Myanmar ramchung buainak a chuah hnuah le Laitlang (Chin State) ah kahdohnak a chuah hnuah Lai miphun thong sawm leng cu innpa ram a si mi India, Mizoram hna ah i dor in khuasak a si, India Center cozah nih ralzaam a cohlang lo nain thisa tlai a simi Mizoram cozah le mizapi nih lungtho thanuam te’n an kan cohlan mi cungah lunglawmhnak a ngantuk hringhran, an caah thlazacam daithlang hna hlah usih ti kha a hmasabik ah van chim ka duh.
Myanmar ramchung ramkulh le ramthen ah kahdohnak a chuah hnu in hriamnam cawknak caah Lai miphun leikil deng khuasa hna nih mitkuh cim lo in an țuanhawl mi chung in hriamnam cawknak caah (ralhrang rialdip uknak hlohnak caah) an thawhmi in hriamnam cawk a si, voi tampi cu Assam ralkap nih an tlaih, Mizoram palek tu nih cun tlaih awk ah an ruat lai lo, zei ca’h ti ahcun an lungthin taktak in a kan tanpi tu an si, Myanmar ralhrang a dirkamh i hriamnam lei siseh thil dangdang a bawmchantu cu Russia, China, India hi an si caah, Mizapi hriamtlai thilri zong India ralkap Assam pawl nih an tlaih lengmang nak zong hi a si.
Nihin kan boruak sining kan zoh tikah Myanmar ramchung lei in rithaisii luhpimi an tlaihmi cu Online chungah rel cawk lo in a um lengluang, cucu Myanmar, Chin State in luhpi mi a si tiah ti a si, asinain an min an langhter ning ahcun, Chaklei Laimi nak in Thlanglei Laimi an tam ngaingai, Kalay Tahan Mizo mi zong an i tel kho men, cucu zeidang ah siloin an ” Min ” nih a fianter ngai ko tiah ka ruah.
Mizoram ramchung ah ralzaam dirhmun in minung thong sawm leng um a si, cutikah rithaisii a phormi minung pakhat hnih ruangah ralzaam zei sualnak ngeilo mi mitha le, Biaknak, zatlang bu ah a pumpemi hna țiang mithmai ngei lo in um a si, ralzaam kan si an kan theih, ramchung lei in siithalo tampi an luhpi mi tlaih a si tikah mithmai cu a hngal lo ngai te.
Phungthluk ah ” Kheng pakhat chung ah nga tampi an um ko nain nga pakhat a thut ruangah an dihlak in an thu dih ” ti a si bang, mi pakhat hnih nih thilthalo tuah ruangah aa pehtlai lo mi minung, nausem tiang nih an țuar lai dingmi hi phan a um ngai ngai mi a si. Ramchung ah kan him ti lo ti ruangah ram innpa ah aa dormi kan si, kan ram a si lo, mah duhning in khuasak awk kan tha lo, mah miaknak mitlawng ruat lo in ka tuahmi nih ka miphun hawi min a chiatter sual maw, mithmai a bitter sual maw ti hi ruat usilaw, midang nunnak caah santlai a si lo mi le nun hrawhnak a simi thilthalo tuah cu ngol cang hna usih.
Ramkulh cozah, Biaknak, Zatlang bu, NGO hna nih tamhal in an um sual lai, an sia a rem sual lai lo, an umnak deu a zut sual lai ti’n le an ram ah hnangam te’n thutdir dingin an kan ti ko nain, cozah le zatlang bu khuami dohmi rithaisii zuarthlainak tuah hrim hlah uh tiah ralzaam Camp hna ahcun khuabawi le zatlang hruaitu nih an chim hlei ah tlangau nak zongah vengchung mizapi nih riathaisii an zuar ahcun vengchung in țhawl an si lai ti zong an au, hi an au mi hi ralzaam mi an kan ti hnawhchan bik a si hlei lo, an khuatlang cio runvennak caah a si.
Nikhat hnu nikhat rithaisii tlaihkhih a tam, Khuami mizapi an ai puang, an mawh hrim lo minung nunnak a hrawkkho tu thil pei a si fom cu, țhawldawi hna tong usihlaw, khoika ahdah kan i dor hnga? kan inn kan lo kan nunnak tuak cio usih, cucaah minung pakhat ruangah Miphun hawi thong sawm leng nih nun tuar lai dingin nan ruat kho maw?
Ramchung mizapi hriamtlai zong nan biapi ve in a lang, nanmah le nan uknak nan tlaihnak hmunram ah aa chawkletmi hna zohfel daithlan lo a biapi ngai, khuate khuami hna nih Zu kan khap piak u an in ti hna, nan khap khuami an hna a ngam ning, khuachung ah buaibai nak a um lo, an mitkuh a thaw, asinain caan rau lo teah nan van dorh than dingah zu rit le buainak a tam, Lai zu tu cu onh awk a si, zu khap ruangah le cawknak ngeih lo ruangah kuttawlnak tiang a dingmi an um kha, cucaahcun minung hawi caah nunnak tiang a hnorsuan mi thilthalo cu chawlehnak ah hmang hram hna hlah usih.
Mizapi ralzaam nunhimnak ding caah le hnangam in thutdir khawh a si nakhnga, ramchung mizapi ralkap nih mahle hmunram tha te’n zohfel a biapi, nulepa zong nih fale chimhhrin zia thiam hna usihlaw, mah pumpak chawlehnak ruangah mizapi miphun hawi harnak pe hna hlah usih. Innpa ram ah hnangam in kan i dor khawh nakhnga rithaisii kham hna usih. Credit: The Lairam Times
Leave a Reply