Sagaing ramṭhen, Kawlin peng Inpinthar khua thlanglei Ayu(အရိုး) tlang pawng ah SAC ralkap le PDF kar kahdohnak a chuak i, kaphnih in a thimi an tam, tiah tualchung mi hna nih an chim.
Kutaungbu(ကိုးတောင်ဘို့) lei kap in a chuakmi SAC ralkap 100 hrawng cu, September 12 zanlei sml 2:00 hrawng ah Pah Kah Phah phu le PDF i bawm in an kah hna i, sml 3 chung hrawng kahdohnak a chuak, tiah theih a si.
SAC ralkap nih hriamngan he hriamhme he an kah hna. Hriamnam aa thlau tuk caah PDF lei in ralkap 8 an nunnak a liam. An ruak cu aa naihnak khuate ah an kalpi hna i, ṭha tein an vui hna,” tiah tualchung mi pakhat nih a chim.
Cu kahdohnak ah KLPDF Battalion 1 in ralkap 3, Pah Kah Phah phu in ralkap 5 an si i, an dihlak 8 an nunnak a liam. PDF ralkap 2 hliamhma an pu tiah theih a si.
Nizan September 13 zinglei zong ah rallam a sialmi SAC ralkap nih khuami 2 cu an tlaih hna i, ralphaw ah an hman hna. SAC ralkap nih minung zong an put hna, hliamhma a pumi maw an si ti cu hngalh a si lo, tiah tualchung mi hna nih an chim.
Sagaing ramthen, Butalin Peng Kahdohnak Ah PDF 6 An Nunnak a Liam!: Sagaing ramṭhen, Butalin peng, Pepyittaw(ပဲပြစ်တော) khua ah SAC ralkap nih PDF an kah hna i, PDF lei in ralkap 6 nunnak a liam, tiah theih a si.
Nizaan September 13 zinglei sml 5 hrawng ah Butalin peng, Pepyittaw khua cu SAC ralkap nih an khangh i, cu inn an khangh mi cu PDF nih an hmih. Mei an hmih lioah cun SAC ralkap nih an rak kah hna i, PDF ralkap 6 an nunnak a liam, tiah khuami hna nih an chim.Cu nunnak a liammi PDF ralkap 6 lak ah cun CDM ralkap pakhat zong ai tel, tiah an chim nain fehternak an tuahmi a um rih lo.
Pepyittaw khua cu September 10 lio ah CDM tuahmi ralkap 2 hna conglawmhnak tuah in laksawng sing 50 an pek hna nak thawng cu SAC ralkap nih an theih caah hiti bantuk in kahdohnak an tuah hi a si, tiah khuami hna nih an chim.Butalin hrambunh, GM LPDF nih cun nunnak a liammi PDF hna kong le nunnak a liammi CDM ralkap Awng Naing U kong he pehtlaiin nawl an chuah i, tualchung PDF hna sinah thawnghalnak tuah an i zuam ko nain an pehtlai kho hna lo, tiah theih a si.crd the chin post
Leave a Reply