Magway ramṭhen, Myotit peng Kani khua ah August 9, zinglei ah khan SAC ralkap le Beikthano (ဗိဿနိုး) hmunram tualchung hriamtlai phu kar i kahdohnak ah khuami pakhat le PDF chungtel 6 nunnak a liam, tiah Beikthano(ဗိဿနိုး) PDF nih an thanh.
Beikthano(ဗိဿနိုး) PDF chungtel 6 cu Kani khua an um lio an i dornak inn ah, SAC ralkap nih luhhnawh in an kahdoh hna caah tualchung hriamthlai phu chungtel 6 an nunnak a liam hi a si, tiah Beikthano(ဗိဿနိုး) PDF in ṭuanvo ngeitu nih nihin August 11 ah RFA ah a chim.
“PDF hna cu inn chung an um lio ah, SAC ralkap tam ngai nih luhhnawh in an kah hna, PDF lei zong nih an i kenmi M4 meithal pakhat le a tawimi meithal pakhat he an kah ve ko hna nain, minung thazaang le hriam thazaang aa thlau tuk caah PDF 6 le tlun inn a onhtu inn ngeitu pakhat hna cu an nunnak a liam,” tiah ṭuanvo ngeitu nih cun a chim.
SAC ralkap lei cu motor 4 he minung thazaang 30 leng an si. PDF lei kahnak in SAC ralkap bo 3 le ralkap dang pakhat an thi, tiah tualchung mi nih an chim. Credit : The Chin Post
Leave a Reply