Mingalardone Ah Khuabawi pa Le A Nupi Cu Hriamtlai Phu Nih An Kah Thah Hna!

Mingalardone Ah Khuabawi pa Le A Nupi Cu Hriamtlai Phu Nih An Kah Thah Hna! Yangon ramṭhen, Mingalardone peng ah motor in a kalmi khuabawi pa le a nupi cu nihin August 2 zinglei ah hriamtlai phu pakhat nih meithal in an kah thah hna, tiah theih a si. Kah a tong mi hna hi Ṭhohcianh peng, Shwenanthar(ရွှေနံ့သာ) khua mi Win Naing Htun, kum 49 le a nupi He Mar Lwin, kum 42 an si, tiah theih a si.

An fapa kum 13 le an fanu kum 12 hna cu sianginn an va thlah hna lio ah Ṭhohcianh peng Daw Ngu hlei ah puahkehnak a chuak i an motor cu a dir. An dir lio ah cycle pahnih in minung 6 an ra i, meithal in an kah thah hna, tiah Myanmar Now nih a ṭial. Cu meithal kahnak ah an fale ngakchia pahnih cu hliamhma an pu lo. A pawngkam hrawng cu SAC ralkap nih lam an kham dih, tiah theih a si. Credit : The Chin Post

thawngpang dang relchap : SAC Ralkap Hriamngan Kah Nak In Ralzam Camp Ummi Kum 13 Ngakchia Le Kum 86 Tarnu An Nunnak A Liam!

SAC Ralkap Hriamngan Kah Nak In Ralzam Camp Ummi Kum 13 Ngakchia Le Kum 86 Tarnu An Nunnak A Liam!: Kaya(Karenni) ramkulh, Demoso peng chung ah SAC ralkap nih ralzam umnak camp cu July 31 zanlei sml 5:25 ah hriamngan in an kah caah kum 13 ngakchia pakhat a nunnak liam. Minung 4 hliamhma an pu, tiah Demoso peng PDF nih an thanh.

Ralzam camp cu Ngwetaung(ငွေတောင်) Battalion 102 Hprosu peng umhmun khuarmi Battalion 128 nih hriamngan in voi 10 hrawng an kah. Tualchung mi 5 hliamhma an pu i, kum 13 ngakchia pakhat cu a hmun ah a thi colh. A dang 3 cu an hliamhma fak lo, tiah theih a si.

SAC ralkap nih ralzam hna cu timh ciammam in hriamngan in voi 7 an kah hna caah tualchung mi 2 an thi i, 12 hliamhma an pu, tiah Demoso peng PDF nih cathanh an chuah.

July 30 chun hnu sml 2:00 hrawng ah Sagaing ramṭhen, Khin Oo peng Innpat(အင်ပတ်) khua, inn 500 hrawng a umnak zong SAC ralkap nih hriamngan in an kah caah khuami 3 hliamhma an pu i, cu chungah kum 86 tar nu pakhat cu a mit khattelei le a pumpaluk ah hriamngan kuan nih a khen caah a nunnak liam, tiah theih a si.

“Zan sml 8:00 hrawng ah tarnu cu a nunnak liam. SAC ralkap nih, Khin Oo khua cu Drone in an ngiathlai hnuah hriamngan in an kah. Innpat khua lawng si loin a dang khua hna zong hriamngan in an kah. Tarnu he a zaamṭi mi pa pakhat zong hliamhma a pu ve, minung pathum hliamhma an pu,” tiah tualchung mi pakhat nih a chim. Credit : The Chin Post

Be the first to comment

Leave a Reply

Your email address will not be published.


*