Karenni Ramkulh, Hpruso-Demoso Lampi Ni 15 Chung Kahdohnak Ah SAC Ralkap Lei Ralbawi Telh In Minung 60 Leng An Thi

Karenni ramkulh, Hpruso-Demoso lampi ni 15 chung kahdohnak ah SAC ralkap lei ralbawi telh in minung 60 leng an thi tiah Central Special Operation nih cathanh an chuah. August 16 in August 31 tiang Hpruso-Demoso lampi cung ah rallam a sialtu SAC ralkap hna cu tualchung hriamtlai phufonh a simi Central Special Operations Sniper Group, KNDF Sniper, Central region 1101, KA phufonh hna nih an kahdoh hna. Cu kahdohnak chung ah cun SAC ralkap lei ralbawi pakhat le sniper tlaitu minung 6 telh in SAC ralkap 61 an thi, tiah an thanhmi ah an langhter.

Hpruso le Demoso pengchung ah SAC ralkap nih minung thazaang tampi hmang in hmunhma lak khawh an i zuam caah, tualchung hriamtlai phufonh hna i bawm in kan kahdoh hna, tiah tualchung hriamtlai phu chungtel pakhat nih media ah a chim.

Kahdohnak chung ah tualchung hriamtlai phufonh lei hliamtuarnak cu a um lo nain sniper kuan kan herh, tiah Central Division Special Operations Group nih an chim. Atu ah an hmanmi sniper kuan pakhat hi Ks. 75,000 hrawng a rak si tawn nain, thil man a kai tuk caah atu ah cun kuan pakhat ah Ks. 120,000 a phan cang, tiah theih a si.

DOHTHLENNAK LE SOCIAL MEDIA: Dohthlennak Hruaitu Cheukhat Hmuhning

Khuapau dohthlennak kong he aa pehtlaimi cawlcanghnak hna cu PDF/CDF le mizapi hna nih social media ah kan tarmi hi cheukhat cu mizapi caah lungṭhawnnak a si, asinain khatlei ah ralhrang nih mizapi le dohthlennak tuahtu ralkap hna an dohnak caah bawmtu zong a si ve tiah khuapau dohthlennak hruaitu cheukhat nih an chim.

Myanmah Taw Win Naga Tetdaw (မြန်မာ့တော်ဝင်နဂါးတပ်တော်) hruaitu Bo Naga: Ramdang ah meithal ṭha cawk in raldoh a har caah mah thluak le thiamnak hmangin hriamnam kan ser khawhmi a um ve tikah cheukhat nih mizapi sin langhter an duh. Hihi mizapi caah lungṭhawnnak a petu a si ko nain khatlei ah ṭih a nung ngai fawn. Kan hlawhtlinnak kan langhternak hmunhma zoh in ralhrang nih kan hnu an kan dawi khawh. Mizapi le dohthlennak ralkap hna caah lungṭhawnnak a si ko nain khatlei ah ṭih a nung tuk hringhran. A si khawh ahcun hriamnam serchuahnak kong hi cu langhter ka duh lo. Langhter kan duh ko a si hmanh ah kan hneksaknak hmunhma kha fiang tukin langhter chih lo ding a si. Mizapi nih an theihnak dingah hriamnam muisam lawng langhter usihlaw a ṭha bik!

Kalaymyo PDF hruaitu pakhat a simi Ko Min Swe: Kannih Kalay ah cun Pyusawhtee nih ralhrang an bawmh hna. Cu hna cu tualchungmi an si ve tikah hmunhma an theih dih. Cutikah mi pakhat nih social media ah a tarmi kha khoika dah a si ti an theih colh, cuticun ralhrang sinah an chim i thazaang tampi he PDF sakhan an nam i an lak tawnnak a si. Social media ah kan tarmi thawngpang le hmunhma hna ruangah mizapi/khuami nih an tuar. Kan tarmi thawngpang le hmunhma hna hi dohthlennak caah a biapi tukmi a si caah ralring tein kan thuhnawh thiam hna usih tiah ruahnak pek ka duh!

CDM ralbawi Linn Htet Aung: Atulio kahdohnak dirhmun cu ralhrang nih vanlawng le thazaang tampi an hman, an tei lonak hmunhma cu vanlawng, Helicopter le tank hna tiang an hman. Atulio hi mizapi ni ralring taktak in kan um a herh caan a si. Hi bantuk caan ah hin a bik in thawngpang a him ding kha biapi ah kan chiah a hau. Kan ralkap zeidah an tuah? Khoika ah an kal? ti hna hi mi nih an theih lo kha a ṭha bik. Thawngpang dai tein ralhrang kan doh hi a ṭha bik ko lai. Thil cheukhat cu mizapi caah lungṭhawnnak a si ko lai nain ralhrang caah thawngṭha a si kho ve. Cucaah thawngpang hi a him khawh chungin thup ko usih!

Media hna zong nih an ṭialmi le tarmi ruangah tuarnak/sunghnak a um nakhnga lo ralrin a hau tiah dohthlennak tuahtu hna nih an chim. Media ngan hna siseh, pumpak nih tuahmi online media hna siseh media theng si loin pumpak nih ṭialmi le langhtermi si hna seh, an dihlak in ralrin an herh.

Khet Thit Media dirhtu le Editor a simi Thar Lwin Zawng Htet (သာလွန်ဇောင်းထက်)A hmunhma ah kal in kan hlathlai khawh lo tikah anmah (PDF) nih an thanhmi kha kan i hngatchan ko. Cheukhat thawngpang cu a hmunhma ah a ummi hna kan hal hna hnuah kan fehter ko. Kan hlathlai hnuah a dik lomi thawng zong a um tawn. Anmah (PDF) minṭhatnak le bawmhnak hmuhnak ding caah an phuahchommi thawngpang zong a um. Asinain hi bantuk cu a tlawm. Kanmah zong nih anmah thanhmi le pekmi i bochan in thawng kan ṭial. Kan ṭialmi thawng nih zeidah a chuahter lai timi kongah Media kan ṭuanvo a si nain a thanh hmasatu hna nih ṭha tein an chek ta a hau ve. Media cu PDF pawl humzualtu kan si lo i ralhrang bawmtu zong kan si lo. Kannih cu thil a cangmi a si ning tein ṭial le langhter kha kan ṭuanvo a si. Anmah thanhmi zohchih in kan ṭial chinmi a si tikah an i ralrin deuh a hau. Kahdohnak thawng hna rianrang tuk in an thanh i cu nih cun zeimaw buainak a chuahter ti kan theih. Cutikah atu cu kanmah zong kan i ralring ngai cang!

Ref: RFA

Theihternak : The Chin Post nih kan tialmi thawngpang le ca dangdang hna hi kanmah chimh hmasa loin zalong tein lak khawh a si ko. Asinain kan thawngpang le ca dangdang a la mi hna nih Credit: The Chin Post ti te hi kan tialpiak hram u. Cheukhat cu Credit an kan pek lengmang ko nain cheukhat cu an kan pe duh bak lo. Cun cheukhat cu thawng kan laknak media Credit kan pekmi lawng an langter fawn. Rethei ngai in kan tialmi kha fawitein tangka laknak ah nan hman khawhmi cu a tha tuk ko. Credit pek tu cu kan philh ti hram hlah law tiah kan in theihter hna.

Be the first to comment

Leave a Reply

Your email address will not be published.


*