Mizoram Chung in Zarhkhat Chung ah Rithaisi Bing Rupees sing 169 Man Leng Tlaih a Si! India, Mizoram ramkulh hmunkip ah tuzarh chung lawng ah rithaisi bing 3kg a ritmi, Rupees sing 169man leng (sing 5070 mmk leng) kan tlaih, tiah rithaisi khamtu nih cathanh an chuah.

Cun, tukum 2022 January thla in August 24 tiang bing/riathaisi hmannak ruang ah pa 22 le nu 1 an nunnak a liam, tiah theih a si. A luancia 2021 kum chung ah rithaisi hman ruang ah pa 39 le nu 8, an dihlak minung 47 an nunnak a rak liam, tiah theih a si. Tuzarh chung lawng ah Mizoram chung ah rithaisi bing a phortu Myanmar mi minung 6 tlaih an tong cang. Credit- The Chin Post

CDF-Thantlang Nih Ritnaksii Kong Ah A Herh Tuk Mi Le A Biapi Tak Tak Mi Cathanh An Chuah

Chinland Defense Force-Thantlang Nih Rithaisii Cawk Zuarnak Kong Ah Cathanh An Chuah. Mizoram le Chin ram ah buaipi ngai mi rithaisi phorh le zuar kongkau ah Chinland Defense Force-Thantlang nih cun cathanh an chuah.

An cathanh ning ah, “Chinland Defense Force-Thantlang area chungah minung pum a hrawk kho ding rithaisii phorhtlunh le zuar cu CDF-Thantlang nih a khammi a si. Myanmar ramchung ramkhel boruak chiat hi caan ṭha laak in Myanmar rammi India ram ah CDF-Thantlang hmunram chungah rithaisii a phormi le a zuarmi cu CDF-Thantlang nih aa tlakmi dantatnak ngeih ding in biachah a si.

“2022 August 3 ah CDF-Thantlang area chung hmun pakhat ah minung pahnih nih India ram ah zuar ding in an phorhmi rithaisii gram 150, kyats sing 200 leng man cu people police, Thantlang nih tlaih a si. Hi rithaisii zuar dingah a phortu cu CDF-Thantlang nih a ngeihmi zulhphung ning in dantat dingah hren an si.

“Hi bantukin ramkhel boruak chiat le ralzaam dirhmun um lioah pumpak miaknak ruat in minung pum a hrawk khomi rithaisii a phorhtlunhtu le a zuartu cu CDF-Thantlang nih a fakmi dantatnak in tawlrel a si lai,” tiah cathanh an chuah. Credit- The Chin Post

Kum 2022 Ah Ngeih Dingmi Lungput Kong Rak Rel Ve: Na mit ain na hmuh ii na ton lomi cu na Kaa in va chim hlah. Aruang cu bia felfai lo a si kho. Na theihmi bia kha a hman bakmi a si tiah nangmah nih na hmuhton mi lawng kha chim. Na theih lomi bia cu ka thei lo ti kha tih hlah. Ka thei loh ti ko! A thei bantuk in naa umter a si ahcun nangmah lehlam na thil a rit menmen. Mi nih lung in an in cheh ahcun va u ve duh hna hlah. An in chehnak lung tu kha na dirhmun a feh nakding lungphun ah cangter.

Minung hi kan tthancho, kan lar bakin dohdaltu kan ngei khun tawn. Dodal mi si an duh lo a si ahcun lar le minthan kha ii tim duh hlah. Buainak na ton a si ahcun ii chia rih. Bia na chimmi kha ii dinh ta law buainak cu amah tein an tian dih ko lai. Na sinak kha nangmah tein cawisan ii zuam law minih cawisan le thangthat lawng kha va bawh hlah. Khua a ruat kho lomi minung pawl he buainak na tuah hlah. Annih cu anmah le an caantawk, an sining he aakhat bang in anmah lawng va buai ko hna seh.

Mi nih theih an duh lem lomi biathli kha a chim phuangtu va si hlah. Biahman a si hmanhah, chim dih ding tinak a si lo. Thingthei cu a hmin hnu lawngah lawh ii ei a si bantuk in khuaruahnak zong hi tlamtling te le zei a si ti kha fiang tein a chuak hnu lawngah langhter ding a si. Nangmah le nangmah ka palh ii ti lengmang. Zeicahtiah ka palh ti kan ii theih hi “mi hman, miding” kan s ihram aa thoknak a si. Na thinlung chungah mi huatmi tamtuk ii chiah hlah. Cu nak cha cun kha lio caan ahkhan vawleicung ah keimah lawng hi ka um, tiah ruat law mi zeihmanh huat ding an ngei hna lai lo. Nangmah le nangmah naa huat a si le na palh tinak a si.

Mah le mah ii boachannak ngeihtluk in a tha mi a um lo. Asinain mah lungput nihcun that lo nak le porhlawtnak hmun ah in phak pi hlah she. Tangdor zong hi a tha ko nain, ralchiat tuk nak ah hmang fawn hlah. ‘Hohmanh ka care lo’ ti hmang hlah. Midang na care lonak kha nangmah le nangmah mual naa phohnak zong a si kho. Thil tha tampi tuah hi a sual loh. Asinain a rak kirthan lai tiah ruahchannak he mi va bawm hlah. Mah cu naa bochan a si ahcun a rak kirthan lo sual a si ahcun na thin hunnak mei na alh ter menmen lai.