Laung Lone Ah Pyosawti Nih Tualchungmi 2 An Thah Hna

Taningtharyi ramțhen, Dawei pengkomh, Laung Lone peng Maungmahkaan (မောင်းမကန်) khua ah tualchungmi 2 cu nihin July 25 zinglei ah pyosawti nih an thah hna tiah Laung Lone peng zatlang bu pakhat sin in theih a si.

Pyosawti nih an thah mi hna 2 cu U Zaw Win (ဦးဇော်ဝင်း) le Daw Pua(ဒေါ်ပွား) an si ,zaan an i hngilh lio ah an inn ah an kah hna tiah tiah theih a si. An thah mi hna hi PDF bawmtu nan si tiah an puh hna i an thah mi hna a si. An inn chung i thil mansung, phone le mawtaw pakhat zong pyosawti nih an fir tiah theih a si. Cu kah thahnak ah cun palek zong an i tel i tuksapur mi thahnawnnak a si tiah tualchung mi nih an chim.

June 16 in July 25 tiang thla 2 chung ah Lung Lone peng ah pyosawti le palek nih an thah mi pa 4 le nu 5, an dih lak 9 an thah cang hna i inn pakhat zong an khangh tiah Lung Lone zatlang uktu phu sin in theih a si. Credit : The Chin Post