Min Aung Hlaing Nih SAC Ralkap Le Palik Cu Thlahlawh Tam Deuh A Pek Cang Hna

Min Aung Hlaing kuttang SAC ralkap le palik cu Min Aung Hlaing nih nun pek man ah tiah minung pakhat ah kyats 30,000 thlahlawh a chap hna, tiah Naypyidaw um ralkap chung mi sin in theih a si.

Palik pawl cu July thla ah khan thlahlawh tam deuh an pek hna i, SAC ralkap pawl tu cu August thla ah khan an pek hna, tiah theih a si.

“Hlan ah cun minung pakhat ah kyats 10,000 an rak pek hna. Atu hi kyats 20,000 an pek chap hna caah a dihlak 30,000 a si. Thlahlawh a kai tiah an chim duh lo. A ruang cu a dang zung rianṭuanmi hna an bia a tam lai an phan caah a si,” tiah ralkap chung mi sinin theih a si.

Palik pawl tu cu ralram hmai a kalmi an si ahcun nun pek man ah 30,000 an pek hna. Ralhmai a kal lomi an si ahcun 10,000 lawng an pek hna. SAC ralkap pawl tu cu ralhmai a kalmi he a kal lomi he nun pek man ah 30,000 an pek hna, tiah theih a si.

Chawlehthalnak a tuahtu pakhat nih, “SAC ralkap palik thlahlawh an chapmi hna hi SAC nih thla khat ah kyats billion tam tuk a dih lai. Ram si a fah lio caan ah thlahlawh a chapmi hna ti khawh a si,” tiah a chim.

Min Aung Hlaing nih thlahlawh a chapmi hi SAC ralkap le palik pawl cu CDM tuah lo ding in a lemmi hna a si. Kyats 30,000 cu tam tuk a si lo nain, SAC ralkap le palik chungkhar hna nih an rak hal pengmi le an saduhthah a si, tiah ralkap chung hna sin in theih a si. Credit : The Chin Post

Be the first to comment

Leave a Reply

Your email address will not be published.


*