Lungthin A Fak Tuk E : Ka tta Tapi nihin ah cun mu Tapi ti auh awk kan ngei ti lo e

Ka tta Tapi nihin ah cun mu Tapi ti auh awk kan ngei ti lo e,ka nu le ka pa na u le nau na far le nih kan si khawh tawk cun kan i dawt tuk mu.Chungkhat ule nau rualchan cingla ,sang le veng ,khuami le hawikawm mikip nih an in dawt dih,nang cu Bawipa thawng in daw tu tampi na ngei.

Ka tta Tapi tanghra na awng lio kan i lawm tuk ning kha ka philh kho lo e,mitthlam ah a cuang dih than e,ka nu le ka pa nih nangmah sianginn a kai khawh nak ding a si ah cun an ti i,eidin an duh tuk mi hna an i sum,zei rian poh an i hne,kan fapa caah cun tiah mei ven chom in zan tlai tiang zei rian poh a rak tuan, hnipuan ttha zong an duh ve ko lai nain a duh lo bantuk in an um,an lung retheih can tampi lai mu.Ka tta Tapi ka nu le pa nih hi tluk an in dawt hi na thei ko lo maw?

Ka tta Tapi aw a thi ding long te kan si ko e,a si nain mu na thih ning hi a fak tuk.Minung si nak cun tuar a har bak. Kan ngaihchiat nak le kan lungfahnak hi zei tiang dik kan rak tuar lai. Ka tta Tapi aw na vanchia tuk e a si nain mu zeizong vialte nawl ngei tu le a theih dih tu Bawipa a um ko.

Ka tta Tapi kei cu mu kan ngakchia lio i ka pa nih bia a rak kan chim ton mi kha pakhat le pakhat i daw uh tu lio can hi nan ngai tuk te lai,nan cutzat tik ah cun nan tthat ni nan chiat ni ah nan i hmuh kho ti lai lo,a tu can hi nan ngai bik te lai tiah a ti mi ka pa bia kha ka hna thlam ah a zel a thang e. Nihin ah cun chungtling te ka rak um ton nak runinn,rawl kan dum ti lio can kan rak tlonlen tonnak chumtual hna kha ka hlam i a thar in ka thei than e.

Tapi cu ka lung sak kho lo tuk hi,nan sining vialte ka zanmang ah rak ka chim te mu. December 8 na chuah cam kan phan lai zei tin dah kan rak celh lai. Ni sunglawi can hna kan phan lai nang cu na bau cang lai zeitluk in dah kan in hlam lai . Ka ruah deuh deuh a ka runh deuh deuh.Tapi aw kei cu zeidang hi ka ruat kho lo e, ka lung fah tuk ah kan ngakchia lio hmanthlak te hi ka rak tar mu.

Ka tta Tapi aw ka dawt tuk mi ka fapa na tupa Bawi Dawt Sang (Pui Pui) nih an dong ko lo maw? Nan nu na pa nan unau nih an in ngai tuk tiah na chim ko lo maw? Ka ngaihchiat nak le kan tuar nak hna na chim ko lo maw? Ka tta Tapi aw vawlei cu duh tlin lo nak ram a si , vawlei ah cun zeitik hmanh ah kan i tong kho ti lai lo mangttha tuk mu. Rak kan dong te mu sianlo ka tta Tapi. Calen Sung