Kawthoolei In Thlakhat Chung Kahdohnak Ah SAC Ralkap 300 Renglo An Thi – KNU

Kawthoolei hmunram in thlakhat chung kahdohnak ah KNLA, KNDO phu le SAC ralkap BGF kar ah kahdohnak voi 200 leng a chuak i, cu kahdohnak ah cun SAC ralkap 300 leng an thi, tiah KNU nih cathanh an chuah.

August thla chung ah KNLA, KNDO le SAC ralkap ramri hngak BGF kar nitin ngawt in kahdohnak a chuak i, thlakhat chung ah kahdohnak fak le din deuh he voi 262 kahdohnak a chuak. Cu kahdohnak chung ah cun SAC ralkap 333 an thi, minung 261 hliamhma an tuar, tiah an thanhmi ah an langhter. Kaphnih kar kahdohnak ah KNLA, KNDO lei in ralkap 4 an nunnak a liam i, 18 hliamhma an tuar.

SAC ralkap le ramri hngak ralkap hna nih tualchung mi an umnak khua chung le an rianṭuannak hmunhma ah hriamngan voi 373 an kah i, raltuknak vanlawng le helicopter hmang in bomb voi 12 an thlak, tiah an thanhmi ah cun an langhter chih.

SAC ralkap hna nih tualchung mipi umnak khuachung le rianṭuannak hmumhma cu tinhchih in hriamngan an kah, helicopter le raltuknak vanlawng hmang in bomb thlaknak an tuah caah sualnak ngei lo tualchung mi 9 an nunnak a liam i, 16 hliamhma an tuar, tiah KNU nih cun an langhter.

Cun, SAC ralkap nih tualchung mi 97 cu hramhram in an tlaih hna i, an tlerhkhonh hna, checkhlatnak an tuah hna i, ralphaw ah an hman hna tiah KNU nih an cathanh chuahmi ah cun an langhter.

Myinchain Peng Ah PDF Nih SAC Mawtaw Bomb An Puahhnawh I, Ralkap 3 An Thi: Mandalay ramṭhen, Myinchain peng Htisaung(ထီဆောင်း) le Kanpya(ကံပြား) khua kar ah SAC ralkap mawṭaw pakhat cu nihin september 8 zaanlei suimilam 2 le cheu hrawng ah tualchung hriamtlai phu nih bomb an puah hnawh hna i SAC ralkap 3 an thi, tiah ZERO pah-kah-phah phu nih cathanh an chuah. Cu kahdohnak cu Myinchain ZERO pah-kah-phah phu le ZERO POWER tualchung hriamtlai phufonh hna nih an tuahmi si, tiah theih a si. Credit : The Chin Post