Karenni Ramkulh In August Thlachung Kahdohnak Ah SAC Ralkap 40 An Thi

Karenni ramkulh in August thlachung kahdohnak ah SAC ralkap 40 an thi, minung 4 nih CDM an tuah, tiah KNDF nih nihin September 1 ah cathanh an chuah.

August thlakhat chung ah SAC ralkap hna nih Hparuso, Demoso le Loikaw tiang laak khawh an i zuam i, Demoso peng le Hpruso peng ah minung thazaang chap in rallam an sial. Cu ruangah August 22 ah Demoso peng, Htuhluibila(ထူလွှီးဘီလာ) khua pawng ah rallam sialtu SAC ralkap hna cu KA le KNDF B-10 nih an kah hna i, minutes 15 tluk kahdohnak a rak chuak.

August thlachung ah kahdohnak a tlawmbik voi 46 a chuak i, cu kahdohnak chung ah cun SAC ralkap 40 an thi, 25 hliamhma an tuar tiah KNDF nih cun an thanh.

SAC ralkap hna nih vanlei kahdohnak voi 8 an tuah i, bomb lung 32 cu tualchung mi umnak hmunhma ah an thlak. SAC ralkap hna nih vanlei kahdohnak an tuah ruang le hriamngan an hman ruang ah tualchung mi 5 an nunnak a liam. Cu pin ah minung 15 hliamhma an tuar. Cun sii-inn pakhat le tualchung mi umnak inn 9 a hrawh leng ah Buddhist pathian biaknak hmun pakhat zong an hrawh, tiah theih a si.

August thla zarh donghnak chung ah SAC ralkap 4 cu KNDF sin ah CDM an tuah, tiah an KNDF lei nih cun langhter. Credit : The Chin Post