KNU Brigade 5 Hmunram Chung A Lutmi SAC Ralkap Cu KNLA Nih An Kah Hna Caah Ralkap 4 An Thi

KNU Brigade 5 hmunram, Mutraw(မူတြော်) pengkomh chung ah a lutmi SAC ralkap pawl cu KNLA nih an kah hna i, SAC ralkap 4 an thi, tiah Mutraw news nih a langhter.

August 28 zing sml 9:00 hrawng ah Hpapun khua pawng SAC ralkap Mayakone(မယားကုန်း) sakhan cu kan kah i SAC ralkap 2 an thi, tiah KNLA Battalion 15 in ṭuanvo ngeitu nih a chim.

Dwelu peng Hlakunpyu(လှဂွန်းပျို) hmun ah umhmun a khuarmi SAC ralkap sakhan cu, August 28 zing sml 10:50 ah KNLA Battalion 102 nih an kah hna caah ralkap 1 a thi. Cu ni zanlei sml 5:20 ah Hpapun khua chung ah a ummi SAC ralkap cu KNLA nih an kah ṭhan hna i, SAC ralkap 1 a thi chap. KNLA lei in a thimi le aa hliammi an um lo, tiah Mutraw news nih a langhter.

Cu pin ah August 28 zanlei sml 3:20 hrawng ah Meway hmunram um SAC ralkap sakhan ah Helicopter 2 nih hriamnam le zen-kuan a chanh hna lio ah KNLA nih Helicopter 1 cu seh meithal in an kah, tiah theih a si.

August 27 zanlei sml 4:30 hrawng ah Dwelu peng Naypukan khua chung ah BGF Battalion 1014 nih, hriamngan lung 4 in an kah caah kum 9 tluk ngakchia pakhat cu hriamngan kuan nih a khen caah hliamhma pu i, inn pakhat zong a rawk, tiah theih a si.

SAC ralkap le an kuttang BGF nih Mutraw pengkomh chung ah umhmun an khuar i, tualchung mi an umnak khua hna cu hriamngan in nifatin an kah. A phunphun in nuhrin covo buarnak zong an tuah, tiah theih a si. Credit : The Chin Post

Be the first to comment

Leave a Reply

Your email address will not be published.


*