Mindat Um SAC Ralkap Ko Hein Min Naing Cu A Hriamthil He CDM A Tuah!

Mindat Um SAC Ralkap Ko Hein Min Naing Cu A Hriamthil He CDM A Tuah!: Chin ramkulh, Mindat khah-lah-yiah 274 battalion in Ko Hein Min Naing cu a hriamthil he CDM a tuah, tiah KyaukHṭu(ကျောက်ထု) PDF nih cathanh an chuah. July 18 ah khan KyaukHṭu PDF sin ah pehtlaihnak tuah in MA-1 pakhat, kuanbawm 5, kuan zun 270 he Kyaukhṭu PDF(YRPA) he pehtlaihnak tuah in CDM cawlcanghnak a tuah, tiah an langhter.

Kyaukhṭu PDF nih CDM cawlcanghnak a tuahtu Ko Hein Min Naing cu sing 80mmk an pek hnu ah a himnak hmun ah an kalter, tiah theihternak an tuah. Mizapi lei ah dir a duhmi le CDM tuah a duhmi ralkap le palik hna nih Kyaukhṭu PDF (YRPRA) sin ah pehtlaih khawh peng kan si, tiah theihternak cathanh an chuah.

Bogo Ramṭhen Le Tanintharyi Ramṭhen Kahdohnak Kong: Bago ramṭhen, Yey Tar Shae(ရေတာရှည်) peng mentung 158 nak ah umhmun a khuarmi SAC ralkap hna cu tualchung hriamtlai phu nih July 19, zaan suimilam 8:10 ah hriamngan in an kah hna caah SAC ralkap 6 nak tlawm lo an thi lai, tiah Ṭaungoo(တောင်ငူ) pengkomh tualchung hriamtlai phu nih cathanh an chuah.

Tanintharyi ramṭhen Ma Hle Taung (မလွှဲတောင်) sakhan ah a luancia July 17 ahkhan palik pahnih cu anmah le mah i an i kap i, palik bawi Kyaw Tu Win a thi, tiah theih a si. Palik bawi a thimi Kyaw Tu Win ruak cu July 20, chunhnu ah a chungkhar nih ruak khanghnak an ngeih, tiah theih a si.

Tanintharyi ramṭhen, Palaw peng Paut Kone ah rallam a sialmi SAC ralkap hna cu July 19 zinglei suimilam 7:00 hrawng ah tualchung hriamtlai phu nih bomb an puahhnawh hna caah SAC ralkap 5 an thi, tiah Myait pengkomh PDF battalion 1 sin in theih a si. Credit : The Chin Post