Myanmar rammi David Zam Deih Piang cu 626.58 gram a ritmi Rupees sing 313 man bing, Kyats sing 9,390 man cu nizan August 24 ah Mizoram palik nih Champhai peng ah an tlaih, tiah theih a si.
August 23 lio zong ah Champhai peng le Myanmar ramri motor lam ah Tedim peng Laitui khuami Cing Lam Tuang, kum 20 cu Kyats sing 1,000 leng man bing he Mizoram palik nih an tlaih cang.
Cing Lam Tuang cu bing gram 77 a ritmi rupees sing 38 man, kyats sing 1,140 leng man he an tlaih. Foreigner Act le rithaisii case in Champhai khua ah taza an cuai, tiah theih a si.
August 22 lio zong ah Mizoram ramkulh, Kolasib khua ah Myanmar rammi pahnih sinah bing rupees sing 1,340 man cu Mizoram palik nih an rak tlaih.
Chinland Defense Force-Thantlang Nih Rithaisii Cawk Zuarnak Kong Ah Cathanh An Chuah: Mizoram le Chin ram ah buaipi ngai mi rithaisi phorh le zuar kongkau ah Chinland Defense Force-Thantlang nih cun cathanh an chuah.
An cathanh ning ah, “Chinland Defense Force-Thantlang area chungah minung pum a hrawk kho ding rithaisii phorhtlunh le zuar cu CDF-Thantlang nih a khammi a si. Myanmar ramchung ramkhel boruak chiat hi caan ṭha laak in Myanmar rammi India ram ah CDF-Thantlang hmunram chungah rithaisii a phormi le a zuarmi cu CDF-Thantlang nih aa tlakmi dantatnak ngeih ding in biachah a si.
“2022 August 3 ah CDF-Thantlang area chung hmun pakhat ah minung pahnih nih India ram ah zuar ding in an phorhmi rithaisii gram 150, kyats sing 200 leng man cu people police, Thantlang nih tlaih a si. Hi rithaisii zuar dingah a phortu cu CDF-Thantlang nih a ngeihmi zulhphung ning in dantat dingah hren an si.
“Hi bantukin ramkhel boruak chiat le ralzaam dirhmun um lioah pumpak miaknak ruat in minung pum a hrawk khomi rithaisii a phorhtlunhtu le a zuartu cu CDF-Thantlang nih a fakmi dantatnak in tawlrel a si lai,” tiah cathanh an chuah. Credit : The Chin Post
Leave a Reply