu tlangcung hriamtlai phu 10 chung ah aa telmi an si nain, nihin tiang ah SAC ralkap he tonbiaruahnak an ngei rih lo.

RELCHAP: Gangaw Ah Commando Ralkap Dirh In Raltuk Cawnnak An Tuah!: Magwe ramṭhen, Gangaw pengkomh chung ah kahdohnak a chuah tawn caah mizapi ralkap lei faak deoh in an cawlcangh khawh nakhnga commando ralkap training kan tuah, tiah mizapi ralkap, nitlak lei brigade 7 battalion 703 in ralbawi (ṭaṭ-yin-hmu) Ko Soe Moe nih Maylatt Athan ah a chim.

Cu commando ralkap training cu a luancia June thla 15 in thok a si i, cu training ah a kaimi hna cu raltuk cawnnak a dihcia mi an si hna i thlakhat le cheu hrawng kan rau kho, tiah Ko Soe Moe nih cun a chim. Raktuknak hmun ah kan thazaang a ṭha ngai ko nain kan thazaang ṭhawnter chin kan duh caah dirhmi a si i, camp laak ding in kahdohnak, a thlithup kahdohnak le khualak i kahdohnak a chuahnak hmun ah kan hman hna lai. Bawmhnak thazaang an kal hal tikah cu hna cu kan thlah hna lai, tiah ralbawi (ṭaṭ-yin-hmu) Ko Soe Moe nih cun a chim chap.

Hriamthil le zeidang thilri an chambau ngai rih caah mizapi sin bawmhnak halnak zong a tuah fawn. Gangaw pengkomh chung ah battalion 701, 703, le 704 battailion 3 fonh in raltuk cawnnak cu tuah a si i, a bik in battalion 703 cu Yaw hmunram lei ah cawlcanghnak a tuahtu phu an si.