Magwe Ramṭhen Chung Khuahnih Ah SAC Ralkap Nih Tualchung Mi 7 An Thah Hna!

Magwe Ramṭhen Chung Khuahnih Ah SAC Ralkap Nih Tualchung Mi 7 An Thah Hna!: Magwe ramṭhen, Myine pengchung ṬaungYoe khua le Poah pengchung KanpaPhyu (ကမ်းပါးဖြူ) khua cu July 9 ah SAC ralkap nih luhhnawh in an thilri an lakpiak dih hna lengah tualchung mi zong an tlaih hna i, an thah hna, tiah theih a si.

SAC ralkap 100 hrawng nih ṬaungYoe(တောင်းရိုး) khua cu July 9, zinglei suimilam 8:00 hrawng ahkhan luhhnawh in khuami thilri an lakpiak hna hnu ah khuami 2 an kalpi hna. Cun, zinglei suimilam 10:00 hrawng ah Poah peng KanPaPhyu(ကမ်းပါးဖြူ) khua cu an luhhnawh ṭhan i, khuachung thilri le man ngei sui hna cu an lak leng ah khuami 5 an kalpi hna, tiah tualchung mi nih an chim.

SAC ralkap hna cu KanPhyu(ကမ်းဖြူ) khua ah zaan an riak i, nihin July 10 zinglei ah tlaih a tongmi minung 7 hna cu motor hnu lei ah hriṭem buin an thah hna, tiah tualchung mi pakhat nih a chim. “SAC ralkap tlaih a tongmi minung 7 hna cu July 10, zinglei suimilam 10:40 hrawng ahkhan an hngawng i hriṭem buin motor in an hnuh hna caah an nunnak a liam,” tiah tualchung mi pakhat nih cun a chim.

Thah a tongmi tualchung mi hna cu kum 30 in kum 50 kar an si hna i, “PDF he pehtlaihnak nan ngei” tiah an puh hna caah tlaih an ton nak hi a si. Cupinah SAC ralkap hna nih cun khuachung inn saknak thilri le thil man ngei, sui hna cu an lak leng ah KanPaPhyu(ကမ်းပါးဖြူ) khuami cycle zong an khanghpiak hna. Kanpaphyu khua le ṬaungYoe khuahnih in an sunghmi thilri hi Kyats sing 370 man leng a si lai, tiah khuami hna nih an chim. Credit : The Chin Post