Mindat In SAC Ralkap Mawtaw 100 Leng An Chuah Lio Ah Phone Line Le Internet Line An Phih!

Mindat In SAC Ralkap Mawtaw 100 Leng An Chuah Lio Ah Phone Line Le Internet Line An Phih!: Chin ramkulh Mindat hrambunh SAC ralkap kah-lah-yiah 274(ခလရ ၂၇၄) battallion ah a phan mi mawtaw 100 leng cu July 21 ahkhan Mindat in Magwe ramṭhen Kyaukhtu(ကျောက်ထု) lei ah an kal i, 21 in nihin 24 tiang Mindat le Yaw peng ah phone line le internet line an phih, tiah tualchung mi nih an chim. Cu mawtaw hna cu July thla zarh 3 nak thawkka ah Pakokku in an ra i, July 20 ah Mindat an rak phan.

“Mindat an rak luh in Mindat nitlak lei cu hriamngan in an kah. Thilri an ṭhumh i a thaizing ah Kyaukhtu ah an kir colh. Cu ni thawk cun nihin tiang phone le internet line an phih,” tiah tualchung mi pakhat nih a chim.

Mawtaw run cu Mindat an luh pah ah lam i aa thup mi SAC ralkap an char pah hna lio hmuh a si, tiah CDF-Mindat ralkap pakhat nih a chim. Kyaukhtu peng hmun cheukhat zong ah phone line an phih i, Yaw peng cu pengchung pumpi ngawt in phone line an phih, tiah theih a si.

Saw-Seihphyo(ဆော-ဆိပ်ဖြူ) lam ah tuthla thla laifang hrawng khan tualchung PDF le SAC ralkap kar kahdohnak a faak ṭhan i kaphnih in thi le hliam tuar an um, tiah theih a si. SAC ralkap an kalnak lam Kyaukhtu-Pakokku, Kyaukhtu-Saw, Saw-Seihphyo kalnak lam pawl cu tulio ah hman rih lo ding in Yaw Regional PDF’s Alliance (YRPA) nih ralrin peknak cathanh an chuah. Credit : The Chin Post